Read Baibul, Mizo 2 Korinth 1 Bible Online

2 Korinth 1 - Baibul, Mizo bible

2 Korinth 1

¹Paula, Pathian duhzawnga Krista Isua tirhkoh leh kan unaupa Timothea chuan, Korinth khuaa Pathian kohhranho awmte hnenah, Akaia ram zawng zawnga mi thianghlim awm zawng zawngte hnenah nen:

²Pathian kan Pa leh Lalpa Isua Krista hnen ata khawngaihna leh remna in hnenah awm rawh se.

³Kan Lalpa Isua Krista Pathian leh Pa, khawngaihnate Pa leh thlamuanna zawng zawng Pathian chu fakin awm rawh se.

⁴Pathianin keimahni min thlamuanna ngeiin hrehawm eng anga awmte pawh chu kan thlamuan ve theihna turin ani chuan kan hrehawmna zawng zawngah min thlamuan thin,

⁵Krista tuarnate chu kan chunga achuang aliam ang tak hian, kan thlamuanna hi Krista zarah achuang aliam a ni.

⁶Nimahsela, hrehawma kan awm leh, nangmahni thlamuanna tur leh chhandamna tur a ni a; thlamuana kan awm leh, nangmahni thlamuan vena tur a ni a, chu chuan kan hrehawm tuar bawk hi chhel taka in tuarnaah chuan a thawk thin a ni.

⁷Tin, hrehawmna chang vete in nih ang hian, thlamuanna chang vete in ni bawk tih kan hriatin kan beiseisakna che u hi a nghet a ni.

⁸Unaute u, Asia rama kan chunga hrehawm thleng thu kha in hriat loh kan duh lo a, khatia, nasa taka tuar zawh rual loh a, nun reng pawh beisei lo khawp hiala delhbeha kan awm kha.

⁹A ni, thih mai chauh hmabak tawhin kan inhria a, mahni inring lo a, Pathian, mitthi kai thotu chu kan rin zawk theihna tur a lo ni.

¹⁰Chutianga thihna rapthlak ata chu Pathianin min chhanchhuak tawh a, min la chhanchhuak leh ang; min la chhanchhuak leh zel dawn tih, amahah chuan beiseina kan nghat a;

¹¹mi tam tak zara thilpek kan hmuh avangin mi tam takin kan chunga lawmthu an sawi theihna turin nangni pawhin in mi tawngtaisaknaah chuan min tan rualpui u la.

¹²Kan chhuan chu hei hi a ni, kan chhia leh tha hriatna thu hriattir chu, thianghlimna leh Pathian dikna neiin, tisa finnaah ni loin, Pathian khawngaihna zawkin khawvelah hian kan chet kha, nangmahni lamah kan che tha lehzual a.

¹³In chhiar thina awih pawh in awiha lo kha chu thu dang reng reng in hnenah kan ziak lo;

¹⁴kan Lalpa Isua Ni-ah chuan nangni kan chhuan in ni dawn ang bawkin, keini pawh in chhuan kan ni dawn tih nangni thenkhatin min awihsak ve tak ang khan,a tawp thlengin kan thu chu in awih ka beisei bawk a.

¹⁵Tin, chu mi rinna neiin, khawngaihna lehhnih in hmuh theihna turin, in hnenah lo kal hmasa i la,

¹⁶nangmahni tlawh pahin, Makedonia ramah kal zel i la, Makedonia ram atangin in hnenah lo let leh i la ka ti a; tin, Judai rama ka kalna turah chuan nangmahni thlahin awm i la, ka ti bawk a.

¹⁷Chutichuan, chutiang ka rilruk lai khan ka rilru ngheh lohzia lantir em ni ka ni? A nih loh leh, ka hnenah, "A ni, a ni" tih leh "A ni lo, a ni lo" tih chu awm ve ve turin, thiltih ka tum thin chu tisa angin em ni ka tum?

¹⁸Engpawh ni rawh se, Pathian a rinawm angin, nangmahni lamah kan thu hi "A ni" tih leh "A ni lo" tih a ni ve ve si lo.

¹⁹Pathian Fapa Isua Krista, a thu kei leh Silvana leh Timothean in zinga kan hrilha kha "A ni" leh "A ni lo" a ni ve ve si lo a, amahah chuan "A ni" tih a awm zawk a ni.

²⁰Pathian thutiamte chu engzat pawh ni se, amahah chuan "A ni" tih chu a awm si a; chutichuan amah avang pawhin "Amen" tih chu a awm a ni, keimahni avanga Pathian ropuina turin.

²¹Tin, Kristaa nangmahni nena min tinghettu leh keini min thihtu chu Pathian a ni;

²²ani chu min chhinchhiahtu leh kan thinlunga zakhamna Thlarau min petu a ni bawk a.

²³Nimahsela, ka thlarau chunga hretu atan Pathian ka ko a ni, nangmahni zuah tur che u in a ni, Korinth khuaa ka lo kal tak loh ni.In rinna chungah lalna kan nei, ka ti lo a, in lawmna tanpuitu kan ni, ka ti zawk a ni; rinnaa ding in ni si a.

²⁴In rinna chungah lalna kan nei, ka ti lo a, in lawmna tanpuitu kan ni, ka ti zawk a ni; rinnaa ding in ni si a.