Read Baibul, Mizo Tirhkohte 3 Bible Online

Tirhkohte 3 - Baibul, Mizo bible

Tirhkohte 3

¹Tin, Petera leh Johana chu behliang mun hunin tawngtai hun lai chuan Pathian biak ina lut turin an chho a.

²Tin, patling tu emaw a pian tirh ata kebai an rawn zawn a, chu mi chu biak ina lutte hnena kut dawh atan, biak in kawngkhar, Mawi an tih bulah chuan ni tin an muttir thin a ni a;

³chu mi chuan Petera leh Johana Pathian biak ina lut tur chu a hmu a, kut a dawh a.

⁴Tin, Petera'n ani chu a en reng a, Johana pawhin; tin, Petera'n, "Min han en rawh," a ti a.

⁵Tin, ani chuan an lakah engemaw hmuh a beisei a, a han en a.

⁶Nimahsela Petera'n, "Tangka leh rangkachak engmah ka nei lo; nimahsela ka neih chhun ka pe ang che: Nazaret Isua Krista hmingin kein kal tawh rawh," a ti a.

⁷Tin, a kut ding lam a chelh a, a kai tho ta a; tin, thawklehkhatan a kete leh a kheimit ruhte chu a lo chak ta nghal a.

⁸Tin, ani chu a zuang tho a, a ding a, kein a kal tan ta a. Tin, kea kal kal leh, zuang zuang leh, Pathian fak chung zelin biak inah chuan a lut ve ta a.

⁹Tin, kea a kal leh Pathian a fak chu mi zawng zawngin an hmu a;

¹⁰biak in Kawngkhar Mawi bula kut dawha thu thin kha a ni tih an hria a; a chunga thil thleng chu mak an ti em em a, an buai hle mai a.

¹¹Tin, ani chuan Petera leh Johana chu a chelh reng laiin mi zawng zawngin mak an ti em em a, hulhliap, Solomona ta an tihah chuan an hnenah an lo tlan khawm a.

¹²Tin, Petera'n chu chu a hmuhin, mite chu a bia a, "Nangni Israel mite u, he'ng hi engati nge mak in tih? Keimahni thiltihtheihna leh Pathian kan ngaihsak avanga ani hi kan kaltir ang em chuan engati nge min en reng?

¹³Abrahama te, Isaaka te, Jakoba te Pathian, min thlahtute Pathian chuan a chhiahhlawh Isua a chawimawi ta a nih hi; ani chu in mantir a, Pilatan chhuah a tum pawhin a hmaah in lo duh loh kha.

¹⁴Mi Thianghlim leh Fel tak kha in duh lo a, tualthattu kha in hnena pek in ngen ta zawk a.

¹⁵Nunna Siamtu chu in that a; nimahsela Pathianin ani chu mitthi zing ata a kai tho leh a; chu chu a hretute kan ni e.

¹⁶Tin, ama hming rin avangin a hming chuan he mi in hmuh leh in hriat hi a tichak ta a ni; a ni, amah avangin rinna lo awm hian in zaa mithmuhah a tidam ta viah a nih hi.

¹⁷Nimahsela unaute u, in hotute pawhin an at avanga an tih ang khan, in at avangin he'ng hi in ti a ni tih ka hria e.

¹⁸Nimahsela Pathianin zawlnei zawng zawng kaan, a Krista-in hrehawm a tuar tur thu a hriattir lawk kha, khati khan a thlentir ta a ni.

¹⁹Chuvangin in sualte thai bo a nih theihna'n sim u la, hawi kir leh rawh u, chutichuan Lalpa hnen ata harh unte a lo la thleng thei ang a,

²⁰Krista Isua, in tana a ruat pawh kha, a rawn tir thei ang;

²¹Amaherawhchu, engkim siamthat hun a thlen hma loh zawng vanin ani chu a kawl rih tur a ni; chu mi siamthat tur thu chu Pathianin leilung pian tirh ata a zawlnei thianghlim awmte kain a sawi tawh kha,

²²Mosia ngeiin, 'Lal Pathianin keimah mi siam ang hian in unaute zingah zawlnei pakhat a siamsak ang che u; ani chuan thu zawng zawng in hnena a sawi apiang chu in ngaihthlaksak ang;

²³tin, mi tupawh, chu zawlnei thu chu ngaihthlaksak lo apiang mi zing ata tihboral daih an ni ang,' a tih kha.

²⁴A ni, Samuela awm achin zawlnei zawng zawng, an hnunga mite nen, thu sawi apiang kha, tun lai chanchin hi an hril lawk bawk thin.

²⁵Nangni hi zawlneite leh thuthlung fate in ni a sin; Pathianin Abrahama hnenah, 'I thlah avangin khawvela hnam tin an thawveng ang,' tiin in thlahtute hnenah a tiam kha.Pathianin a Chhiahhlawh chu a ruat a, in sualte hawisantir theuhin malsawmsak tur che uin, nangmahni hnenah a rawn tir hmasa ber a nih hi," a ti a.

²⁶Pathianin a Chhiahhlawh chu a ruat a, in sualte hawisantir theuhin malsawmsak tur che uin, nangmahni hnenah a rawn tir hmasa ber a nih hi," a ti a.