Read Baibul, Mizo Rom 1 Bible Online

Rom 1 - Baibul, Mizo bible

Rom 1

¹Paula, Isua Krista bawih, tirhkoh ni tura koh, Pathian Chanchin Tha hril tura tihhrana chuan,

²chu Chanchin Tha, a Fapa kan Lalpa Isua Krista thu chu, Pathianin hman laiin a Lehkha thianghlimah chuan a zawlneite kain a tiam tawh a;

³ani chu tisa lam thu-ah chuan Davida thlaha piang a ni a,

⁴thianghlimna thlarau lam thu-ah erawh chuan mitthi zing ata a thawhlehna chuan Pathian Fapa a nih nasa takin a hriattir a;

⁵a hming avanga rinna chu hnam tin zinga mi awihtir turin, amah avang chuan khawngaihna leh tirhkoh nihna kan chang ta;

⁶chung zingah chuan nangni pawh Isua Krista kohte in ni a.

⁷Rom khuaa Pathian duh tak, mi thianghlima awm tura kohte zawng zawng hnenah: Pathian, kan Pa leh Lal Isua Krista hnen ata khawngaihna leh remna in hnenah awm rawh se.

⁸Khawvel zawng zawngah in rinna thu a than avangin in zaa chunga ka lawmna thu Isua Krista zarah ka Pathian hnenah ka sawi hmasa rih a ni.

⁹Ka tawngtainaahte chuan bang loin in hming ka lam fo a,

¹⁰tunah tal hian in hnena ka lo kalna turin Pathian thu thua zin hun remchang ka hmuh hram hram theihna'n ka dil thin tih, a Fapa Chanchin Thaa ka thlarauva a rawng ka bawl thin Pathian chu a hretu a ni si a.

¹¹In nghehna tura thlarau lam thilpek eng emaw ka pek theihna tur che uin hmuh ka chak hle si che u a;

¹²chu chu in rinna leh ka rinnain kan inthlamuan tawn theihna tur, ka tihna a ni.

¹³Tin, unaute u, Jentail dangte hnena ka thawh rim rah ka hmuh tawh ang bawkin, nangni zingah pawh rahte ka hmuh theihna turin in hnenah vawi tam tak lo kal ka tum tawh tih inhriat loh ka duh lo a; nimahsela tun hma zawng khan dalin ka awm fo thin a.

¹⁴Grik mite leh Awze mite hnenah bat ka nei; mi fing leh mi finglote hnenah pawh.

¹⁵Chutichuan nangni Rom khuaa awmte hnenah pawh Chanchin tha ka theihtawpa hril turin ka inpeih reng a ni.

¹⁶Chanchin Tha chu ka zahpui si lo a; tupawh a ring apiangte tan chhandamna tura Pathian thiltihtheihna a ni si a; atirin Juda mi tan a ni a, tin, Grik mi tan pawh a lo ni leh a.

¹⁷Chu miah chuan rin lehzualna'n, rinnain Pathian felzia chu a lo lang a, "Mi fel chu rinnain a dam ang," tia ziak ang khan.

¹⁸Thu tak fel lo taka daltute Pathian ngaihsak lohna leh fel lohna zawng zawng chungah chuan van atangin Pathian thinur a lo lang a ni;

¹⁹Pathianin a hriattir tawh avangin Pathian chanchin hriat tur mi chu an rilruah hriattirin a awm si a.

²⁰A thil hmuh theih loh (a chatuan thiltihtheihna leh a Pathianzia chu) khawvel siam tirh ata fiah taka hmuhin a awm a, thil siamah chuan a lang a ni; chuvang chuan chhuanlam tur an nei lo;

²¹Pathian hre siin Pathian angin an chawimawi lo a; lawmthu pawh an sawi hek lo; thil lawilo an ngaihtuah ta zawk a, an thinlung a chu a lo thim ta a.

²²Finga inngaiin mi aah an lo chang a,

²³thi thei lo Pathian ropuina chu thi thei mihringte leh sava te, fuliafa te, rannung te lem angah an chantir ta a.

²⁴Chuvngin an taksa zahthlak taka insiamtawn turin an thinlung chakzawng anga thil bawlhhlawh tih phalin Pathianin a hawisan a ni.

²⁵Pathian thutak chu dawta chantirin, a Siamtu biak aiin a siama chu biain a rawng an bawl ta zawk si a. A Siamtu chu chatuana fak tlak a ni. Amen.

²⁶Chu mi avangin Pathianin zahthlak taka hur phalin a hawisan a; an hmeichhiate meuh pawhinan awm dan pianpui chu dan lo anga awm turin an intidanglam si a;

²⁷mipate pawhin hmeichhe hman dan pangngai bansana hurin an init a, mipa leh mipa tha lo takin an inti a, an sual man hmuh tur chu anmahniah an hmu a.

²⁸Tin, Pathian hriat an duh loh avangin, thil mawi lote ti tura a duh lohzawng rilru neih phalin Pathianin a hawisan ta;

²⁹chutichuan fel lohna zawng zawng te, sualna zawng zawng te, duhamna zawng zawng te, suahsualna zawng zawng tein an lo khat a; itsikna te, tualthahna te, inhauna te, bumna te, nungchang that lohna tein an khat a; sesea thu lak hmang te,

³⁰mi rel hmang te, Pathian huatzawng te, intivei te, chapo te, mi uang te, thil sual thar tichhuaktu te, nu leh pa thu awih lo te,

³¹rilru nei lo te, thutiam bawhchhetu te, hmangaihna pianpui nei lo te, khawngaihna nei lo te an lo ni a;chutianga thil titute chu thi zia reng an ni tih Pathian ruat chu hre rengin, anmahni changa ti pawh ni loin, mi dang ti thinte chungah chuan an lawm bawk thin.

³²chutianga thil titute chu thi zia reng an ni tih Pathian ruat chu hre rengin, anmahni changa ti pawh ni loin, mi dang ti thinte chungah chuan an lawm bawk thin.