Read Baibul, Mizo 1 Korinth 7 Bible Online

1 Korinth 7 - Baibul, Mizo bible

1 Korinth 7

¹Tin, in thil ziak thute kha chu : Mipa tan hmeichhe khawih loh a tha a ni.

²Nimahsela inngaihnate a awm thin avangin mipain nupui bik nei theuh se la, hmeichhia pawhin pasal bik nei theuh rawh se.

³Pasal chuan a nupui hnenah a chan tur tawk chu pe rawh se; chutiang bawkin nupui pawhin a pasal hnenah a chan tur tawk chu pe bawk rawh se.

⁴Nupui chuan ama taksa chungah thu a nei lo a, a pasal chuan thu a nei zawk a ni; chutiang bawkin pasal pawhin ama taksa chungah thu a nei lo a; a nupui chuan thu a nei zawk a ni.

⁵Tawngtai tura in inpek theihna'n reilote atan rem in tih ve ve chauh loh chuan atua mah intidawng suh u, chu mi hnu chuan in awm dan pangngaiin awm leh thuai u la, chutilochuan insum zawh loh avangin Setanan a thlem dah ang che u.

⁶Nimahsela he thu hi thu pe lamin ka sawi lo a, phal lam thuin ka sawi zawk a ni.

⁷Nimahsela mi zawng zawng keimah ang tak hian awm vek se la ka duh a ni. Amaherawhchu mi tinin Pathian hnen ata thilpek mahni hmuhzawng an nei theuh a ni, pakhatin kawng dangin, pakhatin kawng dangin.

⁸Nimahsela lengtulte leh hmeithaite hnenah chuan heti hian ka ti a ni: Keimah ang tak hian awm se la an tan a tha ang.

⁹Insum theihna an neih loh erawh chuan innei rawh se; hur aiin inneih chu a tha zawk si.

¹⁰Tin, innei sate hnenah chuan thu ka pe (keima pek erawh chu ni loin, Lalpa pek a ni zawk): Nupui chuan a pasal then suh se;

¹¹a then vek chuanin pasal nei tawh loin awm law law rawh se, a nih loh leh a pasal nen vek innei leh rawh se; tin, pasal chuan a nupui ma suh se.

¹²Mi dang hnenah erawh chuan Lalpa ni loin keimahin ka sawi: Unau tupawhin nupui ring lo mi nei se la, ani chuanin a hnena awm reng a lungnih chuan ma suh se.

¹³Tin, hmeichhia pasal ring lo mi nei chuanin a pasalin a hnena awm reng a lungnih chuan then suh se.

¹⁴Pasal ring lo mi chu a nupui zarah tihthianghlimin a awm a, nupui ring lo mi pawh chu a pasal zarah tihthianghlimin a awm bawk si a; chuti ni suh se la in fate chu an thianghlim lo ang; nimahsela an thianghlim reng e.

¹⁵Nimahsela a ring lo zawk chuan then se la, then mai rawh se, chutiangah zawng unaupa emaw, farnu emaw hre an ni tawh lo e; Pathian erawh chuan inrem taka awm turin min ko a ni.

¹⁶Aw nupui, i pasal i chhandam dawn leh dawn loh engtin nge i hriat ni? Aw pasal, i nupui i chhandam dawn leh dawn loh engtin nge i hriat ni?

¹⁷Engpawh ni se la, Lalpa chuan mi tin hnena a sem pangngai ang theuh leh, Pathianin mi tin a kohna pangngai ang theuhvah awm rawh se. Chutiangin kohhran pawl zawng zawngah ka ruat thin.

¹⁸Serh tan tawh hnu koh an awm em? Serh tan loh mi lo ni suh se. Serh tan loa awm koh an awm em? Serh tantir suh se.

¹⁹Pathian thupekte pawm chauh lo chu serh tan hi engmah a ni lo a, serh tan loh pawh hi engmah a ni hek lo.

²⁰Mi tin koha an awm laia an chan pangngaiah chuan awm reng theuh rawh se.

²¹Bawiha i awm koh i ni em? Engto teh chiam suh, remchang a awm erawh chuan chhuah tum mai rawh.

²²Bawiha awm Lalpa koha chu Lalpa bawih chhuahtir a ni si a; chutiang bawkin bawih loa awm koha chu Krista bawih a ni.

²³Mana lei in ni tawh; mihringte bawihah lut suh u.

²⁴Unaute u, mi tin koha in awm laia in chan pangngaiah chuan Pathian hnenah awm reng rawh u.

²⁵Tin, nula thianghlim lam thu-ah zawng Lalpa thupek reng ka nei lo a; nimahsela rinawma awm turin Lalpa hnen ata khawngaihna hmu ka nih avangin ka ngaihtuahzia ka sawi ang.

²⁶Chutichuan tun lai hrehawm avang hian hei hi thain ka ring, mi a awm ngaia awm reng hi.

²⁷Nupuiah phuar belhbawm i ni em? Phelhna zawng suh. Nupuiah phuar belhbawm loh i ni em? Nupui zawng suh.

²⁸Nimahsela nupui i neih chuan thil i tisual lo e, nula thianghlim pawhin pasal a neih chuan thil a tisual hek lo. Amaherawh chu chutiang mite chuan tisaah chuan hrehawm an tuar ang; nimahsela kei zawngin tuar lohtir che u ka duh a ni.

²⁹Amaherawhchu unaute u, hei hi ka ti a ni: tun achinah chuan nupui neite chu nei lo anga an awm theihna tur leh,

³⁰tapte chu tap lo anga an awm theihna tur leh, lawmte chu lawm lo anga an awm theihna tur leh, leitute chu nei lo anga an awm theihna tur leh,

³¹khawvel hmangtute chu hmang lutuk loa an awm theihna turin hun hi tihtawiin a awm a ni; he khawvel awm dan hi a boral mek a nih hi.

³²Nimahsela lungkham nei loa in awm ka duhsak che u a ni. Nupui nei lo chuan Lalpa tihlawm theihnazia tur ngaihtuahin Lalpa lam thil chu a lungkham thin.

³³Nupui nei erawh chuan a nupui tihlawm theihnazia tur ngaihtuahin khawvel lam thil chu a lungkham zawk thin.

³⁴Tin, pasal nei leh nula thianghlim chu an inang lo bawk a. Pasal nei lo chuan a taksa leh a thlarauvah chuan thianghlim takin a awm theihna turin Lalpa lam thil chu a lungkham thin; pasal nei erawh chuan a pasal tihlawm theihnazia tur ngaihtuahin khawvel lam thil chu a lungkham zawk thin.

³⁵Chung chu nangmahni thatna turin ka sawi a ni; khuahkhirh che u ka tum a ni lo a, awm dan mawi tawka in awm theihna tur leh, Lalpa rawng chu buai loa in bawl theihna turin ka sawi zawk a ni.

³⁶Amaherawhchu tupawhin a fanu nula thianghlim a len reitir kawngah tidik loa a inrin chuan, ani chu a vanglai a nih a, a tul bawk si chauh, a tih duh chu ti rawh se; thil a tisual lo e; neihtir rawh se.

³⁷Nimahsela rilru nghet tak pu a, tul ti lo a, ama duhzawng erawh chu hlen theia a fa nula thianghlim chu vawn reng a rilrua tum tlattu chuan a titha zawk ang.

³⁸Chutichuan pasal neihtirtu chuan a titha e, nimahsela a neihtir lotu chuan a titha lehzual a ni.

³⁹Nupui chu a pasal a dam chhung chuan phuar a ni; nimahsela a pasal a thih tawh chuan a duh apiang a nei thei ang, amaherawhchu Lalpaa awm mi a ni tur a ni.Nimahsela keia ngaih chuan a awm ngia a awm reng chuan a eng a thawl zawk ang; kei pawhin Pathian Thlarau chu nei ve bawkin ka inring a ni.

⁴⁰Nimahsela keia ngaih chuan a awm ngia a awm reng chuan a eng a thawl zawk ang; kei pawhin Pathian Thlarau chu nei ve bawkin ka inring a ni.