Read Baibul, Mizo Tirhkohte 8 Bible Online

Tirhkohte 8 - Baibul, Mizo bible

Tirhkohte 8

¹Tin, chu mi ni chuan kohhran, Jerusalem khuaa awmhote chu nasa takin an tiduhdah tan ta a; tichuan tirhkohte chauh lo chu Judai leh Samari ram khaw tinah an darh ta vek a.

²Tin, Pathian ngaihsak tuten emaw Stephana chu an phum a, nasa takin an tah a.

³Saula erawh chuan kohhranhote a tiduhdah em em a, in tinah a lut a, a hmei a pain a hnuk chhuak a, tan inah a khung thin.

⁴Tin, a darhte chu khaw tinah an kal a, thu chu an hril zel a.

⁵Tin, Philipa chu Samari khuaah a zuk kal a, an hnenah Krista thu a tlangaupui a.

⁶Tin, ramhuai bawlhhlawhte chu mi tam tak an manate kawchhung ata aw ring taka auva an chhuah avang leh zeng leh kebai tam takte pawh an lo dam tak avangin,

⁷mipuiten a thu an hriata a thilmak tihte an hmuhin, Philipa thusawi chu rilru hmunkhatin an ngaihsak a,

⁸Tin, chu mi khuaah chuan nasa takin an lawm ta a.

⁹Tin, a hming Simona, mi pakhat a awm a; ani chuan, "Mi lian ka ni," tiin hmanah chu mi khuaah chuan dawi hmangin Samari khuaa mite mak ti takin a siam thin a;

¹⁰mi zawng zawng chuan mi chhe ber atangin lal ber thlengin, "He mi hi Pathian thiltihtheihna, Ropui an tih kha, a nih hi," tiin a thu an ngaihsak hlawm thin a.

¹¹A dawi hmangin rei tak mak ti taka a siam thin avangin a thu an ngaihsak thin a ni.

¹²Nimahsela anni chuan Pathian ram chanchin tha leh Isua Krista hming chanchin tha Philipa hrilh chu an awih veleh ahmei apain baptisma an chang ta a.

¹³Tin, Simona meuh pawhin a awih ve ta a; tin, baptisma a chan zawhin Philipa hnenah a awm reng a, chhinchhiahna leh thilmak nasa tak tihte a hmu a, mak a ti hle mai thin a.

¹⁴Tin, tirhkoh Jerusalem khuaa awmte khan Samari khuaa mitten Pathian thu an awih tih an hriatin, an hnenah Petera leh Johana chu an tir a;

¹⁵chu mite chu an zuk thlen chuan Thlarau Thianghlim an hmuh theihna'n an tawngtaisak a.

¹⁶Chu mi hma chuan an zingah tuma chungah a la thleng lo; Lal Isua hmingin baptisma an chang chauh a la ni.

¹⁷Tin, tirhkohte chuan an chungah an kut an nghat a, Thlarau Thianghlim an hmu ta a.

¹⁸Tin, tirhkohte kut nghah avanga Thlarau Thianghlim pek a ni tih Simona'n a hmuhin an hnenah tangka pek a tum ta a.

¹⁹Hetiang thuneihna hi mi pe ve rawh u, tu chungah pawh kut ka nghahna apiangin Thlarau Thianghlim an hmuh vena'n," a ti a.

²⁰Nimahsela, Petera'n a hnenah, "I tangka hi i boral rualin boral ve rawh se, Pathian thilpek tangka suma lei i tum avangin.

²¹Heng thu-ah hian i tel ve lo e, chan pawh i nei hek lo; i rilru Pathian ngaihin a fel lo e.

²²Chuvangin, i sual hi sim la, Lalpa hnenah tawngtai rawh, chutichuan i rilrua i ngaihtuah hi a ngaidam mahna che.

²³Awhna sual nasa tak phuarin i awm tih ka hria e," a ti a.

²⁴Tin, Simonan, "In thil sawi hi engmah ka chunga a thlen lohna'n nangnin Lalpa hnenah mi tawngtaisak rawh u," a ti a, a chhang a.

²⁵Chutichuan anni chuan Lalpa thu chu an hriattira an sawi zawhin, Jerusalem khuaah an haw leh a; Samari rama mite khaw tam tak hnenah Chanchin Tha chu an hril zel a.

²⁶Tin, Lalpa vantirhkoh pakhatin Philipa chu a bia a, "Tho la, chhim lama Jerusalem khua atanga Gaza khaw zuk chhun kawngah khan kal rawh; chu mi kawng chu thlalerah a kal tlang a ni," a ti a.

²⁷Tichuan, a tho a, a kal ta a. Tin, ngai teh, Ethiopia rama mi pakhat, Ethiopia lalnu Kandaki hnuaia mi tilreh lal tak, a ro zawng zawng enkawltu, Jerusalem khuaah Pathian be turin a han kal a;

²⁸a haw lam chuan a tawlailira thu chungin zawlnei Isaia lehkhabu a chhiar zel a.

²⁹Tin, Thlarau chuan Philipa hnenah, "Saw tawlailir saw va hnaih la, va pawl rawh," a ti a.

³⁰Tin, Philipa chu mi tilreh hnenah chuan a va tlan a, zawlnei Isaia lehkhabu a chhiar a hria a, "I chhiar kha a awmzia i hria em?" a ti a.

³¹Tin, ani chuan, "Tuma mi hrilhfiah lohin engtin nge ka hriat thei ang?" a ti a. Tin, a hnena thu chhuak turin Philipa chu a sawm ta a.

³²Tin, Pathian Lehkha a chhiar lai chu hei hi a ni: "Talh turin beram angin ani chu an hruai a; beram no a hmul mettu hmaa a ngawi reng angin Ani pawhin a ka a ang lo;

³³A tlawm laiin a chungah thu rel an phal lo; A thlahte chanchin tuin nge la hril ang? Khawvel atangin a nun an laksak si a," tih hi.

³⁴Tin, mi tilreh chuan Philipa a bia a, a hnenah, "Zawlneiin he'ng thu hi tu thu nge a sawi, ama thu nge mi dang thu? ka zawt a che," a ti a.

³⁵Tin, Philipa chuan a sawi a, chu Pathian Lehkha thu chu a bulah a tan a, a hnenah Isua thu a hrilh a.

³⁶Tin, kalkawnga an kal laiin tui eng emaw an thleng a; tin, mi tilreh chuan, "En teh, heta hi tui a awm, baptisma channa tur engin nge mi dal kher?" a ti a.

³⁷Tin, Philipa chuan, "I thinlung zawng zawnga i rin chuan, i chang thei e," a ti a. Tin, ani chuan, "Isua Krista chu Pathian Fapa a nih ka ring," tiin a chang a.

³⁸Tin, tawlailir chu a dintir a, an pahnihin, Philipa leh mi tilreh chu tuiah chuan an zuk kal dun a; tin, Philipa chuan ani chu a baptis ta a.

³⁹Tin, tui ata an chhuah chhoh veleh Lalpa Thlarau chuan Philipa chu a la bo ta a; tin, mi tilreh chuan ani chu a hmu leh ta lo, hlim taka a kal tak zel avangin.Nimahsela Philipa chu miin Azota khuaah an hmu leh ta a; tin, a kal tlang a, Kaisari khaw thlengin khaw tinah Chanchin Tha chu a hril zel a.

⁴⁰Nimahsela Philipa chu miin Azota khuaah an hmu leh ta a; tin, a kal tlang a, Kaisari khaw thlengin khaw tinah Chanchin Tha chu a hril zel a.