Read Baibul, Mizo Tirhkohte 21 Bible Online

Tirhkohte 21 - Baibul, Mizo bible

Tirhkohte 21

¹Tin, anni nen chuan kan inthen a, lawngin kan chhuak a, chu mi hnuah chuan ngil takin Koi thliarkar kan thleng a, tin, atukah Rodi thliarkar kan thleng leh a, chuta tangin kan kal zel a, Patara khua kan thleng a;

²tin, Phoiniki rama kai tur lawng pakhat kan hmu a, kan chuang a, kan kal ta zel a.

³Tin, Kupra thliarkar kan hmu a, vei lam chhawnin kan pel a, Suria ram lamah kan kal zel a, Turi khuaah chuan khawmualah kan chhuak ta rih a; chutah chuan lawnga bungrua thiar chhuah tur a ni a.

⁴Tin, zirtirhote kan zawng chhuak a, chutah chuan ni sarih kan cham a; tin, anni chuan Thlarau hrilhin,Paula hnenah Jerusalem khua tlawh loh tur an ti a.

⁵Nimahsela chung ni zawhah chuan kan chhuak a, kan kal ta a, unaute chuan an zain, an nupui fanaute nen daipawn thlengin min thlah a; tin, tuifinriat kamah chuan kan thingthi a, kan tawngtai a.

⁶Tin, "Dam takin," kan inti a, lawngah chuan kan chuang a; anni erawh chu an inah an haw leh ta a.

⁷Tin, Turi khua ata lawnga kan kal zawh chuan Ptolemai khua kan thleng a, unaute chibai kan buk a, an hnenah ni khat kan cham a.

⁸Tin, atukah chuan kan chhuak a, Kaisari khua kan thleng a; tin, Chanchin Tha hriltu Philipa inah kan lut a, ani chu pasarihte zinga pakhat a ni a, a hnenah kan cham a.

⁹Chu mi chuan fanu pali a nei a, nula thianghlim an ni a, Pathian thu an hril thin a.

¹⁰Tin, chutah chuan ni tam tak kan cham a, chu mi lai chuan Judai ram ata a hming Agaba zawlnei pakhat a lo chhuk a.

¹¹Tin, kan hnenah a lo kal a, Paula kawnghren a la a, a kete, a kutte amahin a inphuar a, tin, " 'Jerusalem khuaa Judate chuan hetiang hian he kawnghren neitu hi an phuar ang a, Jentailte kutah an pe bawk ang,' Thlarau Thianghlimin a ti e," a ti a.

¹²Tin, chung thu chu kan hriat veleh keini leh chu mi khuaa mite chuan Paula chu Jerusalem khuaa han kal lo turin kan ngen chiam a.

¹³Tin, Paula chuan a chhang a, "Eng in ti nge ni, in tah in tah a, ka lung in tihchhiat? Lalpa Isua hming avang chuan Jerusalem khuaa phuar chang ka huam lo a, thih pawh ka huam a sin," a ti a.

¹⁴Tin, thlem rual a nih loh ahnu chuan, "Lalpa thu thu ni rawh se," kan ti a, kan bang ta a.

¹⁵Tin, chu mi hnuah chuan kan bungrua kan siam a, Jerusalem khuaah kan han kal a.

¹⁶Kaisari khuaa mi zirtirho tute emaw kan hnenah an kal ve a, anni chuan a hming Mnasona, zirtir hmasa pawl, Kupra thliarkara mi pakhat kan thlen in pa tur chu an hruai ve a.

¹⁷Tin, Jerusalem khua kan thlen chuan unauten hlim takin min lo lawm a.

¹⁸A tukah chuan Paula hoin Jakoba hnenah kan lut a; chutah chuan kohhran upate zawng zawng pawh an awm a.

¹⁹Tin, Paulan anmahni chibai a buk zawhin, a rawngbawlna hmanga Pathianin Jentailte zinga thil a tihtir apiang chu akip akawiin a sawi a.

²⁰Tin, unaute chuan chung thu chu an hriatin Pathian an chawimawi a; tin, Paula hnenah chuan, "Unaupa, Judate zinga ringtute tamzia i hmu a; an zain Dan chungah thahnem an ngai bawk a;

²¹tin, nangin Jentailte zinga Juda awmte zawng zawng hnenah chuan an fate serh tan loh tur leh dan anga awm loh tur, tiin Mosia thlauhthlakna tur i zirtir thin tih mi kaah i thu hi an hria a.

²²Engtin nge ni ta ang le? I lo thleng tih an hre dawn ngei si a.

²³Chuvangin i hnena kan sawi ang hian ti ang che: Thutiam nei mipa pali kan hnenah an awm;

²⁴chung mite chu hruai la, an hnenah inthian fai ve la, an lu an meh theih nan an tan sum seng rawh; chutichuan mi zawng zawngin mi kaa i thu an hriat apiang kha, tih tak a ni lo tih an hria ang a, nangmah ngei pawh Dan zawhin fel takin i awm ve zawk tih an hre dawn nia.

²⁵Jentailte zinga ringtute chungchang thu zawng, milem biakna thil ei kawngah te, sa thisen ei kawngah te, sa rehhlum ei kawngah te, inngaih kawngah te an inthiarfihlim tur a ni, tiin kan rel a, kan ziak tawh kha," an ti a.

²⁶Tin, atukah chuan Paulan mipate chu a hruai a,an hnenah a inthian fai ve a, Pathian biak inah chuan a lut a, an tana sa talh theuh tur a peksak hma loh chuan inthen faina ni an nei rih dawn tih puithiam hnenah a hrilh lawk a.

²⁷Tin, ni sarih chu a tlin dawn ruaiin Asia rama Judate chuan Paula chu Pathian biak inah chuan an hmu a, mipui zawng zawng an fuihpawrh a, ani chu an man a.

²⁸an au a, "Israel mite u, min pui rawh u! He mi hi ram tinah mi zawng zawng hnenah, Juda mi te, Dan te, he in te sawichhetu kha a nih hi; chu lo pawh, Pathian biak inah hian Grik mite pawh a luhpui a, he in thianghlim hi a tibawlhhlawh tawh a ni," an ti a.

²⁹(Chu mi hmain khuaah chuan Ephesi khuaa mi Trophima chu a hnenah an hmu a, Paulan chu mi chu Pathian biak inah a luhpui an ring a ni).

³⁰Tin, akhuain an phu ta mur mur a, mite chu an tlan khawm a; Paula an man a, Pathian biak in ata an hnuk chhuak a; kawngte chu an khar ta nghal a.

³¹Tin, ani chu tihhlum an tum lai chuan Jerusalem khuaa mi zawng zawng an buai tih thu chu sipai pawl hotu lal ber hnen a han thleng a.

³²Tin, ani chuan sipaite leh sipai za hotute a hruai ta nghal a, an hnenah a tlan chhuk a; tin, anni chuan hotu lal ber leh sipaite chu an hmuh veleh Paula vuak an bang ta a.

³³Tin, hotu lal ber chuan a rawn hnaih a, Paula chu a chelh a,khaidiat pahnih buntir thu a pe a; tu nge a nih a, eng nge a tih a zawt a.

³⁴Tin, mipui zingah chuan a then thu khatin an au a, a then thu dangin an au a; tin, bengchheng avangin a ziazang a hre thei lo a, kulhbinga hruai luh thu a pe a,

³⁵Tin, Paulan kailawn a thlen laiin mipuiin an beih nasat avangin sipaiten ani chu an chawi kang zel a;

³⁶mi zawng zawngin, "Tiboral rawh u," tia auin an zui huai huai si a.

³⁷Tin, Paula chu kulhbingah chuan an hruai luh dawn laiin, ani chuan sipai hotu lal ber hnenah chuan, "I hnenah thu kamkhat ka sawi thei ang em?" a ti a. Tin, ani chuan, "Grik tawng i hria elo?

³⁸Hmana mite fuihpawrha mihring philhmangho sangli thlalera hruai chhuaktu Aigupta rama mi kha i ni lo em ni?" a ti a.

³⁹Paula erawh chuan, "Juda mi, Kilikia rama Tarsa khuaa mi ka ni, khaw namena awm ka ni lo; mi khawngaih la, mi zawng zawng hnenah thu mi hrilhtir rawh," a ti a.Tin,a remtih veleh Paula chu kailawnah chuan a ding a,mi zawng zawng ngawihna'n a kutin a zap a; tin, an ngawih thuap veleh Hebrai tawngin an hnenah:

⁴⁰Tin,a remtih veleh Paula chu kailawnah chuan a ding a,mi zawng zawng ngawihna'n a kutin a zap a; tin, an ngawih thuap veleh Hebrai tawngin an hnenah: