Read Baibul, Mizo 1 Korinth 14 Bible Online

1 Korinth 14 - Baibul, Mizo bible

1 Korinth 14

¹Hmangaihna hi um zel u la, thlarau lam thilpekte pawh chak cheu rawh u, amaherawhchu thu in hrilh theihna tur lek phei chu chak bik rawh u.

²Tawng hriat loha thusawi chuan mihring hnena sawi ni loin, Pathian hnena sawi a ni zawk si a, tumah a thusawi chu an hre si lo; nimahsela thlarauvah chuan thuruk a sawi a ni.

³Thu hriltu erawh chuan mihring hnenah siamthatna thu te, fuihna thu te, thlamuanna thu te a sawi zawk thin.

⁴Tawng hriat loha thusawi chuan mahni chauh a insiam tha thin, thu hriltu erawh chuan kohhranho a siam tha zawk thin.

⁵Tin, in zain tawng hriat lohtea thu in sawi ka duhsak che u a, nimahsela thu in hrilh ka duhsak lehzual che u a ni; kohhranhoin insiamthatna an hmuh theihna turin a hrilhfiah leh nghal loh chuan thu hriltu chu tawng hriat lohtea thusawitu ai chuan a ropui zawk reng reng a ni.

⁶Tunah unaute u, tawng hriat lohtea thusawiin in hnenah lo kal ang i la, hriattirna lam emaw, hriatna lam emaw, thu hrilna lam emaw, zirtirna lam emaw, in hnena ka sawi si loh chuan, eng nge ka tihsawtna che u awm ang?

⁷Thil nung lo, ri theite pawh, phenglawng emaw, tingtang emaw hi mumal neia a rik loh chuan eng hla nge an tuma an kaih, engtin nge a hriat theih ang?

⁸Tawtawrawt hi mumal nei loa a rik chuan tu nge ral kap turin inbuatsaih ang?

⁹Chutiang bawkin nangni pawhin lei hian tawng hriat awla in sawi loh chuan eng thu nge in sawi engtin nge a hriat ang? Boruaka tawng mai in ni ang a sin.

¹⁰Khawvelah hian tawng chi hrang tam tak a awm a ni ang e, nimahsela awmze nei lo reng reng a awm si lo.

¹¹A tawng awmzia erawh chu ka hriat si loh chuan kei hi a sawitu tan awze mi ka ni ang a; a sawitu pawh chu ka tan awze mi a ni bawk ang.

¹²Chutichuan, nangni pawhin thlarau lam thilpekte chunga thahnem inngaih avang hian kohhranho siamthatna tura in ngah theihna'n zawng rawh u.

¹³Chuvangin, tawng hriat loha thusawi chuan a hrilhfiah theihna'n tawngtai rawh se.

¹⁴Tawng hriat loha ka tawngtai chuanka thlarau zawngin a tawngtai ngei a, ka hriatna erawh chu a hlawk chuang lo.

¹⁵Engtin nge ni ta ang le? Thlarauin ka tawngtai ang a, hriattheihna pawhin ka tawngtai bawk ang; thlarauin hla ka sa ang a, hriattheihna pawhin ka sa bawk ang.

¹⁶Chutilochuan, thlarauin mal sawmsak mah la, la hre lote awmnaa awm chuan i lawmthu sawiah chuan engtin nge "Amen" a tih theih ang, i thusawi chu hre thei lo puiin?

¹⁷Nang zawngin lawmthu i sawi tha zet tak a, mi dang erawh chu a siam tha chuang si lo.

¹⁸Nangmahni zawng zawng aiin tawng hriat lohtea thu ka sawi hnem zawk avangin Pathian hnenah lawmthu ka sawi a,

¹⁹nimahsela kohhranho inkhawmnaah chuan tawng hriat loha thu singkhat sawi aiin mi dangte ka zirtir theihna'n ka hriattheihnain thu panga chauh sawi ka duh zawk a ni.

²⁰Unaute u, rilru lamah naupang suh u; amaherawhchu sual kawngah zawng nausen u la, rilru lamah erawh chuan puitling rawh u.

²¹Dan Lehkhabuah chuan, " 'Awze mite kain leh ram danga mite hmuiin he'ng mite hnenah hian thu ka sawi ang a; chuti pawhin mi ngaithla chuang lo ang,' Lalpa'n a ti," tih ziak a ni.

²²Chuvangin, tawng hriat lohte hi ringte tan chhinchhiahna a ni lo a, ring lote tan a ni zawk; thu hril erawh hi chu ring lote tan chhinchhiahna a ni lo a, ringte tan a ni zawk.

²³Chuvangin, kohhranho zawng zawng in inkhawmin, in zaa tawng hriat lohtea thu in sawi chuan la hre lote emaw, ring lote emaw lo lut se la, a an ti dawn lo che u em ni?

²⁴In zaa thu in hrilh erawh chuan ring lo emaw, la hre lo emaw lo lut se la, a thiam lohzia in zaa tihlan a ni tawh ang a, inzaa chhuahchhalh a ni tawh ang;

²⁵a thinlunga thurukte chu tihlanin a awm tawh ang; chutichuan bawkkhupin Pathian chibai a buk ang a, Pathian in zingah a awm tak zet tih a puang ang.

²⁶Unaute u, engtin nge ni ta ang le? In rawn inkhawmin fakna hla emaw, thu zirtir emaw, hriattirna thu emaw, tawng hriat loh emaw, hrilhfiahna emaw in nei theuh thin a. Engkim siam thatna turin tih ni rawh se.

²⁷Tupawhin tawng hriat loha thu an sawi chuan pahnihin emaw, a tam berin pathumin emaw ni se la, inchhawk zelin ni bawk rawh se; tin, mi pakhatin hrilhfiah rawh se;

²⁸hrilhfiahtu an awm loh erawh chuan kohhranho inkhawmnaah chuan ngawi rengin awm se la, mahni leh Pathian hnenah sawi rawh se.

²⁹Thu hriltute pawhin pahnihin emaw, pathumin emaw sawi se la, mi dangte chuan ngun takin ngaihtuah rawh se.

³⁰Amaherawhchu, a kianga thu mi dang hnenah hriattirna thu pekin a lo awm chuan a hmasa chu ngawi mai rawh se.

³¹Mi zawng zawngin an zir theihna tur leh mi zawng zawng thlamuanga an awm theihna turin, in zain pakhat zelin thu in hril thei si a.

³²Thu hriltute thlaraute chu thu hriltute thu thuin an awm a ni.

³³Pathian chu buaina Pathian a ni lo a, remna Pathian a ni zawk si a, mi thianghlim kohhranho pawl zawng zawnga a awm ang hian.

³⁴Kohhranho inkhawmnaah chuan hmeichheho chu ngawi rengin awm rawh se; anni zawng an thusawi phal a ni si lo; Dan Lehkhabuin a sawi ang bawk khan thu zawmin awm zawk rawh se.

³⁵Tin, engpawh zir an duh chuan in lamah mahni pasal zawt rawh se; kohhranho inkhawmnaa hmeichhe thusawi hi a zahthlak si a.

³⁶Pathian thu hi nangmahni laka chhuak a ni maw? A nih loh leh nangmahni hnen chauhvah a lo thleng a ni maw?

³⁷Tupawh thu hriltuah emaw thlarau miah emaw a inngaih chuan in hnena thu ka ziak hi Lalpa thupek a ni tih lo hre rawh se.

³⁸Nimahsela, tupawhin a hriat loh chuan hre loin awm mai rawh se.

³⁹Chutichuan, ka unaute u, thu hrilh hi chak hle u la, tawng hriat lohtea thusawi pawh hi khap suh u;nimahsela engkim mawi tak leh fel taka tih ni rawh se.

⁴⁰nimahsela engkim mawi tak leh fel taka tih ni rawh se.