Read Baibul, Mizo Tirhkohte 7 Bible Online

Tirhkohte 7 - Baibul, Mizo bible

Tirhkohte 7

¹Tin, Puithiam Lalber chuan, "Heng thu hi a dik em?" a ti a.

²Tin, Stephana chuan, "Unaute u, pate u, ngai teh u, min thlahtu Abrahama, Haran khuaa a awm hmaa Mesopotamia rama a awm lai khan, Ropuina Pathian chu a hnenah a rawn inlar a,

³a hnenah, 'I khaw lam leh i chiteho zing ata chhuak la, ram ka la entir tur che lamah kal rawh,' a ti a.

⁴Tin, ani chu Kaldaiho ram ata a kal chhuak a Haran khuaah a va awm ta a; tin, a pa a thih hnuin chuta tangin hei tuna in awmna khaw lamah hian Pathianin a pem luhtir a.

⁵Tin, hetah hi chuan engmah hmun luah tur, a ke nghahna tham pawh a pe lo a; nimahsela amah leh a hnua a thlahte thlenga ro turin pek a tiam a, fa a la neih hma pawhin.

⁶Tin, Pathianin hetiangin a sawi: 'A thlahte mi ram lamah kum zali an thang ang a, min bawihah an siam ang a, an tiduhdah bawk ang,' tiin.

⁷Tin, Pathian in 'A bawihtu turte hnam chu keimahin ka la ngaihtuah ang a, tin, chu mi zawhah chuan an lo chhuak ang a, he mi hmunah hian ka rawng an la bawl ang,' a ti bawk a.

⁸Tin, Pathianin a hnenah serhtan thu kha a thlung a; chutichuan Abrahama chuan Isaaka a hring a,a ni riat niah a serh a tan a; tin,Isaaka chuan Jakoba a hring a, tin, Jakoba chuan chi thlahtu sawm leh pahnihte kha a hring a.

⁹Tin, chi thlahtute khan Josefa an itsik a, Aigupta ram lamah an hralh a; nimahsela Pathian a hnenah a awm a,

¹⁰a hrehawm tuar zawng zawngah a chhan chhuak zel a, Aigupta ram lal Pharaoa pawh a khawngaihtir a, mi fing tak a ni tih a hriattir bawk a; tichuan ani chuan Aigupta ram leh a ina mi zawng zawng chungah hotuah a siam ta a.

¹¹Tin, Aigupta leh Kanaan ram zawng zawngah chuan tam a lo tla a, hrehawm nasa tak a lo thleng ta a; min thlahtute chuan ei tur reng reng an hmu ta lo a.

¹²Nimahsela Jakoba chuan Aigupta ramah buh a awm tih a hriat veleh min thlahtute chu a tir chhuak a; chu chu an kal tantirhna ber a ni.

¹³Tin, an kal vawi hnihnaah chuan Josefa chu a unaute hnenah chuan a inhriattir a; tin, Josefa unaute chu Pharaoa an hriattir ta a.

¹⁴Tin, Josefan a pa Jakoba leh a unau zawng zawng a kohtir a; anmahni chu sawmsarih leh panga an ni a.

¹⁵Tichuan Jakoba chu Aigupta ramah a zuk kal a; tin, ani leh min thlahtute chu an thi ta a,

¹⁶Sukem khua an zawn thleng a, Abrahama'n Sukem khuaa Hamora fapate laka thlan a tangka suma a leiah khan an zalh ta a.

¹⁷Tin, Pathianin Abrahama hnena thu a tiam kha a thlen hun chu a lo thlen dawnin, mite chu Aigupta ramah chuan an lo pung a, an lo tam ta deuh deuh a,

¹⁸Josefa hre lo lal dang a lo awm thleng khan.

¹⁹Chu mi chuan kan chite a ngamthlem a, min thlahtute chu a tiduhdah a, an nausente nung lo turin a paih chhuahtir thin a.

²⁰Chu mi lai chuan Mosia a lo piang a, a hmel a tha em em mai a; a pa inah thla thum an chawm a;

²¹tin, an paih chhuahin Pharaoa fanuin a la a, ama fa atan a chawm ta a.

²²Tin, Mosia chu Aigupta rama mite finna zawng zawng an zirtir a, a thu-ah leh a thiltihah a ropui em em a.

²³Tin, ani chu kum sawmli a tlin dawn laiin a unau, Israela thlahte chu kan a tum a.

²⁴Tin, an zinga mi pakhat tihretheih tuar lai a hmu a, a chhan a, tihduhdah tuartu phuba chu a la a, Aigupta mi chu a tihlum ta a.

²⁵Mosia chuan ama kutin Pathianin anmahni a chhanhim tih a unauten an hria emaw a ti a, nimahsela an hre si lo.

²⁶Tin a tukah an zinga mi pahnih an insuallaiin an hnenah a lo thleng a, 'Pute u, unau in ni alawm; engati nge dik lo taka in intih?' tiin rem a tum a.

²⁷Nimahsela a thenawm chunga kawhmawhbawltu zawk chuan Mosia a nam kiang a, 'Kan chungah hotuah leh roreltuah tuin nge siam che?

²⁸Nimina Aigupta mi i tihhlum ang khan mi tihhlum i tum a ni maw?' a ti a.

²⁹Tin, chu mi thu avang chuan Mosia a tlan bo a. Midian ramah a thang reng a, chutah chuan fapa pahnih a nei a.

³⁰Tin, kum sawmli a vei hnuin Sinai Tlang thlalerah, hnimbukah, mei alh zingah vantirhkoh pakhat a hnenah a lo inlar a.

³¹Tin, Mosia'n a hmuh chuan a thil hmuh chu mak a ti em a; tin, a en tura a va hnaih laiin Lalpa awin,

³²'Kei i thlahtute Pathian ka nih hi, Abrahama Pathian, Isaaka Pathian, Jakoba Pathian chu,' a lo ti a. Tichuan Mosia chu a khur a, a en ngam ta lo a.

³³Tin, Lalpa chuan a hnenah, 'I kephah ata i pheikhawk kha phelh rawh; i dinna hmun kha lei thianghlim a ni e.

³⁴Aigupta rama ka mi awmte chu an hrehawmzia ka hmu reng a sin, an rum pawh ka hre reng a, anmahni chhanhim turin ka lo chhuk ta a ni. Hawh teh, Aigupta ramah ka tir ang che,' a ti a.

³⁵Chu Mosia, 'Hotu leh roreltuah tuin nge siam che?' tia an hnar chu, hnimbuka vantirhkoh a hnena inlar khan a pui a, Pathianin amah ngei chu hotu leh chhanhimtu ni fawm turin a tir a ni.

³⁶Ani chuan Aigupta ramah te, Tuifinriat Senah te, thlalerah te chuan kum sawmli chhungin thilmak leh chhinchhiahnate a hmuhtir zet a, anmahni a hruai chhuak ta a.

³⁷Israela thlahte hnena, 'Pathianin keimah mi siam ang hian, in unaute zinga mi zawlnei pakhat a siamsak ang che u,' titu kha a ni, chu Mosia chu.

³⁸Chu mi chu thlalera mi pung zinga Sinai tlanga a betu vantirhkoh hnenah leh min thlahtute hnena awm kha a ni; chu mi chu min pek chhawn tura thu nungte chu latu kha a ni;

³⁹min thlahtute chuan a thu an zawm duh lo a, an hnar a, an rilrute chu Aigupta ram lamah a let leh ta a.

⁴⁰Arona hnenah, 'Kan hma hruai turin pathiante min siamsak rawh; he Mosia Aigupta ram ata min hruai chhuaktu lah hi a chanchin kan hre ta si lo a,' an ti a.

⁴¹Tin, chung lai chuan sebawng no lem an siam a, a lem chu ran talhin an bia a, anmahni kut chhuak chungah chuan an hlim ta a.

⁴²Chutichuan Pathianin a hawisan a, vana arsiho chibai an buk theihna turin anmahni a ensan ta a; Zawlnei lehkhabua, 'Israel chite u, thlalerah khan kum sawmli chhungin sa talh leh ran talhin kei mi bia em ni?

⁴³Moloka puan in leh pathian Rephana arsi pawh chu, chibai buk turin a lem in siamte kha, in zawn zawk thin a; chuvangin, Babulon khaw piah lamah ka hruai bo ang che u,' tih ziak ang kha.

⁴⁴A lem a hmuh anga siam tura Mosia hrilhtuin a ruat ang khan, min thlahtuten thlalerah khan hriattirna puan in chu an nei a.

⁴⁵Chu bawk chu min thlahtute thleh leh pawhin an nei chhawng zel a, Pathianin min thlahtute hmaa Jentail a hnawh chhuahteho ram an luah lai khan Josua luh rualin an luhpui a; Davida lo awm thleng khan chutah chuan a awm ta reng a.

⁴⁶Chu Davida chu Pathian mithmuhin duhsak tlakin a awm a, Jakoba Pathian tan awmna siamsak a dil a.

⁴⁷Nimahsela Solomonan in chu a saksak ta zawk a ni.

⁴⁸Nimahsela Chungnungbera chu kuta sak inahte a awm ngai lo; zawlnei chuan:

⁴⁹Lalpain, 'Van ka thutphah a ni a, lei ka kephah nghahchhan a ni: in eng angin nge mi saksak ang? Ka chawlhna hmun pawh eng nge ni?

⁵⁰Keima kutin he'ng thil engkim hi ka siam lo em ni?' a ti e, tia a sawi ang khan.

⁵¹Mi tihmawh, thinlung leh beng tan lohte u, kumkhuain Thlarau Thianghlim in dodal fo e; in thlahtute tih ang zel khan in ti thin.

⁵²In thlahtuten zawlneite zingah tu nge an tihduhdah loh ni? Mi Fel tak lo kal tur thu hril lawktute kha an tihlum a; chu Mi Takzet chu mantirtu leh thattute nangmahni hi tunah in ni a sin

⁵³Dan, vantirhkohte pek chhawn kha, hmu zeta zawm si lote u!" a ti a.

⁵⁴Tin, chung thu chu an hriatin an thin a khei ta a, Stephana chungah chuan an ha an thial a.

⁵⁵Nimahsela ani chu Thlarau Thianghlima khat a ni a, van lam a en tlat a, Pathian ropuizia leh Pathian ding lama Isua ding a hmu a;

⁵⁶Ngai teh u, van inhawngte ka hmu a, Pathian ding lama Mihring Fapa ding pawh ka hmu," a ti a.

⁵⁷Chutichuan anni chu aw ring takin an au a, an beng an hup a, rual takin an bei chiam a,

⁵⁸khua ata chu an hnawt chhuak a, lungin an deng a, a hretute chuan tlangval pakhat a hming Saula ke bulah chuan an puante an dah hlawm a.

⁵⁹Chutichuan, Stephanan "Lal Isu, ka thlarau la ang che," tia Lalpa a koh laiin lungin an deng ruih ruih a.Tin, a thingthi a, aw ring takin a au a, "Lalpa, hei an thil tihsual hi an chungah mawh phurhtir suh ang che," a ti a. Tin, chu thu chu a sawi zawh veleh a muhil ta a. Saula pawh chuan a thih chu a remti a.

⁶⁰Tin, a thingthi a, aw ring takin a au a, "Lalpa, hei an thil tihsual hi an chungah mawh phurhtir suh ang che," a ti a. Tin, chu thu chu a sawi zawh veleh a muhil ta a. Saula pawh chuan a thih chu a remti a.