Read Baibul, Mizo Tirhkohte 22 Bible Online

Tirhkohte 22 - Baibul, Mizo bible

Tirhkohte 22

¹Unaute u, pate u, tunah in hnenah ka thiamna thu ka hrilh dawn che u hi ngaithla rawh u," a ti a.

²Tin, Hebrai tawngin an hnenah thu a sawi tih an hriat veleh an ngawi lehzual a; tin, ani chuan,

³Juda mi ka ni, Kilikia rama Tarsa khuaa piang ka ni, nimahsela he khuaah hian Gamaliela ke bulah chuan zira sei lian ka ni, min thlahtute Dan awmze khermei tak chu zir thina awm ka ni, vawiina nangmahni zawng zawng ang tak hian, Pathian tana thahnem bawk thin ka ni.

⁴Tin, he Kawnga mite hi tihlum hial khawpin ka tiduhdah thin a, ahmei apain ka phuar a, tan inah ka khungtir thin a.

⁵Puithiam Lalber leh upate zawng zawng pawhin chung thu chu mi hriatpui thei e, an hnen ata pawh unaute pek atan lehkha ka hmuh kha; tin, Damaska khuaa awm apiang an hrem atan, phuar chunga Jerusalem khuaa hruai turin ka kal kha.

⁶Tin, ka kal a, Damaska khaw kiang kan thlen chuan chawfak hun laiin, thawk lehkhatan van ata eng nasa tak ka velan a lo eng ta phut a;

⁷tin, leiah ka tlu a, ka hnenah, "Saula, Saula, nangin engati nge mi tihduhdah hi?" tiin aw ka hria a.

⁸Tin, keiin, 'Lalpa, tu nge i nih?' tiin ka chhang a. Tin, ani chuan ka hnenah, 'Nazaret Isua, i tihduhdah hi ka ni,' a ti a.

⁹Tin, ka thiante chuan eng chu an hmu na a, mi betu aw erawh chu an hre lo.

¹⁰Tin, keiin, 'Lalpa, eng nge ka tih ang?' ka ti a. Tin, Lalpa chuan ka hnenah, 'Tho la, Damaska khuaah lut rawh, thil zawng zawng i tih tura ruat apiang an hrilh ang che,' a ti a.

¹¹Tin, chu eng ropui avang chuan khua ka hmu thei ta lo a, ka thianten kutin min kai a, Damaska khuaah ka lut ta a.

¹²Tin, mi pakhat, Anania, Dan kawnga Pathian ngaihsak leh chuta Juda awmte zawng zawng hnena hmingtha chu,

¹³ka hnenah a lo kal a, ka kiangah a ding a, ka hnenah, 'Ka nau Saul, mit var nei rawh,' mi ti a. Tin, chu mi lai tak chuan amah ka han hmu ta a.

¹⁴Tin, ani chuan, 'Min thlahtute Pathianin a duhzawng hriaah leh Mi Feltaka chu hmu a, a tawngka hriaah pawh a ruat tawh che a.

¹⁵I hmuh leh i hriat thu-ah khan mi zawng zawng hnenah ama thu hretu i ni ang.

¹⁶Tin, engati nge i la awm reng le? Tho la, ama hming lam chungin baptisma chang la, i sualte tlengfai ta che,' mi ti a.

¹⁷Tin, Jerusalem khuaah hian ka hawn leh hnuin Pathian biak ina ka tawngtai laiin engloin mi zel a;

¹⁸tin, 'Hmanhmawh la, Jerusalem khua ata chhuak rawh; ka chanchin i hrilh tur chu an pawm dawh loh hi,' a mi tih lai ka hmu a.

¹⁹Tin, keiin, 'Lalpa, inkhawmna in tina a ringtu che apiang, tan inah ka khung a, ka vuak thin kha an hre si a;

²⁰tin, i thu hretu Stephana thisen an chhuah lai khan kei pawh a kiangah ka ding a, ka lo remti a, a tihlumtute puante ka veng hlawm bawk a ni,'ka ti a.

²¹Tin, ani chuan, 'Kal rawh, heta tangin hla taka Jentailte hnenah ka tir zawk ang che,' mi ti ta a," a ti a.

²²Tin, chu thu thleng chuan an ngaithla a; tin, aw ring takin, "Mi hetiang nek hi khawvel ata tiboral rawh u; nung tui a ni lo e," an ti ta a.

²³Tin, an au a, an puante an hlip a, an paih a, vaivut an vanvawrh a;

²⁴chutichuan sipai hotu lal ber chuan Paula chu kulhbing chhunga hruai luh thu a pe a, a chungah chuti ema an au chhan chu hriatna'n vuak chunga chhal turin a ti a.

²⁵Tin, savun hruia an phuar belhbawm zawhin, Paulan a kianga ding sipai za hotu hnenah chuan, "Rom mi reng reng in vaw thei em ni, thiam l oh chantir hnu pawh ni leh nghal si lo?" a ti a.

²⁶Tin, sipai za hotu chuan chu chu a hriat veleh, sipai hotu lal ber hnenah chuan a kal a. "I thil tih tur hi fimkhur teh khai! He mi hi Rom mi a lo ni e," a ti a, a hrilh a.

²⁷Tin, sipai hotu lal ber chu a lo kal a, a hnenah, "Rom mi i ni maw? Mi hrilh rawh," a ti a. Tin, ani chuan, "Ni e," a ti a.

²⁸Tin, sipai hotu lal ber chuan, "Chu mi khuaa mi ni turin kei zawngin tangka tam tak ka seng a sin," a ti a, a chhang a. Tin, Paula chuan, "Kei zawng Rom mi renga piang ka ni," a ti a.

²⁹Tichuan nghaisa chunga chhal tumte chuan ani chu an kalsan ta nghal a; sipai hotu lal ber pawhin Rom mi a ni tih a hriat chuan a hlau a, a phuar avangin a hlau bawk a.Tin, atukah Judaten chuan eng vangin nge Paula an hek tih hriat fel tumin, sipai hotu lal ber chuan ani chu a phelh a, puithiam lalte leh roreltu zawng zawngte inkhawm tur thu a pe a, Paula a hruai chhuak a, an hmaah a dintir ta a.

³⁰Tin, atukah Judaten chuan eng vangin nge Paula an hek tih hriat fel tumin, sipai hotu lal ber chuan ani chu a phelh a, puithiam lalte leh roreltu zawng zawngte inkhawm tur thu a pe a, Paula a hruai chhuak a, an hmaah a dintir ta a.