Read Baibul, Mizo 2 Korinth 2 Bible Online

2 Korinth 2 - Baibul, Mizo bible

2 Korinth 2

¹Nimahsela, keima lam thu-ah zawng hei hi ka lo tum ta tlat a ni, lungngai chung chuan inhnena lo kal leh tawh lo turin.

²Keiin ka tihlungngaih si che u chuan, ka tihlungngaiha vek lo chuan tu nge mi tilawmtu ni ang le?

³Chutichuan, kha ngei kha ka ziak a ni, chutilochuan ka lo kal hunah ka lawmna turte lakah chuan lungngaihna ka hmu zawk dah ang e; ka lawmna chu in zaa lawmna a nih ka rinsak hlawm si che u a.

⁴Mittui tam tak tla chungin thinlung hrehawm leh thlaphang em ema ka ziak a nih kha; chu chu tihlungngaiha in awmna tur a ni lo a, in chunga hmangaihna nasa lehzual ka neih hi in hriat theih zawkna turin a ni.

⁵Nimahsela, tupawhin mite a tihlungngaih chuan keimah chauh mi tilungngai a ni lo a, (ka tih luattuk lohna turin) in zain a tilungngai hlek theuh zawk che u a ni.

⁶Chutiang mi tan chuan mi tam takin an hrem chu a tawk tawh a ni.

⁷Chutichuan, hrem leh tawh ahnekin in ngaidamin in thlamuan zawk tur a ni, chutilochuan eng emaw tiin mi chutiang chu a lungngaih lutuknain a lem zo dah ang e.

⁸Chu mi avang chuan ama lama in hmangaihna chu tinghet turin ka ngen a che u.

⁹He mi avang pawh hian ka ziak a ni, kawng tinrenga thu in awih leh awih loh ka fiah theihna tur che uin.

¹⁰Eng kawngah pawh mi in ngaihdam apiang, kei pawhin ka ngaidam ve a; kei pawhin ka ngaihdam tawh sa chu, engpawh ka lo ngaih dam tawh chuan nangmahni avangin Krista hmaah chuan ka ngaidam a ni;

¹¹chutilochuan Setanan min dinchan khalh dah ang e; a ngamthlemna chu kan hai si lo a.

¹²Tin, Krista Chanchin Tha hril tura Troas khua ka thlen lai khan, Lalpaah chuan kawng min lo hawnsak na a,

¹³ka unaupa Tita chu ka hmuh loh avangin ka thlarau lamah chuan muanna reng reng ka nei chuang lo a; chutichuan anni chu tawng thain ka then a, ka chhuak a, Makedonia ramah ka kal ta a.

¹⁴Nimahsela, Krista hnehnaa min hruai fotu leh, keimahni hmanga hmun tina amah hriatna rim hriattirtu Pathian hnenah chuan lawmthu awm rawh se.

¹⁵Chhandam mekahte leh boral mekahte chuan Pathian tan Krista rimtui kan ni si a;

¹⁶pawl khatte tan chuan thihna lakah thihna tur rim kan lo ni a, pawl khatte tan chuan nunna laka nunna tur rim kan lo ni a. Chung ang atan chuan tu nge tling zo ang?Mi tak takin Pathian thu hi mite buma sumdawnna'n an hmang angin keini zawngin kan hmang ve si lo a; tih tak zet zawkin, Pathian tirh zawkin, Pathian mithmuhin Kristaah chuan thu kan sawi thin a ni.

¹⁷Mi tak takin Pathian thu hi mite buma sumdawnna'n an hmang angin keini zawngin kan hmang ve si lo a; tih tak zet zawkin, Pathian tirh zawkin, Pathian mithmuhin Kristaah chuan thu kan sawi thin a ni.