Read Baibul, Mizo 1 Korinth 3 Bible Online

1 Korinth 3 - Baibul, Mizo bible

1 Korinth 3

¹Tin, Unaute u, thlarau mite hnena sawi angin in hnenah thu ka sawi thei lo a, tisa mite hnena sawi angin ka sawi zawk kha, Kristaa nausente hnena sawi ang maiin.

²Chaw ni loin, hnutein ka chawm che u kha, chaw in la ei theih loh avang khan; a ni, tunah pawh in la ei thei ta lo fo a ni,

³tisa mi in la nih fo avangin. In zingah itsikna leh inhnialna a awm thin avang hian tisa mi la niin mihring angin inla awm a ni lo em ni?

⁴Mi pakhatin, "Paula pawl ka ni," mi dang in, "Kei zawng Apollova pawl ka ni," in tih chhung zawng mihring in la ni lo em ni?

⁵Apollova chu eng nge a nih le? Paula pawh chu eng nge a nih? Rawngbawltu, nangmahni rintirtu che u chauh an ni a sin, chu pawh chu Lalpa'n a pek ang ve ve chauh zelin a ni.

⁶Keiin ka phun a,Apollovan tuiin a chawm a,nimahsela Pathianin a thantir a ni.

⁷Chutichuan a thantirtu Pathian chauh lo chu,a phuntu chu engmah a ni hek lo.

⁸Tin, a phuntu leh tuia chawmtu chu pumkhat an ni, nimahsela anmahni thawh rim ang zelin mahni lawmman an hmu ve ve ang.

⁹Keini zawng Pathian hnathawhpuite kan ni si a; nangni Pathian thlawhhma chu in ni a, Pathian in sak chu in ni bawk a.

¹⁰Pathian khawngaihna mi pek ang zelin in sa hotu ber fing tak angin keiin lungphum ka rem a, mi dangin a chungah in an sa a. Nimahsela mi tin a chunga an sakzia turah fimkhur theuh rawh se.

¹¹Lungphum rem tawh sa lo chu lungphum dang tuma'n an rem thei tawh si lo a, chu lungphum chu Isua Krista chu a ni.

¹²Tin, lungphum chungah chuan tupawhin rangkachakin emaw, tangkain emaw, lung man tamin emaw, thingin emaw, hnimin emaw, buhpawlin emaw in sa se la,

¹³mi tin hnathawh chu a lang tawh ang. Ni chuan a tilang dawn si a, meia a inlar dawn avangin; mei ngei chuanin mi tin hnathawh chu eng ang nge a nih a fiah tawh ang.

¹⁴Tu hnathawh pawh a chunga a sak chu a awm reng chuan chu mi chuan lawmman a hmu ang.

¹⁵Tu hnathawh pawh a kan chuan chu mi chuan a chan ang; amah tak erawh chu chhandamin a awm ang, amaherawhchu meia kal tlang ang maiin.

¹⁶Pathian in in nih leh Pathian Thlarau nangmahniah a awm reng tih in hre lo em ni?

¹⁷Tupawhin Pathian in chu a tihkhawloh chuan chu mi chu Pathianin a ti khawlo vang; Pathian in chu a thianghlim si a, chu in chu nangmahni in ni e.

¹⁸Tuma'n mahni intihder suh se. In zingah tupawh he khawvelah hian finga a inngaih chuan a lo fin theihna turin mi aah lo chang rawh se.

¹⁹He khawvel finna hi Pathian ngaih chuan atna a ni si a. "Ani chuan mi fingte chu anmahni fin verveknain a awk thin," tih ziak a ni si a;

²⁰Lalpa chuan mi fingte ngaihtuahnate chu athlawn a ni tih a hria," tih ziak a ni leh bawk a.

²¹Chuvangin tuma'n mihringte chhuang suh se. Engkim hi in ta a ni vek si a;

²²Paula emaw, Apollova emaw, Kiphaa emaw, khawvel emaw, nunna emaw, thihna emaw, thil awmsa emaw, thil lo la awm tur emaw, a zavaiin in ta vek a ni;nangni pawh Krista ta in ni a; Krista pawh chu Pathian ta a ni.

²³nangni pawh Krista ta in ni a; Krista pawh chu Pathian ta a ni.