Read Baibul, Mizo 1 Korinth 16 Bible Online

1 Korinth 16 - Baibul, Mizo bible

1 Korinth 16

¹Tin, mi thianghlimte tana thawhlawm thu kha zawng, Galatia rama kohhranho pawl hnenahte thu ka pek angin nangni pawhin lo ti ve rawh u.

²Ni sarih ni hmasa berah chuan mi tinin, malsawmna in hmuh angzia zelin dah khawl theuh u la; ka lo kal huna thawhlawm khawn reng reng a awm lohna'n.

³Tin, in khawngaih thilpek chu Jerusalem khuaa kalpui turin ka lo thlen hunin tupawh tha in tih apiang lehkhate kengin ka tir ang.

⁴Tin, ka kal vena awm a nih phei chuan ka hnenah an kal ang.

⁵Tin, Makedonia ram ka fan chhuah hnuah chuan in hnenah ka lo kal ang; Makedonia ram chu ka fang reng reng dawn si a.

⁶Nangni hnenah erawh chuan ka cham reng a ni thei e, thlasik chhung zawng pawh a ni mahna, khawiah pawh ka kalna tur apiangah nangnin mi thlah theihna turin.

⁷Tuna kal pah maia hmuh che u ka duh lo a, Lalpa'n rem a tih chuan in hnenah rei deuh cham ka beisei si a.

⁸Nimahsela, Pentikost thlengin Ephesi khuaah hian ka cham reng ang,

⁹kawngka zau tak leh sawt tak ka tan a inhawng si a,dotute tam tak an awm bawk.

¹⁰Tin, Timothea kha a lo thlen chuan ti loa in hnena a awmna'n fimkhur rawh u; keiin ka thawh ang bawk hian Lalpa hna chu a thawk si a.

¹¹Chuvangin, tuma'n hmusit suh se; ka hnena a lo kal theihna'n thlamuang takin thlah zawk ang che u; unaute rualin amah lo hmuh ka beisei si a.

¹²Kan unau Apollova thu kha chu, unaute ruala in hnena lo kal turin ka ngen chiam a, nimahsela tunah zawng lo kal a duh hauh lo a; a remchan hunah erawh chun a lo kal ang.

¹³Inveng u la, rinnaah chuan ding nghet u la, intihuai u la, chak takin awm rawh u.

¹⁴In tih apiang chu hmangaiha tih ni vek rawh se.

¹⁵Unaute u, Stephana chhungte chu Akaia rama awih hmahruaitute an ni a, mi thianghlimte rawngbawl turin an inpe tih in hria e;

¹⁶chutiang mite hnenah leh, hnathawha tanpui leh, thawk rim apiangte hnenah chuan intulut turin ka ngen a che u.

¹⁷Tin, Stephana te, Phortunata te, Akaika te an lo kal hi ka lawm a ni, in awm loh pawh lang loin mi siam avangin.

¹⁸Anni hian ka rilru leh in rilru an tiharh si a, chutichuan hetiang mite hi lawm rawh u.

¹⁹Asia ram kohhranho pawlte hian chibai an buk a che u. Akuila leh Priskilli, an ina kohhran inkhawmho nen hian Lalpaah chuan chibai tam takin an buk a che u.

²⁰Unau zawng zawng hian chibai an buk a che u. Fawh thianghlimin chibai inbuk theuh rawh u.

²¹Kei Paulan keima kut ngeia chibai ka bukna che u a nih hi.

²²Tupawhin Lalpa a hmangaih loh chuan anchhe dawngin awm rawh se. Kan Lalpa chu a lo kal e.

²³Lalpa Isua Krista khawngaihna chu in hnenah awm rawh se.Krista Isuaa ka hmangaihna hi inzaa hnenah awm rawh se. Amen.

²⁴Krista Isuaa ka hmangaihna hi inzaa hnenah awm rawh se. Amen.