Read Baibul, Mizo Tirhkohte 5 Bible Online

Tirhkohte 5 - Baibul, Mizo bible

Tirhkohte 5

¹Nimahsela mi pakhat a hming Anania, a nupui Saphiri nen an awm a; Anania chuan ram a hralh a,

²a nupui hriatin a man a then a zep ta a; tin, a then a rawn keng a, tirhkohte ke bulah chuan a dah a.

³Nimahsela Petera'n, "Anani, Thlarau Thianghlim bum tur leh, ram man a then zep turin engati nge Setanan i thinlung a tihkhah le?

⁴A awm chhung zawng khan i ta a ni reng lo em ni? i hralh hnu pawh khan i thu thuin a awm lo em ni? Engti nge he'ng thu hi i rilrua i ngaihtuah? Mihring bum i ni lo e, Pathian bum i ni zawk e," a ti a.

⁵Tin, Anania chuan chung thu chu a hriat veleh a tlu a, a thi ta a; tin a hria apiangin an hlau ta em em a.

⁶Tin, tlangvalhote chu an tho a, an tuam a, an zawn chhuak a, an phum ta a.

⁷Tin, darkar thum lai emaw chinah chuan a nupui chu, thil awmzia chu hre loin a lut a.

⁸Tin, Petera'n a hnenah, "Mi hrilh rawh, ram chu heti zat chauhin maw in hralh?" a ti a. Tin, ani chuan, "Aw, heti zat chauh hian a ni," a ti a.

⁹Tin, Petera'n a hnenah, "Engati nge Lalpa Thlarau fiahna'n in inthurual ni? Ngai teh! I pasal phumtute kephah chu kawngka bulah a lo awm ta, nang pawh an zawn chhuak ang che," a ti a.

¹⁰Tin, thawklehkhatan a ke bulah chuan a tlu ta nghal a, a thi ve ta a; tin, tlangvalhote chu an lo lut a, ani chu thiin an rawn hmu a, an zawn chhuak a, a pasal kiangah chuan an phum ta a.

¹¹Tin, kohhranhote zawng zawng leh chung thu hria apiangte chuan an hlau ta em em a.

¹²Tin, mi zingah Pathianin tirhkohte kutin chhinchhihna leh thilmak tam tak a ti thin. Tin, anniho chu an zain rilru hmun khatin Solomona Hulhliapah chuan an inkhawm thin a.

¹³Mi dang erawh chu tumah an zingah an tel ve ngam ta lo a; nimahsela miin anniho chu an fak si thin.

¹⁴Tin, a ring tharho hmeichhia leh mipa tam takin Lalpa hnenah chuan an rawn belhchhah lehzual thin a;

¹⁵chutichuan mi damlote pawh kawtthlerahte an zawn chhuak a, khumahte, awngphahahte an muttir a, Petera kal pahin a hlim talin athen azar a hliah theihna'n, an ti a.

¹⁶Tin, Jerusalem khaw kiang vel khua ata mipuite pawh chu damlote, ramhuai bawlhhlawh sawisakte rawn hruaiin an lo kal khawm a; chungte pawh chu an lo dam ta theuh a.

¹⁷Tin, Puithiam Lalber leh a thiante zawng zawng an lo thawk a (chung a thiante chu Saddukai pawl an ni a), an itsik em em a,

¹⁸tirhkohte chu an man a, vantlang tan inah an khung ta a.

¹⁹Nimahsela zanah Lalpa vantirhkoh pakhatin kawngkharte chu a rawn hawng a, a hruai chhuak a,

²⁰Pathian biak inah va ding u la, mi hnenah he'ng Nunna thu zawng zawng hi va sawi rawh u," a ti a.

²¹Tin, chu thu chu an hriatin khawvar hun lai velin Pathian biak inah chuan an va lut a, an zirtir ta a. Nimahsela Puithiam Lalber leh a thiante chu an lo kal a, roreltuho leh Israel thlahte upaho zawng zawng an ko khawm a, tirhkohte chu rawn hruaitir turin tan inah chuan mi an tir a.

²²Nimahsela tiangkengtute chu an va kal a, tan inah chuan anni chu an hmu si lo; tichuan an kir leh a,

²³Tan in chu him taka inkharin, a vengtute pawh kawngkhar bulah dingin kan hmu si a; nimahsela kan han hawng a, a chhungah tumah kan hmu si lo!" tiin an hrilh a.

²⁴Tin, Pathian biak in hotu leh puithiam lalten, chung thu chu an hriatin, "Heng hi eng ti takin puang ang maw?" tiin an thu-ah chuan an mangang ta em em a.

²⁵Tin, mi pakhat a lo kal a, an hnenah, "Ngai teh u, tan ina mi in khungte khan Pathian biak inah dingin mi an zirtir ka ti!" tiin a rawn hrilh a.

²⁶Tichuan hotu chu tiangkengtute nen chuan an va kal a, vantlang an hlauh avangin tlang takin an rawn hruai a, chutilochuan lunga den an hlau a.

²⁷Tin, an rawn hruai thlen chuan roreltuho hmaah chuan an dintir a. Tin, Puithiam Lalber chuan an hnenah.

²⁸He hming hian zirtir loh tur kan tih tlat tawh che u kha; hre rawh u, in thu zirtirin Jerusalem khua in tihkhah vek tawh hi, chu mi tihhlum bul chu tumtir min tum a nih hi le," tiin a chhal a.

²⁹Nimahsela Petera leh tirhkohte chuan "Mihring thu aiin Pathian thu kan zawm zawk tur a ni.

³⁰Nangni'n Isua thingah khai kangin in tihhlum kha, min thlahtute Pathianin a kai tho leh ta a ni.

³¹Amah ngei kha Pathianin Lalah leh Chhandamtua awm atan a ding lamah a chawimawi ta a, Israelte sual simtir tur leh ngaidam turin.

³²Chung thu chu a hretute kan nih hi; Thlarau Thianghlim, Pathianin a thu zawm apiangte hnena a pek kha, a hretu a ni ve bawk a," an ti a, an chhang a.

³³Tin, anni chuan chung thu chu an hriatin an thin a khei ta em em a, tihhlum an tum ta a.

³⁴Nimahsela roreltute zingah chuan a hming Gamaliela, Pharisai, Dan hretu, mi zawng zawng zinga hmingthang tak mi pakhat chu a ding a, chu mite chu chhuahtir rih tur thu a pe a.

³⁵Tin, roreltute hnenah chuan "Nangni Israel mite u, he mite chunga in thil tih tum hi fimkhur rawh u.

³⁶Tun hma pawh kha, Theoda, 'Mi lian ka ni,' tiin a lo awm a; chu mi hnenah chuan mi tam tak, zali lai an lo pakai a; ani chu tihhlumin a awm ta a; a thu zawm apiang an zain an darh ta vek a, engmah an ni tawh lo.

³⁷Chu mi awm hnu-ah chuan hming ziak lai khan, Galili rama mi Juda kha a lo awm leh a; a hnenah mi thenkhat a hip leh a; nimahsela ani pawh chu a thi ta a, a thu zawm apiangte chu an zain an darh ta vek mai a.

³⁸Chuvangin tunah ka ti a che u, he'ng mite hi tawk suh u la, awm mai rawh se; he'ng an thiltih tum leh an thiltih hi mihring tihchhuah mai a nih chuan a boral ang;

³⁹amaherawhchu Pathian tihchhuah a nih chuan anmahni in tiboral thei lo ang; chutilochuan Pathian do in lo ni hlauh dah ang e," a ti a.

⁴⁰Tin, a sawi chu rem an ti ta a; tichuan tirhkohte chu an ko a, an vel a; an velh zawhin, Isua hminga thu sawi loh tur ti tlatin an thlah ta a.

⁴¹Chutichuan roreltute zing ata an kal chhuak a, chu Hming avang chuan mualpho tuar tlaka ruat an nih avangin an lawm hle a.Tin, ni tin Pathian biak inah leh anmahni inahte, "Isua chu Krista a ni," tiin zirtir leh hrilh an bang chuang lo.

⁴²Tin, ni tin Pathian biak inah leh anmahni inahte, "Isua chu Krista a ni," tiin zirtir leh hrilh an bang chuang lo.