Read Baibul, Mizo 1 Korinth 1 Bible Online

1 Korinth 1 - Baibul, Mizo bible

1 Korinth 1

¹Paula, Pathian duhzawnga Krista Isua tirhkoha koh leh kan unaupa Sosthena chuan,

²Korinth khuaa Pathian kohhranho awm, Krista Isuaa tihhran, mi thianghlim ni tura kohte hnenah ram tina kan Lalpa (anmahni leh keimahni Lalpa) Isua Krista hming lam zawng zawng hnenah nen:

³Pathian kan Pa leh Lalpa Isua Krista hnen ata khawngaihna leh remna inhnenah awm rawh se.

⁴Krista Isuaa Pathian khawngaihna in hnena pek avang khan in chung thu-ah Pathian hnenah lawmthu ka hril fo thin;

⁵engkimah, thusawi tinrengah leh hriatna tinrengah, amahah chuan tihhausaka in awm thu-ah khan;

⁶chutiangin Krista thu ka hriattir chu nangmahniah tihngheha a awm kha;

⁷chutichuan kan Lalpa Isua Krista inlarna nghakin, thilpek reng rengah in hlawhtling lo lo e;

⁸ani chuan kan Lalpa Isua Krista ni-ah chuan sawiselbova in awmna'n a tawp thlengin a tinghet bawk ang che u.

⁹Pathian, a Fapa Isua Krista kan Lalpa pawlnaa ko luttu che u kha a rinawm a ni.

¹⁰Tin, unaute u, in zain thu thuhmun in sawi a, inzinga inthenna reng a awm lohna turin, rilru hmunkhat leh ngaihtuahna hmunkhata fel taka in inzawm tlat zawkna turin kan Lalpa Isua Krista hmingin ka ngen a che u.

¹¹Ka unaute u, in chungchang thu chu in zingh inhnialnate a awm tih Kloii chhungte chuan mi hrilh a ni.

¹²Hei hi a ni ka tih chu, mi tinin, "Kei Paula pawl ka ni," "Kei zawng Apollova pawl ka ni," "Kei zawng Kiphaa pawl ka ni," "Kei zawng Krista pawl ka ni," in tih hlawm hi.

¹³Krista chu thenin a awm em ni? Paula in aia khenbehin a awm em ni? A nih loh leh, Paula hminga baptis-in in awm em ni?

¹⁴Krispa leh Gaia lo chu in zinga mi tumah ka baptis loh che u avangin Pathian hnenah lawmthu ka sawi thin a ni;

¹⁵chutilochuan miin keima hminga baptis in ni emaw an ti dah ang e.

¹⁶Stephana chhungte erawh chu ka baptis bawk a; chung lo chu mi dang ka baptis emaw ka hre lo.

¹⁷Krista chuan baptis turin mi tir si lo, Chanchin Tha hril turin mi tir zawk a ni; thu finga hril loin, chutilochuan Krista kraws chu engmah lovah an chantir dah ang e.

¹⁸Kraws thu chu boral mekte tan chuan atna a ni si a; keini chhandam mekte tan erawh chuan Pathian thiltihtheihna a ni zawk e.

¹⁹Mi fing finna chu ka tiboral ang a, remhre remhriatna chu ka paih thla ang" tih ziak a ni si a.

²⁰Mi fing chu khawiah nge? Lehkhaziaktu chu khawiah nge? He khawvela hnialtu chu khawiah nge? Pathianin khawvel finna hi atthlak a ni tih a hriattir lo em ni?

²¹Pathian finnaah chuan khawvelin finna hmanga Pathian an hriat theih loh hnuin, thu hril atthlak hmanga a ringtute chhandam chu Pathianin tha a ti hle si a.

²²Judate chuan chhinchhiahnate an phut thin a, Grikte chuan finna an zawng bawk thin a;

²³keini erawh chuan Krista khenbeh thu kan hril thin a nih hi; chu chu Judate tan chuan tlukna, Jentailte tan thu atthlak a ni a;

²⁴nimahsela Judate pawh ni se la, Grikte pawh ni se la, kohte tan zawng Krista, Pathian thiltihtheihna leh Pathian finna chu a ni.

²⁵Pathian atna chu mihring aiin a fing zawk a, Pathian chak lohna pawh chu mihring aiin a chak zawk bawk si a.

²⁶Unaute u, a kohna che u hi ngaihtuah teh u, tisa lama mi fing tam tak te, mi chak tam tak te, mi tha tam tak te koh an nih lohzia hi;

²⁷nimahsela Pathianin khawvel thil ate chu a thlang zawk a, mi fingte chu a tihmualpho theihna turin; tin, Pathianin khawvel thil chak lote chu a thlang a, thil chakte chu a tihmualpho theihna turin;

²⁸tin, khawvel thil chhia leh thil hmuhsitawmte, thil awm lote nen lam Pathianin a thlang a, thil awmte chu engmah loa a siam theihna turin;

²⁹chutichuan Pathian hmaah mi tumah an inchhuang thei lo ang.

³⁰Nangni erawh chu ama zarah Krista Isuaah chuan in awm a ni; ani chu Pathian hnen ata kan tan finnaah siam a ni, felnaah te, thianghlimnaah te, tlannaah te nen;chutichuan an ziak ang khan, "A chhuang apiangin Lalpa chhuang rawh se."

³¹chutichuan an ziak ang khan, "A chhuang apiangin Lalpa chhuang rawh se."