Read Baibul, Mizo 1 Korinth 12 Bible Online

1 Korinth 12 - Baibul, Mizo bible

1 Korinth 12

¹Tin, unaute u, thlarau lam thilpek thute chu in hriat loh ka duh lo e.

²Jentailte in nih lai khan eng tizia pawha an hruai ang che u apiang khan, khang milem aw nei lote lamah khan hruai boin in awm tih in hria e.

³Chuvangin tuma'n Pathian Thlarauva thusawiin, "Isua chu anchhe dawng a ni," an ti ngai lo; tin, tuma'n, Thlarau Thianghlimah chauh lo chuan, "Isua chu Lalpa a ni," an ti thei ngai lo tih ka hriattir a che u.

⁴Tin, thilpek hrang hrang a awm a, Thlarau erawh chu hmunkhat a ni.

⁵Rawngbawl dan hrang hrang pawh a awm a, nimahsela Lalpa chu hmunkhat a ni.

⁶Hnathawh dan hrang hrang pawh a awm a, Pathian erawh chu hmunkhat a ni - mi zawng zawnga engkim thawktu chu.

⁷Nimahsela, sawt tlanna turin Thlarau hriattirna chu mi tin hnena pek theuh a ni.

⁸Mi pakhat hnenah Thlarauvah chuan finna thu pek a ni a; mi dang hnenah chu Thlarau vek thu chuan hriatna thu pek a ni a;

⁹tin, mi dang hnenah chu Thlarau vekah chuan rinna pek a ni a; mi dang hnenah Thlarau hmunkhatah chuan tihdam theihna thilpekte pek a ni a;

¹⁰mi dang hnenah thilmak tihtheihnate pek a ni a; mi dang hnenah thu hrilh theihna pek a ni a; mi dang hnenah thlaraute hriat dik theihna pek a ni a; tin, mi dang hnenah tawng chi hrang hranga thusawi theihnate pek a ni a; mi dang hnenah tawng hriat lohte hrilhfiah theihna pek a ni si a;

¹¹nimahsela chung zawng zawng chu, Thlarau hmunkhat vek chuan mi tin hnenah a duh ang zela sem theuhin a thawk thin.

¹²Taksa hi pumkhat a ni a, peng tam tak a nei a, taksa pengte zawng zawng chu tam mah se la,taksa pumkhat a ni si a;Krista chu chutiang bawk chu a ni.

¹³Kan zain, Judate emaw, Grikte emaw, bawih emaw, bawih lo emaw, taksa pumkhata awm turin Thlarau pakhat chauhvah baptis-in kan awm theuh si a, Thlarau pakhat chauh min intir theuh bawk a.

¹⁴Taksa hi peng khat chauh a ni si lo a, peng tam tak a ni zawk.

¹⁵Kephah hian, "Kut ka nih loh avangin taksaa tel ka ni lo e," ti se la, chu mi avang chuan taksaa tel lo a ni chuang lo e.

¹⁶Tin, beng hian, "Mit ka nih loh avangin taksaa tel ka ni lo e," ti se la, chu mi avng chuan taksaa tel lo a ni chuang lo e.

¹⁷Taksa pum pui hi mit ni vek se la, ri hriatna chu khawiah nge a awm ang? A pum puiin ri hriatna ni vek se la, rim hriatna chu khawiah nge a awm ang?

¹⁸Nimahsela Pathianin peng tinrengte hi taksaah hian a duhna apiangah a awmtir theuh tawh a ni.

¹⁹Chutichuan, chung zawng zawng chu peng khat chauh ni se la, taksa hi khawiah nge a awm ang?

²⁰Amaherawhchu, peng tam tak an ni zawk a, nimahsela taksa pumkhat chauh a ni si a.

²¹Tin, mit hian kut hnenah, "Engah mah ka duh lo va che," a ti thei lo; lu pawh hian kephahte hnenah, "Engah mah ka duh lo va che u," a ti thei bawk hek lo.

²²A ni, chutih ahnekin taksa peng chak awm lo zawnga langte hi an pawimawh zawk em em a ni;

²³tichuan taksa peng chawimawi tlak loh zawka kan ruat thinte hi, chung ngei chu kan chawimawi nasa zawk thin; chutichuan kan peng mawi lote hian mawina nasa zawk an hmu thin;

²⁴kan peng mawite erawh hi chuan chutianga tih an ngai lo.

²⁵Taksaah hian inthenna reng reng a awm lo a, a pengte hian inang taka an inbuaipui tawn theuh zawkna turin Pathianin mawina nei lo peng chu chawimawi nasa zawkin, taksa hi a remkhawm a ni zawk.

²⁶Chutichuan, peng khatin a tuar chuan peng zawng zawngin an tuarpui thin, peng khat chawimawiin a awm chuan peng zawng zawngin an lawmpui thin.

²⁷Chutichuan,nangniho hi Krista taksa chu in ni a a pengte in ni theuh bawk a.

²⁸Tin, Pathianin thenkhat chu kohhranho zingah a dah a - a pakhatnaah chuan tirhkohte, a pahnihnaah chuan thuhriltute, a pathumnaah chuan zirtirtute a dah a; chu mi hnuah chuan thilmak tihte a awm a; chu mi hnuah chuan tihdam theihna thilpekte, tanpui theihna thilpekte, rorel thiamna thilpekte, tawng chi hrang hranga thusawi theihna thil pekte chu a awm leh a.

²⁹An zain tirhkoh an ni vek em ni? An zain thuhriltu an ni vek em ni? An zain zirtirtu an ni vek em ni? An zain thilmak titu an ni vek em ni?

³⁰An zain tihdam theihna thilpek te an nei vek em ni? An zain tawng hriat lohtein thu an sawi vek em ni? An zain thu an hrilhfiah vek em ni?Thilpek ropui berte chu chak hle zawk rawh u. Tin, kawng tha lehzual ka entir dawn a che u.

³¹Thilpek ropui berte chu chak hle zawk rawh u. Tin, kawng tha lehzual ka entir dawn a che u.