Read Baibul, Mizo Tirhkohte 4 Bible Online

Tirhkohte 4 - Baibul, Mizo bible

Tirhkohte 4

¹Tin, Petera leh Johanan mite hnena thu an sawi lai chuan, puithiamho te, biak in hotu te, 1Saddukaiho te chu an hnenah an lo thleng phut a,

²mi an zirtir leh Isua avnga mitthi zing ata thawhleh thu an hrilh avngin an lungni lo em em a.

³Tin, an man a, tlai lam a nih avangin atuk thlengin tan inah an khung ta a.

⁴Nimahsela thu ngaithlahote zinga tam takin an awih a; an tam lam pawh patling hlir pawh sangnga lai an tling a.

⁵Tin, atukah chuan an hotute, upate, lehkhaziaktute,

⁶Puithiam lalber Ana te, Kaiapha te, Johana te, Aleksandra te, Puithiam Lalber chi zawng zawngte pawh Jerusalem khuaah an awm kham a.

⁷Tin, Petera leh Johana chu a laiah an dintir a, "Eng tihtheihnain nge, tu hmingin nge he'ng hi in tih?" an ti a, an zawt a.

⁸Tichuan Petera chu Thlarau Thianghlimin a khat a, an hnenah, "Mi zawng zawng hotute u, upate u,

⁹mi chak lo tihthat thu-ah, 'He mi hi eng vangin nge a lo dam tak?' tiin vawiinah hian min chhuahchhal chuan,

¹⁰nangni zawng zawngin hre rawh u, Israel mi zawng zawng pawhin hre rawh se, Nazareth Isua Krista, kraws-a in khenbeh, Pathianin mitthi zing ata a kaihthawh leh kha, amaha hming ngeiin he mi hi hetah in hmaah damin a ding ta a nih hi.

¹¹Nangni in satute u, in lung paih, a kila lung tangkai ber lo ni ta kha amah hi a ni e.

¹²Mi dang tuma hnenah chhandamna a awm lo; van hnuaia mihring sak zingah, min chhandam tur hming dang reng a awm lo," a ti a.

¹³Tin, Petera leh Johana huaizia chu an hmuhin, lehkha thiam lo, mi mawl tak an ni tih an hriatin mak an ti hle a; Isua hnenah an awm tawh tih an hre ta a.

¹⁴Tin, mi an tihdama chu an hnena ding an hmu a, engmah an sawisel thei si lo.

¹⁵Chutichuan an rorelna ata an kal hrantir hnuin an inrawn a,

¹⁶Heng mite hi engtin nge kan tih ang? thilmak thang tak an ti tih Jerusalem khuaa awm zawng zawngin fiah takin an hriat tak hi; keini pawhin kan hnial teh si lo.

¹⁷Nimahsela mi hnena a puan lehzual theih lohna'n, tun achinah tu hnenah mah he hminga thu an sawi lohna turin i vau ang u," an ti a.

¹⁸Tichuan anni chu an ko a, Isua hminga thu sawi tawp loh tur leh zirtir tawp loh tur an ti tlat a.

¹⁹Nimahsela Petera leh Johanan an hnenah, "Pathian mithmuhin Pathian thu zawm aiin nangni thu zawm a dik zawk emaw chu ngaihtuah rawh u.

²⁰Keini zawng thil kan hmuh leh kan hriatte kha sawi loin kan awm thei lo," an ti a.

²¹Tin, anni chuan an vau lehzual a, an chhuah ta a, mipui avangin hremna remchang an hmu lo; an thiltih avang khan mi zawng zawngin Pathian an chawimawi si a.

²²Thilmaka an tihdama chu kum sawmli aia tam zawk mah a ni si a.

²³Tin, Petera leh Johana chu an chhuahin, anmahni pawlte hnenah an va kal a, puithiam lalte leh upaten an hnena an sawi apiang chu an hrilh vek a.

²⁴Chutichuan a ngaithlatute chuan arualin aw ring takin Pathian hnenah, "Lalpa, nang van te, lei te, tuifinriat te, a chhunga awmte zawng zawng Siamtu i ni;

²⁵nangin Thlarau Thianghlimin, min thlahtu i chhiahhlawh Davida kain, he'ng thu hi i sawi a ni: 'Jentailte engati nge an thinur kha? Hnam tinin engati nge thil sawt lo an ngaihtuah?

²⁶Khawvel lalten an ep huai huai a, hotute pawh an pungkhawm a, Lalpa leh a Krista chungah chuan,' tiin.

²⁷He khuaah hian i Chhiahhlawh thianghlim i hriak thih Isua chungah khan, Heroda leh Pontia Pilata nen, Jentailte leh Israel mite nen an pungkhawm tak zet a ni,

²⁸i kut leh i rilruin lo thleng tura a ruat lawk apiang kha ti turin.

²⁹Tichuan, tunah Lalpa an mi vauziate hi ngai teh; i bawihte hi huai takin i thu hriltir la,

³⁰mite tidam turin nangin i kut phar ang che; i chhiahhlawh thianghlim Isua hming avangin chhinchhiahna leh thilmak takte tihtir bawk ang che," an ti a.

³¹Tin, an tawngtai zawhin an awmkhawmna chu a lo nghing a, an zain Thlarau Thianghlimin an lo khat a, huai takin Pathian thu an hril ta a.

³²Tin, a ringtu mipuite chu rilru hmun khat leh ngaihtuah hmun khatin an awm a: an zinga pakhat mahin an sum neih, "Ka ta bik a ni," an ti lo; thil zawng zawng an intawm zawk thin.

³³Tin, tirhkohte chuan awihawm takin Lal Isua thawh leh thu an hriattir thin a; an zaa chungah khawngaihna nasa tak a awm a.

³⁴Tin, an zingah pawh tlachham tumah an awm lo; ramte, inte nei apiangin an hralh a, an thil hralhte chu a man an rawn keng a,

³⁵tirhkohte ke bulah an dah thin a; an chakkhai daih tawk theuhin an sem theuh thin a.

³⁶Tin, Josefa, tirhkohten Barnaba an tiha chu, (chu mi hming awmzia chu, "Thlamuanna Fa," tihna a ni a,) Levia chi, Kupra thliarkara mi a ni a,a lo neih chu hralhin a man a rawn keng a, tirhkohte ke bulah a dah ta a.

³⁷a lo neih chu hralhin a man a rawn keng a, tirhkohte ke bulah a dah ta a.