Read Baibul, Mizo Rom 9 Bible Online

Rom 9 - Baibul, Mizo bible

Rom 9

¹Kristaah chuan thu tak tak ka sawi a ni, ka daw lo e, Thlarau Thianghlim zarah chuan ka chhia leh tha hriatna pawh

²ka thinlungah hian hrehawmna nasa tak leh lungngaihna reh thei lo ka pai a sin;

³ka unaute, tisa lama ka chipuite aiah hian, kei hi Krista hnen ata tihhran khawp laiin anchhe dawngin awm hial i la ka ti si a;

⁴Israel mi an ni si a; fa nihna te, ropuina te, thuthlung zawng zawng te, Dan pekna te, Pathian rawngbawlna te, thutiam zawng zawng te an ta a ni a;

⁵pute chu an ta a ni bawk a, tisa lam thu-ah Krista chu anmahni zing ata lo chhuak a ni bawk a; ani chu thil zawng zawng chunga awm, chatuana fak tlak Pathian a ni. Amen.

⁶Nimahsela Pathian thu chu engmah lo anga awm ta a ni lo e. Israela thlahte chu Israel mi an ni vek lo e;

⁷Abrahama thlahte an nih avangin an zain a fate an ni vek hek lo; "Isaaka-ah hian i thlahte an ti ang," tih a ni zawk.

⁸Chu chu, tisa fate chu Pathian fate an ni lo a, thutiam fate chu Abrahama thlaha ruat an ni zawk tihna a ni.

⁹Thutiam chu hei hi a ni: "Tun ang hun hian ka lo kal ang a, Sari chuan fapa a hring ang," tih hi.

¹⁰Chu chang a ni lo e, Rebeki pawhin mi pakhat (kan pu Isaaka) laka phir a pai lai khan -

¹¹naute chu an la pian hmaa, chhia leh tha an la tih hmain, thiltih vang ni loin, a kotu duh vang zawkin, thlan lam thu-ah Pathian thu ruat chu a ngheh theihna'n

¹²- a hnenah chuan, "A upa zawkin a naupang zawk rawng a bawl ang," Pathianin a tih kha,

¹³Jakoba ka hmangaih a, Esauva erawh chu ka hua," tih ziak ang khan.

¹⁴Engnge kan sawi tak ang le? Pathianah chuan fel lohna a awm em ni? Hnai lo e.

¹⁵Ani chuan, "Ka khawngaih apiang chu ka khawngaih ang a, zah ka ngaihna chung apiangah chuan zah ka ngai ang," tiin Mosia hnena a sawi si kha.

¹⁶Chuvangin a duhtu avng a ni lo a, a tlantu avang a ni hek lo, a khawngaihtu Pathian avang a ni zawk e.

¹⁷Pathian Lehkha Thuin Pharaoa hnenah chuan, "He mi avang ngawt hian ka tungding chia, nangmahah chuan ka thiltihtheihna ka entir theihna tur leh, khawvel zawng zawnga ka hming a than theihna'n," a ti si a.

¹⁸Chutichuan Pathianin a duh apiang a khawngaih thin a, a duh apiang pawh a tiluhlul thin a ni.

¹⁹Nang chuan ka hnenah, "Engati nge a la dem cheu ni? A duhzawng tuin nge dodal ni?" i ti dawn a ni awm e.

²⁰A ni, nimahsela aw mihring, Pathian hnial veitu chu tu nge maw i nih le? Thil siam chuan a siamtu hnenah, "Engati nge hetianga mi siam?" a ti ang em ni?

²¹Bellei tlang khat bel pakhat hlu tak, bel pakhat hlu lo taka siam turin belvawtu chuan bellei chungah thu a nei lo em ni?

²²Khawngaihna bel, ropui tura a lo buatsaih lawkate chungah chuan a khawngaihna ngahzia a entir theihna'n,

²³thinurna bel boral tlakte chungah chuan, Pathianin a thinur leh a thiltihtheihna lantir duh mah se la, a dawh hram hram chuan eng nge pawi ang?

²⁴(Chu khawngaihna belte chu Judate zing ata chauh ni loin, Jentailte zing ata pawh kohte kan ni).

²⁵Hosea lehkhabuah chuan, "Ka mite ni ngai lo chu, 'Ka mite,' ka ti ang; Tin, hmangaih ngai lohvi chu, 'Hmangaihi,' ka ti ang.

²⁶Tin, heti hi a lo ni ang a, an hnenah, 'Ka mite in ni lo e,' a tihna hmunah ngei chuan Pathian nung fate vuahin an awm ang," tia ziak ang bawk khan.

²⁷Isaia pawhin Israel mite thu aupuiin, "Israel mite chu tuifinriata tiau zatin tam mah se la, a hrem bak chauh chu chhandamin an awm ang.

²⁸Lalpa chuan rang taka tizo diamin lei chungah a hrem tur thu a hlen dawn si a," a tih kha.

²⁹Isaia vekin, "Mipuite Lalpa chuan chi thlahtu min lo zuahsak suh se la chu, Sodom khua angin kan lo awm tawh ang a, Gomorra khua anga siamin kan lo awm tawh bawk ang," tia a lo sawi lawk ang bawk khan.

³⁰Engnge kan sawi tak ang le? Jentail, felna um lote chuan felna an lo phak tawh a ni, - rinna avanga felna chu.

³¹Israel, felna dan umte erawh chuan felna dan chu an phak zo ta lo.

³²Eng vang nge ni? Rinnain an um lo a, thiltiha hmuh theih angin an um avang a ni. Tlukna lungah chuan an tlu si a;"Ngai teh, Zionah chuan tlukna lung leh dalna lungpui ka dah a, Tupawh amah ring apiang chu a mualpho lo ang," tih ziak ang khan.

³³Ngai teh, Zionah chuan tlukna lung leh dalna lungpui ka dah a, Tupawh amah ring apiang chu a mualpho lo ang," tih ziak ang khan.