Read Baibul, Mizo Rom 14 Bible Online

Rom 14 - Baibul, Mizo bible

Rom 14

¹Tin, rinnaa chak lo mi chu a rinhlelhnate sawisel loin lawm rawh u.

²Mi pakhatin thil engkim ei theiin a inring a, mi chak lo erawh chuan thlai chauh a ei thin.

³Engkim ei mi chuan a ei lo mi hmusit suh se; ei lo mi pawhin a ei mi chu sawisel suh se; Pathianin ani chu a lawm tawh alawm.

⁴Mi dang chhiahhlawh sawiseltu chu tu nge maw i nih le? A din leh a tluk chu ama hotu tan a ni. Nimahsela ani zawng dintirin a awm ang, Lalpa chuan a dintir thei si a.

⁵Mi pakhatin ni khat hi ni dang ai hian a ngaihlu bik thin a, mi dangin ni zawng zawng hi inang theuhin a ngai thin a ni. Mi tin mahni rilruah inhre chiang rawh se.

⁶Ni serhtu chuan Lalpa chawimawina'n a serh thin a ni. Tin, engkim eitu chuan Pathian hnenah lawmthu a sawi avangin Lalpa chawimawina'n a ei thin; a ei lotu pawh chuan Pathian hnenah lawmthu a sawi a, Lalpa chawimawina'n a ei lo thin a ni.

⁷Tumah mahni tana nung kan ni lo a, tumah mahni tana thi kan ni hek lo.

⁸Kan nun chuan Lalpa tan kan nung a; kan thih pawhin Lalpa tan kan thi a ni si; chuvangin kan nun pawhin, kan thih pawhin, Lalpa ta kan ni.

⁹Krista thihna leh a lo nun lehna chhan chu mi nung leh mitthi Lalpa a nih theihna hi a ni si.

¹⁰Nimahsela, nangin engati nge i unau i sawisel ni? A nih loh leh, nangin engati nge i unau i hmuhsit ni? Pathian rorelna thutphah hmaah kan vaiin kan la ding dawn si a;

¹¹Lalpa chuan, 'Mi tinreng ka hmaah an kun ang a, lei tinreng pawh Pathian hnenah a inpuang ang, tiin chhia ka chham a ni,' a ti a," tih ziak a ni si a.

¹²Chutichuan kan zain Pathian hnenah mahni chanchin kan sawi theuh tur a ni.

¹³Chuvangin I insawisel tawh suh ang u, tupawhin mahni unau dalna emaw tlukna emaw siam loh tum zawk rawh u.

¹⁴Amah ngawtah chuan thiang lo engmah reng a awm lo tih Lalpa Isuaah chuan ka hre em em mai, englo thiang loa ngaitu tan erawh chuan amah atan chuan a thiang lo a ni.

¹⁵I englo ei vangin I unau rilru a nat chuan hmangaih dan ang I zawh tawh lo a ni. A thih ai Kristan a thihsaka chu I englo eiin tiboral suh.

¹⁶Chutichuan in tana thatna chu sual lama sawiin awm suh se;

¹⁷Pathian ram chu ei leh in lam thu a ni si lo a, felna te, remna te, Thlarau Thianghlima lawmna te a ni zawk e.

¹⁸Tupawh chung thu-ah chuan Krista rawngbawl chu Pathian lawmzawng leh mihring fakin a awm thin a ni.

¹⁹Chutichuan inremna tur leh intihsawt tawnna tur thilte chu i um ang u.

²⁰I englo ei vangin Pathian hnathawh tichhe suh. Thil zawng zawng a thianghlim ngei mai, nimahsela a englo eiin mi a tihtluk chuan a eitu tan sualna a ni.

²¹I unau tlukna tur a nih chuan sa ei loh te, uain in loh te, thil engpawh tih loh a tha a ni.

²²Rinna i neih chu Pathian hmaah nangmah chauha hriatin nei mai rawh. Mahni tha tih kawnga thiam loh inchantir lo chu a eng a thawl e.Amaherawhchu ringhleltuin a ei chuan rinnain a ei loh avangin thiam loh a chang a ni; engpawh rinna loa tih chu sual a ni si a.

²³Amaherawhchu ringhleltuin a ei chuan rinnain a ei loh avangin thiam loh a chang a ni; engpawh rinna loa tih chu sual a ni si a.