Read Baibul, Mizo Tirhkohte 23 Bible Online

Tirhkohte 23 - Baibul, Mizo bible

Tirhkohte 23

¹Tin, Paula chuan roreltute chu a en reng a, "Unaute u, vawiin thlengin Pathian mithmuha tha lama ka hriat apiang tiin ka awm thin e," a ti a.

²Tin, puithiam Lalber Anania chuan Paula kianga dingte hnenah a kaa bensak tur a ti a.

³Tin, Paula chuan a hnenah, "Nang lung pal hnawih varpa, Pathianin a beng zawk ang che; nang, Dan anga mi ngaituah turin i thu a, Dan lo anga mi ben tur i ti vei a ni maw?" a ti a.

⁴Tin, a kianga miten, "Pathian Puithiam Lalber i hau vei maw?" an ti a.

⁵Tin, Paulan, "Unaute u, Puithiam Lalber a ni tih ka hre lo a ni; 'I chipuite hotu chungah thu tha lo sawi suh,'tih pawh ziak a ni si a," a ti a.

⁶Tin, Paulan a then Saddukaite, a then Pharisaite an ni tih a lo hriatin roreltute zingah chuan a au a, "Unaute u, Pharisai ka ni, Pharisai fapa pawh ka ni; mitthi thawhleh beiseina thu-ah chhuahchhalin ka awm a nih hi," a ti a.

⁷Tin, chu chu a sawi zawh chuan Pharisaite leh Saddukaite an lo inhnial a, roreltute chu an inkhing ta a.

⁸(Saddukaihoten, "Mitthi thawhlehna reng a awm lo, vantirhkohte, thlaraute pawh a awm hek lo," an ti thin; Pharisaihote erawh chuan chu mi kawng pahnih chu a awm tih an awih si a).

⁹Tichuan nasa takin an buai ta a; Pharisaite lama mi lehkhaziaktute thenkhat an ding a, an hnial a, "He mi hi engmah a sualna kan hre lo e; thlarau pawhin vantirhkoh pawhin ani hi bia pawh ni se la, eng nge pawi ang?"an ti a.

¹⁰Tin, an inhnial nasat deuh deuh avangin sipai hotu lal ber chuan Paula an pawh sawm a hlau a, sipaite hnenah, zuk kala an zing ata kulhbinga han hruai chho lui turin a ti a.

¹¹Tin, azanah chuan Lalpa chu Paula kiangah a ding a, "Thlamuang takin awm rawh, Jerusalem khuaa ka thu i hriattir ang bawk hian Rom khuaah pawh i hriattir tur a ni," a ti a.

¹²Tin, ni a chhuahin Judate an tangrual a, Paula an thah hma loh zawng engmah eia bar lo turin chhia an inchham a.

¹³Chu mi thu phiartute chu sawmli aia tam an ni.

¹⁴Tin, anni chu puithiam lalte leh upate hnenah an kal a, "Paula kan thah hma loh zawng engmah tem lo turin chhia kan chham ta vek a ni.

¹⁵Chuvangin nangnin, roreltute nen a thu fel lehzuala ngaihtuah tum angin, in hnena hruai thla turin sipai hotu lal ber hnenah pehhel deuhin han sawi rawh u; in kiang hnai a thlen hma pawhin, keini amah that turin kan inpeih reng e," an ti a.

¹⁶Nimahsela Paula farnua fapain an chan thu chu a lo hria a, kulhbingah chuan a va lut a, Paula chu a va hrilh a.

¹⁷Tin, Paula chuan sipai zahotu pakhat a ko a, "He tlangval hi hotu lal ber hnenah chuan hruai rawh; a hnenah thu eng emaw sawi tur a nei a ni awm e," a ti a.

¹⁸Chutichuan sipai hotu lal ber hnenah chuan a va hruai a, "Paula, mi tang khan mi ko a, he tlangval hi i hnena rawn hruai turin mi tir a, i hnenah thu eng emaw sawi tur a nei a ni awm e," a ti a.

¹⁹Tin, sipai hotu lal ber chuan a kutah a chelh a, a kal hranpui a, arukin, "Engnge mi hrilh tur i neih chu?" tiin a zawt a.

²⁰Tin, ani chuan, "Paula thu chu fel lehzual deuha i ngaihtuah tur angin naktukah roreltute hnena hruai chhuk turin Judaten dil che an remti tlang a.

²¹Nimahsela an thu lo awih suh ang che; an zinga mi sawmli aia tamin an chang reng a, chu mite chuan amah an thah hma loh chu engmah eia bar lo turin chhia an chham a; tunah hian i thu nghakin inpeih sain an awm reng a ni," a ti a.

²²Tin, sipai hotu lal ber chuan tlangval chu a kaltir a, "Heng thu hi mi lo hriattir tawh tih tumah hrilh suh ang che," a ti tlat a.

²³Tin, sipai za hotu pahnih a ko a, "Zan mut reh hunah Kaisari khaw thlenga kal turin sipai zahnih nen, sakawr chung chuang mi sawmsarih nen, fei keng mi zahnih nen siam rawh u," a ti a;

²⁴tin, Ram Awptu Felika hnenah chuan him taka an thlentir theihna'n Paula an chuantirna turin sate lo siam tur a ti bawk a.

²⁵Tin, hetiangin lehkha a ziak a:

²⁶Klaudia Lusian Felika, Ram Awptu tha ber chibai a buk e.

²⁷He mi hi Judaten an man a, an thah dawn laiin an hnenah sipaite hruaiin ka kal a, Rom mi a ni tih ka hria a, ka chhan chhuak ta a.

²⁸Tin, an hekna chhan hriat ka duh a, an roreltute hnenah ka hruai chhuk a;

²⁹chutichuan an dan thu engahte emaw hek a ni tih ka hria a, nimahsela an hekna thu-ah thihna leh phuarna khawp meuh turin engmah ka hre si lo.

³⁰Tin, Judaten amah an chang tih miin mi hriattir veleh i hnenah ani hi ka rawn tir ta nghal a ni, a hektute pawh a chunga thupawi an neih apiang i hmaa sawi turin thu ka pe bawk a," tiin.

³¹Chutichuan sipaite chuan a thupek ang chuan Paula chu azan azanin an hruai a, Antipatri khua an thlenpui a.

³²Tin, atukah chuan sakawr chung chuang mite chu a hnena kal zel turin an kirsan a, kulhbingah chuan an kal leh ta a;

³³tin, anni chu Kaisari khua chu an thleng a, Ram Awptu hnenah lehkha chu an pe a, Paula pawh a hmaah an dintir a.

³⁴Tin, Ram Awptu chuan a chhiar zawhin Paula awmna ram a zawt a. Tin, Kilikia rama mi a ni tih a hriat veleh," A hektu che pawh chu an lo thlen hunah i thupawi ka ngaihtuah ang," a ti a. Tin, Heroda inah ven tur thu a pe a.

³⁵A hektu che pawh chu an lo thlen hunah i thupawi ka ngaihtuah ang," a ti a. Tin, Heroda inah ven tur thu a pe a.