Read Baibul, Mizo 1 Korinth 13 Bible Online

1 Korinth 13 - Baibul, Mizo bible

1 Korinth 13

¹Mihring tawngte leh vantirhkoh tawngtein thu sawi mah i la, hmangaihna ka neih si loh chuan dar, ri mai mai emaw, dar benthek, ri mai mai emaw ka lo ni ang.

²Tin, thu hrilh theihna neiin, thuruk zawng zawng leh hriatna zawng zawng hre vek mah i la, tlang sawn theihna khawp hial rinna famkim nei mah i la, hmangaihna ka neih si loh chuan engmah ka ni lo ang.

³Tin, mi retheite chawmna'n ka sum zawng zawng pe vek mah i la, ka taksa pawh kang turin inpe mah i la, hmangaihna ka neih si loh chuan ka tan engmah a sawt lo ang.

⁴Hmangaihnain a dawhthei a, ngil a nei bawk thin; hmangaihnain a itsik lo a; hmangaihna a infak lo a, a uang lo a,

⁵a che mawi lo lo a, mahni hma a sial lo a, a thinur duh lo a, sual lamah a ngaihtuah lo a;

⁶fel lohnaah a lawm lo a, thutak erawh chu a lawmpui thin a;

⁷engkim a tuar hram hram a, engkim a ring a, engkim a beisei a, engkim a tuar chhuak thin.

⁸Hmangaihna hi engtikah mah a reh lo ang; amaherawhchu thu hrilhnate hi awm mah se la tihban a la ni ang a, tawng hriat lohte hi awm mah sela a la bang ang a, hriatna hi awm mah se la tihban a la ni ang.

⁹A kim loin kan hria a, a kim loin thu kan hril bawk thin a ni.

¹⁰A famkim a lo thlen hunah erawh chuan a kim lo hi tihban a ni tawh ang.

¹¹Ka naupan laiin naupang tawngin ka tawng a, naupang hriatin ka hria a, naupang ngaihtuahin ka ngaihtuah thin; tuna ka lo puitlin hnu hian naupang tih dan chu ka ban tawh.

¹²Tunah zawng darthlalangah kan hmu riai ruai a ni, chutih hunah erawh chuan inhmatawnin a ni tawh ang; tunah zawng a kim loin ka hria, chutih hunah erawh chuan mi hriat kim thin ang hian ka hre kim tawh ang.Chutichuan, he'ng pathum, rinna te, beiseina te, hmangaihna te hi a awm reng ang; tin, hengahte hian a ropui ber chu hmangaihna hi a ni.

¹³Chutichuan, he'ng pathum, rinna te, beiseina te, hmangaihna te hi a awm reng ang; tin, hengahte hian a ropui ber chu hmangaihna hi a ni.