Read Baibul, Mizo Rom 6 Bible Online

Rom 6 - Baibul, Mizo bible

Rom 6

¹Engnge kan sawi tak ang le? Khawngaihna chu a pun lehzual theihna'n sualin kan awm reng dawn em ni?

²Hnai lo e. Keini sual kawnga thi tawh sualin engtin nge kan la nun theih cheu vang?

³Keini zingah Krista Isuaa baptisma chang apiangte chu a thihnaah baptisin kn awm tih in hrelo emaw ni.

⁴Chuvangin a thihnaah baptisma kanchanin, a hnena phum vein kan awm; Pa ropuinain mitthi zing ata Krista a kaihthawh ang khan, keini pawh nunna tharin kan awm theihna'n.

⁵A thihna anpuiin amah nen kan inzawm tawh si chuan a thawhlehna anpui pawhin kan inzawm bawk ang.

⁶Heng hi hria i la: kan mihring hlui chu a hnenah khenbehin a awm ve ta, sual pu taksa chu tihborala a awm theihna'n, tun achinah sual bawiha kan awm lohna turin.

⁷Tupawh thi tawh chu sual lakah a chhuak tawh si a.

⁸Tin, Krista hnena kan thih ve tawh chuan a hnenah kan nung ve bawk ang tih kan ring a ni;

⁹Krista chu mitthi zing ata kaihthawhin a awm a, a thi leh dawn tawh lo tih kan hre si a; thihna chuan ama chungah thu a nei tawh lo.

¹⁰A thihna chu sual lam kawngah chatuan atan vawi khat chauh a thi a ni, a nunna erawh chu Pathian lam kawngah a nung a ni.

¹¹Chutiang bawkin nangni pawh sual lam kawngah thi tawhah inruat u la, Pathian lam kawngah erawh chuan Krista Isuaah nungah inruat rawh u.

¹²Chuvangin in taksa duhzawng in zawmna turin, intaksa thi theiah chuan sualnain ro rel suh se.

¹³In taksa pengte pawh fel lohna hriamhrei atan sualna hnenah pe phal hek suh u; amaherawhchu mitthi zing ata nung leh angin Pathian hnenah inpe ula, in taksa pengte pawh chu felna hriamhrei atan Pathian hnenah pe phal zawk rawh u.

¹⁴Sualnain in chungah thu a nei dawn tawh si lo, dan rorela awm in ni lo a, khawngaihna rorela awm in ni zawk si a.

¹⁵Engtin nge ni ang le? Dan rorela awm kan nih loh a, khawngaihna rorela awm kan nih zawk avang hian kan sual tur em ni ang?Hnai lo e.

¹⁶Tu hnenah pawh an thu awih tura bawiha in luh chuan (thihna khawpa sual bawih emaw, felna khawpa thu awih bawih emaw), a thu in awiha bawih chu in ni tih in hre lo em ni?

¹⁷Amaherawhchu sual bawihte ni mah u la, zirtir dan a hnena in inpekna chu rilru tak zetin in lo awih a;

¹⁸tin, sual lak ata chhuahin in awm a, felna bawihte in lo ni ta a; chuvangin Pathian hnenah lawmthu awm rawh se;

¹⁹(in tisa chak lohzia avangin mihring danin thu ka sawi a ni e) in taksa pengte chu bawlhhlawhna hnenah leh, bawhchhiatna turin bawhchhiatna hnenah bawiha in pe phal ang khan, tunah in taksa pengte chu thianghlimna turin felna hnenah bawihah pe phal rawh u.

²⁰Sual bawihte in nih lai khan felna lakah in fihlim a ni.

²¹Tuna in thil zahpui takahte hian, khang lai khan rah eng nge in lo hmuh thin le? Khang thil tawpna kha thihna a ni thin a sin.

²²Tunah erawh chuan sual lakah tihfihlima awma Pathian bawihte in lo nihin, thianghlimna hmu khawpin in rah in nei a sin, chu mi tawpna - chatuana nunna nen,Sual man chu thihna a ni si a; Pathian thilthlawnpek erawh chu, kan Lalpa Krista Isua zarah chuan, chatuana nunna a ni.

²³Sual man chu thihna a ni si a; Pathian thilthlawnpek erawh chu, kan Lalpa Krista Isua zarah chuan, chatuana nunna a ni.