Read Baibul, Mizo Tirhkohte 26 Bible Online

Tirhkohte 26 - Baibul, Mizo bible

Tirhkohte 26

¹Tin, Agrippa chuan Paula hnenah chuan, "I thiamna thu i sawi thei e," a ti a. Tin, Paula chuan a kut a phar a, a thiamna thu a sawi a;

²Lal Agripp, Judaten mi hekna zawng zawnga ka thiamna thu vawiinah hian I hmaa ka sawi dawn avang hian lawmin ka inhria;

³hei hi ka lawmna ber a ni, Judate zingah dan leh thubuai zawng zawng kawnga I fin ngawt avangin:chuvangin muang taka mi ngaihthlaksak turin ka ngen a che.

⁴Atira ka naupan lai ata ka chite zingah leh Jerusalem khuaa ka awm dan kha Juda zawng zawngin an hria e;

⁵a tir ata ka chanchin an hria e, khatia kan sakhaw pawl khermei ber dan pangngaia Pharisaia ka awm kha, an duh chuanin mi sawipui thei a ni.

⁶Tin, Pathianin min thlahtute hnena thu a tiam kha beisei kawng thu-ah hetah tunah rorelsaka ka din hi;

⁷chu thutiam chu kan hnam sawm leh hnam hnihin, achhun azanin Pathian rawng thahnemngai taka bawlin hmuh an beisei thin. Aw lalpa, chu mi beisei thu avang chuan Judaten mi hek a nih hi.

⁸Pathianin mitthite a kai tho tih hi engati nge awihawm loa in ruat ni?

⁹Kei pawhin Nazaret Isua hming kalh lamin thil tam tak ti i la thain ka lo ring thin a.

¹⁰Chu ang chu Jerusalem khuaah ka ti bawk thin a; tin, puithiam lalte hnenah thu ka hmu a, mi thianghlimte zinga mi tam tak tan inahte ka khung bawk thin a; tin, an tihhlum laiin tihhlum remti lamah ka tang bawk thin a.

¹¹Tin, inkhawmna in tinah ka hrem fo a, Isua thu sawttir ka tum hram thin a; tin, an chungah ka kawlh em em a, ram dang khaw thleng pawhin ka tiduhdah thin a.

¹²Chutiang ti turin puithiam lalte thu hmu leh an tirhna lehkha kengin Damaska khuaah ka kal a;

¹³tin, e, lalpa, ka kal laiin chawfak hun a ni a, van ata eng eng emaw, ni eng aia eng zawk, keimah leh ka kalpuite velah engin ka hmu a.

¹⁴Tin, kan zain leiah kan tlu a, Hebrai tawngin, 'Saula, Saula, nangin engati nge mi tihduhdah ni? Chhunna tiang khen i tan a na e,' mi tiin aw ka hria a.

¹⁵Tin, keiin, 'Lalpa tu nge i nih?' ka ti a. Tin, Lalpa chuan, 'Isua, I tihduhdah hi ka ni;

¹⁶nimahsela tho la, ding rawh; he'ng I thil hmuhte leh I hnena ka la inlarna tur thilte nen, chu mi rawngbawlah leh hretua siam tur chein I hnenah ka rawn inlar a nih hi;

¹⁷mi zawng zawng leh Jentailte kut ata ka chhanhim ang che; an mit tivar turin an hnenah ka tirh che hi,

¹⁸chutichuan thim chu eng lamah an hawisan ang a, Setana thuneihna chu Pathian lamah an hawisan ang, sual ngaihhnathiamna an hmuhna'n leh mi rin avanga thianghlim tawhte zinga ro chan an neihna'n,' a ti a.

¹⁹Chuvangin lal Agripp, vana mi inlara chu ka hnial lo a,

²⁰a tirin Damaska khuaa mite hnenah, chu mi hnuah chuan Jerusalem khuaa mite hnenah te, Judai ram tina mite hnenah te, Jentailte hnenah te pawh, sim hming pu tlaka thil ti a, sima Pathian lam an hawina turin ka hril zawk thin a ni.

²¹Chung avang chuan a ni, Judaten Pathian biak inah mi mana tihhlum mi tum tak ni.

²²Nimahsela Pathian hnen atanga tanpuina ka hmuh avangin vawiin thlengin mi tete leh mi liante hnena thu hriattirin ka la awm reng a, zawlneite leh Mosia'n lo thleng tur an tih thu chauh lo chu thu dang sawi loin;

²³khatia Krista-in hrehawm a tuar ang a, tin, mitthi zing ata a thawh leh avangin mi zawng zawng hnenah leh Jentailte hnenah pawh eng hmuhtirtu hmasa ber a ni ang, an tih thu kha," a ti a.

²⁴Tin, chutianga a thiamna thu a sawi laiin Festa chuan, aw ring takin, "Paula, I a a ni; I zir tamnain a tia che a nih hi," a ti a.

²⁵Nimahsela Paula chuan, "Festa tha ber, ka a lo a sin; thu dik tak leh thu fing tak ka sawi zawk a nih hi.

²⁶Heng thu hi lal hian a hria alawm, a hnenah pawh hlau loin ka sawi hi; he'ng thil hi engmah a hnenah zep a ni lo tih dik takin ka hria e; he'ng hi in kila tih a ni si lo.

²⁷Lal Agripp, zawlneite thu I awih em? I awih tih ka hria e," a ti a.

²⁸Tin, Agrippa chuan Paula hnenah, "Rei lo te chauh thlema Kristiana mi siam I tum a nih hi!" a ti a.

²⁹Tin, Paula chuan, "Rei se la, rei suh se la, nang chauh ka ti lo, vawiina ka thu hretu zawng zawng pawh hi, keimah anga awm atan Pathian hnenah ka dil a ni, kawlte hi erawh chu bun ve loin," a ti a.

³⁰Tin, lal nen, Ram Awptu nen, Berniki nen, an hnena thute nen chuan an tho hlawm a;

³¹tin, an kal hrang a, an inbia a, "He mi hian thihna leh kawl bunna khawp meuh thil engmah a lo tih loh hi," an ti a.Tin, Agrippan Festa hnenah, "He mi hian Kaisara hnena thlen lo tiam tawh suh se la chuan a chhuak mai tur," a ti a.

³²Tin, Agrippan Festa hnenah, "He mi hian Kaisara hnena thlen lo tiam tawh suh se la chuan a chhuak mai tur," a ti a.