Read Baibul, Mizo Tirhkohte 24 Bible Online

Tirhkohte 24 - Baibul, Mizo bible

Tirhkohte 24

¹Tin, ni nga chinah puithiam Lalber Anania a lo thleng chhuk a, upa tute emaw nen, a hming Tertulla thusawi thiam pakhat nen; tin, Paula chunga thupawi chu Ram awptu hnenah an sawi a.

²Tin, Paula chu an koh chhuah hnu chuan Tertulla chuan amah a hek tan a: "Felik tha ber, nangmaha zarah thlamuang em emin kan awm avang leh, i enkawl avanga he chite tan hian sualte khap thatin a awm thin avangin,

³kumkhuain khawiah pawh lungawi takin kan lawm thin.

⁴Amaherawhchu i tan ninawm lutuk nih ka duh lo a, i nunnemnain thu kamkhat erawh chu min ngaihthlaksak turin ka ngen a che.

⁵He mi hi mi huatthlala tak, khawvela Judateho zawng zawng chawk buaitu leh Nazaret mite pawla an tupa ber pakhat a nih kan hria a;

⁶Pathian biak in tihbawlhhlawh a tum bawk a; chuvangin kan man a,

⁷kan dan anga a chungthu relsak kan tum a ni a; mahse, sipai hotu lal ber Lusia a lo kal a, kan kuta ta min lak luihsak a, amah hektute i hmaa lo kal turin thu min pe ta a ni,

⁸nangmah ngeiin chhuahchhalin kan hekna thil zawng zawng hi ama lakah i hre thei ang," a ti a.

⁹Tin, Judate pawh chuan," Chung thu chu chutiang chu a ni," tiin an tanpui ve a.

¹⁰Tin, Ram Awptu chuan thu sawi tura Paula chu kuta a zah veleh Paula chuan, "Nang kum tam tak he chite rorelsaktu hi i nih ka hriat avangin lawm takin ka thiamna thu ka sawi dawn hi.

¹¹Jerusalem khuaah Pathian be turin ka han kal achin chu ni sawm leh ni hnih lo liam a la ni lo ang tih I la hre thei ang;

¹²Pathian biak inah pawh, inkhawmna inahte pawh, khuaah pawh tumah ka hnial leh mipui ka fuihpawrh annin mi hmu hek lo;

¹³tunah pawh an mi hekna thu hi i hriatah a bul an chhuichhuak thei hek lo ang.

¹⁴Nimahsela he thu hi i hnenah ka inpuang ang, 'pawl hrang' an tih Kawng dan angin min thlahtute Pathian ka be thin. Dan leh Zawlneite Lehkhabua ziak zawng zawng ringin;

¹⁵tin, mi felte leh fel lote thawhlehna a awm ang tih Pathian lamah ka beisei a, henghote pawh hian chung chu an awih ve bawk si a;

¹⁶chu mi avang chuan Pathian hnen lamah leh mihring hnenah pawh rilru sual lo mawlh hi vawn fo ka tum thin.

¹⁷Tin, kum tam tak hnuah hian ka chipuite hnenah thilpek tur leh sa talh tur rawn kengin ka lo kal a;

¹⁸tin, chung thil ka pek lai chuan mipui tel loin, bengchheng loin, Pathian biak inah thianghlimin mi hmu a.

¹⁹Nimahsela chutah chuan Asia rama mi Juda tute emaw an awm kha, chungte chuan ka chungah thu an neih chuan hetah hian i hmaa awmin mi hek tur a ni.

²⁰A nih loh leh, he'ng mite ngei hian roreltute hmaa ka din lai khan, ka tihsual eng nge an hmuh sawi rawh se,

²¹he thu kamkhat avang hian a nih nghal loh chuan, an zinga dingin, 'Mitthi thawhlehna thu-ah ka awm a nih hi,' ka tih kha," a ti a, a chhang a.

²²Tin, Felika chuan Kawng thu chu a lo hre hle tawh a, "Sipai hotu lal ber Lusia chu a lo thlen chhuk hunah in thu ka la rem ang," tiin, thu chu a dah ta rih a.

²³Tin, Paula chu a duat deuh a, a thiante rawngbawlsak khap lo a, ventir turin sipai za hotu hnenah chuan thu a pe a.

²⁴Tin, ni eng zat emaw chinan Felika chu a lo kal leh a, a nupui Drusilli, Juda hmeichhia nen, Paula chu a kohtir a, Krista Isua rinna thu chu a ngaithla a.

²⁵Tin, Paula chuan felna thu te, insum thute, rorelna lo la awm tur thute khun taka a hrilh laiin Felika chuan hlauhawm a ti em a, "Kal leh ta rih tawh, hun remchang ka neih hunah ka ko ang che," a ti a.

²⁶Paulan tangka a pek a beisei bawk a, chuvangin a ko zing deuh a, a be thin a ni.Nimahsela kum hnih a vei hnuin Porkia Festan Felika chu a thlak ta a; tin, Felika chuan Judate zingah hmingthat a duh a, Paula chu phuar sain a hnutchhiah ta a.

²⁷Nimahsela kum hnih a vei hnuin Porkia Festan Felika chu a thlak ta a; tin, Felika chuan Judate zingah hmingthat a duh a, Paula chu phuar sain a hnutchhiah ta a.