Read Baibul, Mizo Tirhkohte 28 Bible Online

Tirhkohte 28 - Baibul, Mizo bible

Tirhkohte 28

¹Tin, kan kai zawh chuan thliarkar hming chu Meliti a ni tih kan lo hre ta a.

²Tin, awze miten khawngaih namenin min khawngaih lo a; ruah a lo sur avang leh a vawh avangin mei an chhem a, kan zain min lo lawm a.

³Tin, Paula chuan thing tel khat a fawm a, meiah a tuah a, a sat avangin rul a lo chhuak a, a kutah a chu a, a bet reng a.

⁴Tin, awze mite chuan rannung a kuta inkhai reng chu an hmuhin, "He mi hi tualthat a ni phawt e, tuifinriat atangin tlan chhuak mah se la Phubalatua chuan a nun a awih tawh lo a nih hi," an ti a.

⁵Nimahsela ani chuan rannung chu meiah a thing thla a, engmah a ti lo a.

⁶Anni erawh chuan a vun emaw thawklehkhata thia a tluk nghal an ring a; tin, rei tak an nghak reng a, engmah a ti lo tih an hriat chuan an rilru an lamlet a, "Pathian a nih hi," an ti ta zawk a.

⁷Tin, chu mi hmun kiangah chuan chu mi thliarkara lal ber a hming Publia ram a awm; chu mi chuan min lo lawm a, ni thum lawm takin min thleng a.

⁸Tin, Publia pa khawsik leh santen veiin a lo mu reng a; tin, Paula a hnenah a lut a, a tawngtai a, a chungah a kutte a nghat a, a tidam ta a.

⁹Chu chu a tih zawh chuan chu mi thliarkara mi dang na nei apiang chu an lo kal a, an dam ta hlawm a;

¹⁰chu mite chuan nasa takin min chawimawi a; tin, kan kal dawn chuan kan chakkhai apiang lawngah an dah hlawm a.

¹¹Tin, thla thum chinah, a hming Phir, Aleksandria khaw lawng, thlasika thliarkara awm tawh, chu mi lawngah chuan kan kal ta a.

¹²Tin, Surakus khua kan tlawh a, chutah chuan ni thum kan cham a.

¹³Chuta tangin kan kal kual a, Region khua kan thleng a; tin, ni khat chinah chhim thli a lo tleh a, atuk lehah Puteoli khua kan thleng leh a;

¹⁴chutah chuan unaute kan hmu a, an hnena ni sarih chaman min thlem a; chutiang chuan Rom khaw lamah kan kal ta zel a.

¹⁵Tin, unauten kan chanchin an hriat veleh chuta tang chuan Appia Dawr leh Khualbuk Pathum chinah min hmuak turin an lo kal a; Paulan chu mite chu a hmuh chuan Pathian hnenah lawmthu a sawi a, a muang ta a.

¹⁶Tin, Rom khuaa kan luh chuan Paula chu a vengtu sipai hnenah amah chauhva awm an phal a.

¹⁷Tin, ni thum chinah Paula chuan Judate hotu deuh apiang a ko khawm a; tin, an rawn inkhawmin an hnenah, "Unaute u, mi zawng zawng leh min thlahtute dan chunga engmah ka tih loh pawhin Jerusalem khua atangin Rom mite hnenah mi tantir a ni.

¹⁸Tin, anni chuan mi chhuahchhal zawhin thihna khawp meuh ka chungah engmah a awm loh avangin thlah mi tum a.

¹⁹Nimahsela Judaten chu chu an hnial avngin Kaisara hnena thlen lo thei ka ni ta lo a; nimahsela ka chite hekna neia ti ka ni lo e.

²⁰Chung kawngah chuan nangmahni hmuhah leh biak atan ka ko che u a ni; Israelte beisei ka tawmpui avanga he khaidiat hi bun ka ni si a," a ti a.

²¹Tin, anni chuan a hnenah, "I chanchin Judai ram ata lehkhatein kan hmu hek lo, unaute tumahin heta lo kalin i chungah thupawi engmah an puang hek lo, sawi pawh an sawi hek lo.

²²Amaherawhchu he pawl hi ram tinah sawichhiat an ni si a, nangin engtin nge i ngaih hriat kan duh e," an ti a.

²³Tin, ni an tiam a, chu mi niah chuan a thlen inah a hnenah mi tam tak an lo kal a; zing atangin tlai lam thlengin an hnenah chu thu chu a hrilhfiah a, Pathian ram thu a hriattir a, Mosia Dan Lehkha thu leh Zawlneite Lehkhabu thuin Isua lamah anmahni a thlem a thlem a.

²⁴Tin, a thenin a thusawi chu an ring a, a thenin an ring lo a.

²⁵Tin, an inngeih ta lo a, Paulan thu kamkhat a sawi zawhin an kal chhuak ta a. A thusawi chu hei hi a ni; "Thlarau Thianghlimin zawlnei Isaia kaan in thlahtute hnena a sawi kha, a dik ngawt mai,

²⁶He chite hnenah hian va sawi rawh: Beng zawngin in hre na ang a, a ngaihna erawh in hre tawp lo ang; Hmuh zawng in hmu na ang a, hriat erawh chu in hre tawp lo ang;

²⁷He chite thinlung hi a lo chawlawl ta a, an bengte a lo ngawng deuh a, an maimichhing bawk a, 'Chutilochuan kan mitin kan hmu ang a, kan bengin kan hria ang a, kan thinlungin kan hre bawk ang a, kan hawi kir leh ang a, anin min tidam hlauh dah ang e,' an ti a, a tih kha.

²⁸Chutichuan Pathian chhandamna thu hi Jentailte hnena thawn a ni tih hre rawh u, anni zawngin ngaih pawh an ngaithla ang," a ti a.

²⁹Chu'ng thu a sawi zawh chuan Judate chu nasa taka anmahni leh anmahni inhnialin an tin ta a.

³⁰Tin, Paula chu kum hnih pumhlum ama in hawhah a awm a, a hnena lut apiang a lawm thin a.Pathian ram thu a hrilh a, Lal Isua Krista thu pawh huai takin a zirtir thin a, tumahin amah an khap si lo a.

³¹Pathian ram thu a hrilh a, Lal Isua Krista thu pawh huai takin a zirtir thin a, tumahin amah an khap si lo a.