Read Baibul, Mizo 1 Korinth 15 Bible Online

1 Korinth 15 - Baibul, Mizo bible

1 Korinth 15

¹Tin, unaute u, Chanchin Tha ka hrilh che u kha ka hriattir leh ang che u; chu Chanchin Tha chu in lawm a, chu miah vek chuan in din a;

²ka thu hrilh che u kha in ring mai mai a nih loh a, in pawm tlat a nih chuan chu miah bawk chuan chhandam mekin in awm a ni.

³A hmasa berin ka hmuh ve bawk chu ka hrilh chhawn che u kha; khatia, Krista chu Pathian Lehkha thu ang zela kan sualte avanga a thih a,

⁴an phum a, Pathian Lehkha Thu ang zela ni thum nia kaihthawha a awm a,

⁵Kiphaa hnena a lo inlar te kha; chu mi hnuah chuan sawm leh pahnihte hnenah a inlar leh a,

⁶chu mi hnuah chuan unau zanga aia tam hnenah a inlar leh a, chu mi zinga mi tam zawk chu tun thlengin an la dam cheu a,thenkhat erawh chu an muhil ta a;

⁷chu mi hnuah chuan Jakoba hnenah a inlar leh a; chu mi hnuah chuan tirhkoh zawng zawngte hnenah;

⁸tin, a tawp berah chuan a hun loa piang ang, keima hnenah pawh a inlar a.

⁹Kei zawng tirhkoh zinga te ber, Pathian kohhranho ka tihduhdah avanga tirhkoha vuah tlak loh ka ni si a.

¹⁰Nimahsela Pathian khawngaihna avangin ka nih nih ka ni ta; tin, a khawngaihna mi pek chu athlawnin a awm lo a; chutih ahnekin anmahni zawng zawng aiin ka thawh rim zawk kha; nimahsela keimahin ka thawk lo a, Pathian khawngaihna ka hnena awm khan a thawk zawk a ni.

¹¹Engpawh ni se la, kei pawhin anni pawhin, khati khan kan hril thin a, khati khan nangni'n in ring bawk a.

¹²Tin, Krista thu, mitthi zing ata kaihthawhin a awm tih an hrilh si chuan, engtizia nge in zinga thenkhatin, "Mitthi thawhlehna reng reng a awm lo," in tih ni?

¹³Mitthi thawhlehna reng reng a awm si loh chuan Krista pawh kha kaihthawhin a awm lo ang;

¹⁴tin, Krista kha kaihthawhin a awm loh chuan kan thu hrilh hi engmah lo a ni ang a, in rin pawh engmah lo a ni bawk ang.

¹⁵A ni, Krista a kai tho tih Pathian kan hriatpui avang khan Pathian lam thu-ah hriatpuitu dawthei kan lo ni bawk ang - mitthite kaihthawha an awm loh chuan amah pawh a kai tho lo ang chu.

¹⁶Mitthite kaihthawhin an awm si loh chuan Krista pawh kha kaihthawhin a awm lo ang;

¹⁷tin, Krista kha kaihthawhin a awm loh chuan in rin chu engmah lo a ni ang a, in sualnaah chuan in la awm fo a ni ang.

¹⁸Chuti a nih chuan Kristaa muhil tawhte kha an boral ta a ni ang.

¹⁹Tun dam chhung chauha Krista chunga beiseina kan neih chuan mi zawng zawnga khawngaihthlak ber kan lo ni ang.

²⁰Nimahsela Krista chu mitthi zing ata kaihthawhin a awm tak zet a ni, muhilte thawh hmahruaitu a lo ni ta.

²¹Mihring vanga thihna a lo awm avangin, mihring avang vekin mitthi thawhlehna a lo awm ta bawk a.

²²Adama-ah chuan mi zawng zawng an thi thin ang hian Krista-ah chuan mi zawng zawng tihnunin an awm bawk ang.

²³Nimahsela mahni hun theuh zelah; Krista chu thawh hmahruaitu a ni a; chu mi hnua a lo kal lehnaah chuan Krista tate chu.

²⁴Chu mi hnuah chuan a tawp chu a lo la thleng ang; chu mi hnuah chuan rorelna zawng zawngte leh, thuneihna leh thiltihtheihna zawng zawngte a tihbo hnuah, Pathian hnenah, Pa hnen ngeiah chuan ram chu a pe ang;

²⁵a hmelma zawng zawng a ke hnuaia a dah hma loh chuan ani chu lalah a awm tur reng a ni si a.

²⁶Hmelma hnuhnung ber tihbova awm tur chu thihna hi a ni.

²⁷Ani chuan a ke hnuaiah engkim a dah si a," nimahsela, "A hnuaiah engkim dahin a awm," a tih hian, a hnuaia engkim dahtu chu a tel ve lo tih a lang reng a ni.

²⁸Tin, a hnuaia engkim dahin a awm hun chuan Fapa ngei pawh chu a hnuaia engkim dahtu hnuaiah chuan dahin a awm bawk ang, Pathian chu engkima engkim a nih theihna turin.

²⁹Chutiang a nih loh chuan mitthi puala baptisma changte chu engtin nge an tih ang? Mitthite chu kaihthawha an awm dawn hauh loh chuan eng atan nge anmahni puala baptisma an chan thin le?

³⁰Eng vangin nge keini pawh hi darker tina hlauhthawnawma kan awm thin ni?

³¹Unaute u, Krista Isua kan Lalpaa ka chhuanna che u chu chhalin, "Ni tin ka thi thin," ka ti a ni.

³²Mihring tih angin Ephesi khuaa sakawlhte kha sual ka nih chuan ka tan eng nge sawt ang? Mitthi kaihthawha an awm dawn loh chuan i eiin i in ang u hmiang, naktukah kan thi dawn alawm.

³³Bumin awm suh u; "Thian sualte chuan nungchang tha an tikhawlo thin."

³⁴Fel takin harh u la, thil tisual suh u; thenkhat chuan Pathian hriatna reng in neih loh hi; hei hi in lo zahna turin ka sawi a ni.

³⁵Nimahsela tuin emaw, "Mitthite chu engtin nge kaihthawhin an awm dawn? Taksa eng ang puin nge an lo kal dawn?" a ti a ni ang e.

³⁶Nang mi a, nangmah ngeiin i tuh thin pawh hi a thih zet loh chuan tihnunin a awm hlei nem;

³⁷tin, i tuh thin hi, a taksa la awm tur chu i tuh lo a, a fang mai i tuh zawk thin, buh fang emaw, chi dang fang emaw a ni thei e;

³⁸nimahsela Pathianin ama duh ang zelin taksa a pe thin, a fang tin hnenah mahni taksa theuh chu.

³⁹Tisa zawng zawng hi tisa chi khat a ni lo a; mihring tisa a dang a, sa tisa a dang a, sava tisa a dang a, sangha tisa a dang a ni.

⁴⁰Van taksate a awm bawk a, lei taksate pawh; nimahsela van taksa ropuina chu a dang a, lei taksa ropuina chu a dang a ni.

⁴¹Ni ropuina chu a dang a, thla ropuina chu a dang a, arsite ropuina chu a dang a; arsi leh arsi pawh ropuinaah chuan a inang si lo.

⁴²Mitthi thawhlehna pawh hi chutiang bawk a ni. Tawih theia tuhin a awm a; tawih thei loa kaihthawhin a awm;

⁴³chawimawi loha tuhin a awm a, ropui taka kaihthawhin a awm: chak loa tuhin a awm a, thiltihtheihna neia kaihthawhin a awm;

⁴⁴mihring lam taksaa tuhin a awm a, thlarau lam taksaa kaihthawhin a awm. Mihring lam taksa a awm chuan thlarau lam taksa pawh a awm ang.

⁴⁵Chutiang bawkin, "Mihring hmasa ber Adama chu mi nung a lo ni," tih ziak a ni; Adama hnuhnung zawk chu nunna petu thlarau a lo ni a.

⁴⁶Nimahsela thlarau lam chu a awm hmasa lo a, mihring lam chu a awm hmasa zawk; chu mi hnuah chuan thlarau lam chu a awm a.

⁴⁷Mihring hmasa ber chu leia mi, leia siam a ni a; mihring pahnihna chu vana mi a ni.

⁴⁸Leia siam mi ang kha leia siam mite pawh hi an ni a; vana mi ang kha, vana mite pawh chu an ni.

⁴⁹Tin, leia siam mi anna kha kan put angin, vana mi anna chu kan pu bawk dawn a ni.

⁵⁰Unau te u, "Tisa leh thisen hian Pathian ram chu a luah thei lo ang a; tawih thei hian tawih thei lo chu a luah hek lo ang," tih ka sawi a nih hi.

⁵¹Ngai teh u, thuruk ka hrilh dawn che u hi: Kan zain kan muhil kher lo ang a, nimahsela kan zain tawtawrawt hnuhnung ber rik hunah chuan rei lo teah, mit khap kar loah tihdanglamin kan awm vek tawh ang;

⁵²tawtawrawt chu a ri dawn si a, chutichuanmitthite chu tawih thei loa kaihthawhin an awm ang a, keini pawh tihdanglamin kan awm tawh ang.

⁵³He tawih thei hian tawih theih lohna a sin tur a ni a, he thi thei pawh hian thih theih lohna a sin bawk tur a ni.

⁵⁴Chutichuan he tawih thei hian tawih theih lohna a sin a, he thi thei hian thih theih lohna a sin hunah, chu mi hun ngeiah chuan, "Hnehnain thihna a lem zo ta," tih thu ziak hi a lo thleng ang.

⁵⁵Aw thihna, i hnehna chu khawiah nge a awm tak? Aw thihna, i tur chu khawiah nge a awm tak?

⁵⁶Thihna tur chu sual a ni a; sual thiltihtheihna chu dan thu chu a ni.

⁵⁷Nimahsela kan Lalpa Isua Krista zara hnehna min petu Pathian hnenah chuan lawmthu awm rawh se.Chuvangin ka unau duh takte u, nghet takin, tihchet rual lohin Lalpa hna thahnemngai taka thawk foin awm rawh u, in thawhrimna chu Lalpaah chuan a thlawn ngai lo tih in hre si a.

⁵⁸Chuvangin ka unau duh takte u, nghet takin, tihchet rual lohin Lalpa hna thahnemngai taka thawk foin awm rawh u, in thawhrimna chu Lalpaah chuan a thlawn ngai lo tih in hre si a.