Read Baibul, Mizo Rom 2 Bible Online

Rom 2 - Baibul, Mizo bible

Rom 2

¹Chuvangin, aw mihring, mi sawiseltu tupawh ni mah la, chhuanlam reng i nei lo e; mi dang i sawiselna ngeiah chuan nangmah leh nangmah thiam loh inchantir i ni a sin; nang, sawiseltu pawhin chutiang thilte chu i ti ve thin si a.

²Chutiang thil ti thintute chungah chuan Pathianin a sawiselna chu thu dik tak lam zel a ni tih kan hre si a.

³Aw mihring, chutiang thil ti thinte sawiseltu, nangin chutiang i ti ve bawk si a; Pathianin a sawiselna chu pumpelh i inring em ni?

⁴A nih loh leh, Pathian thatnain simna turin a hruai thin che tih hre loin,a thatna ngahzia leh, a entheihzia leh, a dawhtheihzia te chu i ngainep em ni?

⁵I luhlul leh i thinlung khauh avangin, thinurna leh Pathian rorelna fel tak lo lanna ni atan chuan, i chungah thinurna i inkhawl khawm chawp a ni.

⁶Pathian chuan mi tin an thiltih ang zelin a relsak ang;

⁷thil tha ti fan fana ropuina leh chawimawina leh boral theih lohna zawngtute hnenah chuan chatuan nunna a pe ang;

⁸amaherawhchu kawhmawh bawla thutak zawm lo a, fel lohna zawm zawktute chungah chuan thinurna leh thinrimna te,

⁹hrehawmna leh lungngaihna nasa takte a awm ang, mihring thil tisual apiangte thlarau chungah a awm ang, Juda mi thlarau chungah a awm hmasa ang a, tin, Grik mi thlarau chungah a awm leh ang;

¹⁰amaherawhchu thil tha titu apianghnenah chuan ropuina te, chawimawina te, thlamuanna te pek a ni ang, juda mi hnenah pek hmasak a ni ang a, tin, Grik mi hnenah a ni leh ang a;

¹¹Pathianin mi duhsak bik a nei si lo a.

¹²Tupawh Dan nei loa thil tisual chu, Dan lo bawkin a boral ang; tin, tupawh Dan neia thil tisual chu, Dana rorelin a awm ang.

¹³Dan hretu maite chu Pathian mithmuhin mi fel an ni lo a;

¹⁴Dan nei lo Jentailten mahni thinlung pianpuia Dan thilte chu an tihin, chung chuan Dan nei lo mah se la, anmahni leh anmahni danah an innei chawp si a,

¹⁵an thinlungah Dan thiltih ziak a n itih an entir a, chu chu an chhia leh tha hriatnain a hriatpui a, an rilrute chu a inhnial a, thiam loh a chantir thul a, thiam a chantir thul a.

¹⁶Pathianin, ka Chanchin Tha sawi anga mihringte thuruk Isua Krista hmanga a ngaihtuah niah chuan Dan anga titute chu mi fela chhiarin an awm zawk ang.

¹⁷Nimahsela nang Juda hming pu i ni si a, Dan chu i rin chhan a, Pathian i chhuan a,

¹⁸a duhzawng i hriat a. Dan thua zirtirin i awm avangin thil tha tak chu tha i ti a,

¹⁹Danah chuan finna leh thutak awm dan i neih avangin nang ngei mitdelte hruaitu, thim zinga awmte entu,

²⁰mi fing lote tifingtu, nausente zirtirtu niah i inring a;

²¹chutiang i nih ahnuin, nang, mi dangte zirtirtu, nangmah i inzirtir lo maw? Nang, mi ruk ru lo tura hrilhtu, nangin i ru thin maw?

²²Nang, mi uire lo tura hrilhtu, nangin i uire thin maw? Nang, milem hawtu, nangin milem biak ina thilte i ru thin maw?

²³Nang, Dan chhuangtu, nangin Dan i bawhchhiat avangin Pathian i tihmingchhe thin a ni maw?

²⁴An ziak ang ngei khan Pathian hming chu nangmahni avangin Jentailte zingah tihchhiatin a awm ta a nih hi.

²⁵Dan zawmtu i nih chuan serhtan chu a sawt tak zet a ni; Dan bawhchhetu i nih erawh chuan i serhtan chu tan loh ang mai a lo ni tawh.

²⁶Chuvangin serhtan loh miin Dan thu ruatte a vawn chuan a serhtan loh chu tan anga ngaih a ni dawn lo em ni?

²⁷Tin, mahni pianziaa serhtan lohin Dan chu a zawm kim chuan, nang, lehkha thu leh serhtan Dan nei sia Dan bawhchhetu, a sawisel dawn lo che em ni?

²⁸A lang maia Juda mi ni chu Juda mi tak a ni lo a; alanga tisa maia serhtan chu serhtan tak a ni bawk hek lo.Amaherawhchu alang mai ni loa Juda mi ni chu, Juda mi tak a ni; tin, serhtan tak chu, rilru lama tan a ni, lehkha thu maiah ni loin, thlarauvah a ni; chu mi chuan mihring fak a hlawh lo a, Pathian fak a hlawh zawk a ni.

²⁹Amaherawhchu alang mai ni loa Juda mi ni chu, Juda mi tak a ni; tin, serhtan tak chu, rilru lama tan a ni, lehkha thu maiah ni loin, thlarauvah a ni; chu mi chuan mihring fak a hlawh lo a, Pathian fak a hlawh zawk a ni.