Read Baibul, Mizo Tirhkohte 27 Bible Online

Tirhkohte 27 - Baibul, Mizo bible

Tirhkohte 27

¹Tin, Itali rama lawnga kan kal tur thu an tihtluk veleh, Paula leh mi tang dang tute emaw Awgusta pawla mi sipai za hotu a hming Julia an kawltir a.

²Tin, Adramuttini khaw lawng, Asia ram tuifinriat kama khaw awmte tlawh turah chuan kan chuang a, tuifinriatah kankal ta a; Makedonia rama mi Aristarka, Thessalonika khuaa mi kan hnenah a awm a.

³Tin, atukah Sidon khua kan tlawh a. Tin, Julia chuan Paula a titha hle a, intiharh turin a thiante hnenah a lentir a,

⁴Tin, chuta tangin tuifinriatah kan kal leh a, thliin a ni lo lamah min nem avangin Kupra thliarkar phen thli up lamah kan tlan a.

⁵Tin, Kilikia ram leh Pamphulia ram dep tuifinriat kan pelh hnuin, Lukia rama Mura khua kan thleng a.

⁶Chutah chuan sipai za hotu chuan Aleksandria khaw lawng Itali ram tlawh tur chu a hmu a; chu miah chuan min chuantir a.

⁷Tin, ni rei tak zawi zawiin kan kal a, Knidos khaw zawn harsa takin kan thleng hram hram a, thliin min hnar avangin Salmoni hrula Kret thliarkar phen thli up lamah kan tlan a;

⁸tin, harsa takin vaukam kan hrut a, Litengsawl Mawi an tih hmun chu kan thleng ta a; chu mi kiangah chuan Lasai khua a awm.

⁹Tin, ni tam tak a ral tawh avang leh, lawnga kal a hlauhawm tawh avangin, (Chaw Nghei ni chu a lo pel tawh si a), Paula chuan anni chu a zilh a,

¹⁰an hnenah, "Pute u, lawnga tuna kal hi chhiatna leh boralna nasa tak a thleng dawn tih ka hria e, a sum leh lawng chungah chauh ka ti lo a, keimahni chungah pawh ka ti a ni," a ti a.

¹¹Nimahsela sipai za hotu chuan Paula thusawi ai chuan lawngpu leh lawng neitu thu a awih zawk a.

¹²Tin, thlasik tuarna'n litengsawl chu a rem loh avangin a tam zawkin, chuta tanga tuifinriata kal chhuaha Phoiniki khua thlen hrama chuta thlasik tuar an rawtpui a; Phoiniki chu Kret thliarkara litengsawl pakhat a ni, hmar chhak leh chhim chhak chhawng a ni.

¹³Tin, chhim thli chu zawi zawia a lo tleh veleh chuan, an duhzawng an hmu emaw an ti a, thirchakai chu an khai chhuak a, Kret thliarkar kam chu an hrut an hrut a.

¹⁴Nimahsela rei lo te achinah khawmual lam atang chuan thli na tak a lo tleh chhuk ta a, chu thli chu Eurakuilo an ti thin a.

¹⁵Tin, lawng chu a rawn nam fuh a, thli lam a hawi theih loh veleh kan thlah ta a, min len min len ta mai a.

¹⁶Tin, a hming Klaudi thliarkar te tak te phen thli up lamah kan tlan a,harsa takin lawngleng kan hum thei hram a;

¹⁷tin, an kaih chhuah hnuin chhanna hruite an hmang a, lawng hnuai lamah an la vet a, an phuar a; tin, puanzarna engkim an titlu a, chutilochuan litengsawl Surti an tiha len luh an hlau a, chutichuan min len min len ta a.

¹⁸Tin, atukah tuifawnin min vawrh nek avang chuan lawnga bungrua chu tuiah an paih tan ta a.

¹⁹Tin, atuk lehah anmahni kut meuhin lawng bungrua an paih chhuak leh ta a.

²⁰Tin, ni rei tak, ni pawh, arsi pawh a lang lo a, thlipui namenin min nuai lo a, nun reng kan beisei tawh lo.

²¹Tin, chaw ei loa rei tak an awm hnuin, Paula an zingah a ding a, "Pute u, Kret thliarkarah khan phelh loin, ka thu kha awiha he'ng chhiat leh boralna hi thlen lo tur in ni na a le.

²²Nimahsela tunah pawh hian thlamuang taka awm turin ka fuih a che u; in zingah tumahin nunna in hloh dawn lo e, lawng erawh hi chu a bo dawn a ni.

²³A ta ka ni a, a rawng ka bawl thin Pathian kha, chu mi vantirhkoh pakhat nizan khan ka kiangah a lo ding a, ka hnenah,

²⁴'Paula, hlau suh, Kaisara hmaah i ding tur a ni; tin, ngai rawh, lawnga i hnena kal zawng zawngte pawh hi Pathianin a pe a che,' mi ti a ni.

²⁵Chuvangin pute u, thlamuang takin awm rawh u; Pathian ka ring e, mi hrilh ang zelin a awm dawn.

²⁶Nimahsela thliarkar engah emaw min len chhuak tur a ni," a ti a.

²⁷Tin, Adria tuifinriatah thliin lehlam lehlamah min len min len a, zan sawm leh zan li a tlin zan chuan, zan laiah emaw, lawng mite chuan khawii khawmual emaw thleng dawnin an inhria a;

²⁸chutichuan tui thuk lam an teh a, hlam sawmhnih niin an hria a; tin, rei lo tean an teh leh a, hlam sawm leh hlam ngain an hria a.

²⁹Tin, lawng mei lamah thirchakai pali an thlaka, chutilochuan lung chhe hmunah min len chhuak hlauh dah ang e, tih an hlau a; tin, khawvar hlan an nghakhlel hle mai a.

³⁰Tin, lawng mite chuan lawnghnar lamah thirchakaite thlak tur anga tiderin, lawngleng chu tuifinriatah an thlak a, lawng chu tlansan an tum a,

³¹chu mi laiin Paula chuan sipai za hotu leh sipaite hnenah chuan, "Hengho hi lawnga an awm reng loh chuan in him thei lo ang," a ti a.

³²Tichuan sipaite chuan lawngleng hruite chu an zai chat a, an thlah ta a.

³³Tin, khawvar dawn lai chuan Paulan mi zawng zawng chu chaw eiah a tir a, "Vawiin hi ni sawm leh ni li a ni tawh, engmah ei loin in nghak a, in nghei reng a ni.

³⁴Chuvangin chaw ei atan ka tir chiam a che u; in damna tur a nih hi; in zingah tumah a samzai pakhat mah a boral lo ang," a ti a.

³⁵Tin, chu thu chu a sawi zawhin chhang a la a, mi zawng zawng hmaah Pathian hnenah lawmthu a sawi ta a; tin, a phel a, a ei tan ta a.

³⁶Tin, anni pawh thlamuang takin an awm a, chaw an ei ve ta a.

³⁷Tin, lawnga mi chu kan zain zahnih leh sawmsarih leh paruk kan ni a.

³⁸Tin, an ei kham chuan buh chu tuifinriatah an paih a,lawng an tizang deuh a.

³⁹Tin, ni a chhuah chuan khawmual chu khawii lai nge a nih an hre lo a; nimahsela khawii litengsawl emaw tiaupho nei an hmu a, chu mi chungah chuan, an theih chuan, lawng tlan chhuahtir an tum a.

⁴⁰Tin, thirchakai thlunnate chu an zai chat a, tuifinriatah an hnutchhiah a; chu mi rualin karherna phuarnate chu an phel a, hma lam puanzar chu thli chhem tur ziain an hnuk chho a, thiaupho chu an pan ta a.

⁴¹Nimahsela tuizangkhauh pahnih intawhna hmunah kan lut hlauh a, lawng chu lei an suttir ta a; tichuan lawn ghnar lam chu a tang ta tlat a, tihchet zawh lohin a awm reng a, a mei lam erawh chu tuifawn a nasat avangin a kehsawm tan ta a.

⁴²Tin, sipaiten mi tangte chu tihhlum an rawt a, chutilochuan tui hleuh kaite an awm ang a, an tlanbo ang tih an hlau a.

⁴³Nimahsela sipai za hotu chuan Paula chhanhim a duh a,an thil tum chu a khap a; tui hleuh thiam apiang tuifinriatah zuan thlaka khawmual lo kai hmasa tur leh,mi dang chu, a then thingphek chungahte, a then lawng bungraw dang chungahte kai turin thu a pe a. Chutiang chuan an zain khawmualah him takin an kai ta vek a.

⁴⁴mi dang chu, a then thingphek chungahte, a then lawng bungraw dang chungahte kai turin thu a pe a. Chutiang chuan an zain khawmualah him takin an kai ta vek a.