Read Baibul, Mizo 1 Korinth 11 Bible Online

1 Korinth 11 - Baibul, Mizo bible

1 Korinth 11

¹Mi zirtute ni rawh u, kei pawh Krista zirtu ka ni ang bawk hian.

²Tin, engkima mi hriat reng avang leh, thurochhiah ka hrilh che u ang taka in vawn tlat avangin ka fak a che u.

³Amaherawhchu, mipa tawh phawt lu chu Krista a ni, hmeichhe lu chu mipa a ni, Krista lu chu Pathian a ni tih in hriat ka duh a ni.

⁴Mipa, lukhum khum chunga tawngtai emaw, thu hril emaw apiangin an lu chu an timualpho a ni.

⁵Amaherawhchu, hmeichhia lukhum khum loa tawngtai emaw, thu hril emaw apiangin an lu an timualpho a ni; ziah kawn nen thuhmun reng a ni si a.

⁶Hmeichhia lukhum khum loa a awm si chuan met law law rawh se; amaherawhchu hmeichhe tan lu meh emaw, ziah kawn emaw a zahthlak si chuan lukhum khum zawk rawh se.

⁷Mipa zawng Pathian anpui leh ropuina a nih avangin lukhum khum tur a ni lo reng reng si a; hmeichhia erawh chu mipa ropuina a ni.

⁸Mipa hi hmeichhia atanga chhuak a ni lo a; hmeichhia erawh chu mipa atanga chhuak a ni zawk a.

⁹Mipa hi hmeichhe tana siam a ni hek lo; hmeichhia erawh chu mipa tana siam a ni zawk.

¹⁰Chu mi avang chuan vantirhkohte avangin hmeichhiain mipa thuneih chhinchhiahna a khum tur a ni.

¹¹Nimahsela, Lalpaah chuan hmeichhia hi mipa loin a awm thei lo a, mipa pawh hi hmeichhia loin a awm thei hek lo.

¹²Hmeichhia hi mipa atanga chhuak a ni ang bawkin,mipa pawh hi hmeichhe laka piang a ni si a; amaherawhchu engkim hi Pathian atanga chhuak vek a ni.

¹³Nangmahni inngaihtuah rawh u, hmeichhiain lukhum khum loa Pathian hnena tawngtai hi a mawi em ni?

¹⁴Mipa hian sam sei a neih chuan a tan a zahthlak a ni tih,in thinlung pianpui pawhin a hriattir lo che u em ni?

¹⁵Hmeichhia erawh chuan sam sei a neih chuan a tan ropuina a ni zawk; a sam chu a khuhna tura pek a ni si a.

¹⁶Engpawh ni rawh se, hnial an awm a nih pawhin keini zingah chutiang dan kan nei lo, Pathian kohhranho pawhin an nei hek lo.

¹⁷Amaherawhchu, he thu ka hrilh che uah hian ka fak thei lo a che u, in that lehzualna tur lam ni loin, in chhiat lehzualna tur lam zawka in inkhawm thin avang hian.

¹⁸A hmasa berin, kohhranhova in inkhawmin in zingah inthenna a awm thin tih mi sawi ka hre si a; rin pawh ka ring deuh bawk a ni.

¹⁹In zinga a taktakte chu an lan theihna'n, in zingah rin hranna pawh a awm bawk tur reng a ni.

²⁰Chutichuan, in inkhawmin, Lalpa zanriah ei rual a ni lo,

²¹mi tinin in eiin mahni zanriah in ei hmasa si thin a; tichuan mi pakhat ril a tam a, mi pakhat a rui si a.

²²Eng tizia nge? Ei leh inna tur in in nei lo em ni? A nih loh leh, Pathian kohhranho in hmusitin, engmah nei lote chu in mualpho em ni? In hnenah eng nge ka sawi tak ang? Ka fak dawn che u em ni? He mi kawngah hian ka fak thei lo a che u.

²³Ka thu hrilh chhawn che u kha Pathian hnen ata ka hmuh a sin, khatia, Lalpa Isua chuan mantira a awm zana chhang a lak a,

²⁴lawmthu a sawi zawha a phel a, "Hei hi ka taksa in aia pek tura chu a ni, mi hriat rengna'n hei hi ti thin rawh u," a tih kha.

²⁵Chutiang bawka zanriah ei zawha no pawh chu a lak a, "He no hi ka thisena thuthlung thar chu a ni, in in apiangin mi hriat rengna'n hei hi ti thin rawh u," a tih kha.

²⁶Chu chhang chu in ei a, no chu in in apiangin, a lo kal leh hma loh zawng Lalpa thihna chu in entir thin a ni si a.

²⁷Chuvangin, tupawh ei tlak loa chhang chu ei emaw, Lalpa no in emaw apiang chu, Lalpa taksa leh thisen chungah thiam loh a chang ang.

²⁸Chutichuan, mi mahni infiah chawp zawk rawh se, chutiangin chhang chu eiin no chu in rawh se.

²⁹A ei leh a intu chuan Lalpa taksa chu khun taka a ngaihtuah si loh chuan mahni chunga rorelna turin a eiin a in thin a ni si a.

³⁰Chuvangin, in zinga mi tam tak in chak loin in bawrhsawm a ni, duai pawh in muhil lo e.

³¹Amaherawhchu, khun takin mahni inngaihtuah thin i la chuan rorelsakin kan awm thin lo tur.

³²Nimahsela, rorelsaka kan awm pawhin, khawvel nena thiam loh changa kan awm ve lohna'n, Lalpa thununin kan awm thin a ni.

³³Chuvangin, ka unaute u, ei tura in inkhawmin innghak hlawm thin rawh u.In inkhawm chu rorelna in tuar phah lohna turin tupawhin a ril a tam chuan a in lamah ei rawh se. Tin, thu dang chu ka lo kal hun apiangah ka rawn tifel ang e.

³⁴In inkhawm chu rorelna in tuar phah lohna turin tupawhin a ril a tam chuan a in lamah ei rawh se. Tin, thu dang chu ka lo kal hun apiangah ka rawn tifel ang e.