Read Baibul, Mizo 2 Korinth 5 Bible Online

2 Korinth 5 - Baibul, Mizo bible

2 Korinth 5

¹Kan awmna leia in hi thiat mah se la, vanah, in kuta sak loh, chatuana awm tur, Pathian hnen ata in nghet chu kan nei tih kan hre si a.

²Van ata kan awmna tur sin thuah chk em emin he mi inah hian kan rum tak meuh meuh si thin a;

³chutianga sinin awm i la saruakin kan lo awm lo ang.

⁴Keini he awmnaa awmte hi rit phurin kan rum tak zet si a, sin loa awm kan duh vang a ni lo a, sin thuaha awm kan duh vang a ni zawk, thi thei hi nunna lem zawhin a awm theihna'n.

⁵Tin, chu mi ngei atana min buatsaihtu chu Pathian a ni, zakhamna Thlarau min petu kha.

⁶Chutichuan, taksaa kan awm chhung hian Lalpa hnenah kan awm lo tih hriain, kumkhuain muang takin kan awm thin;

⁷(hmu theia kal loin, rinnain kan kal zawk si a);

⁸muang takin kan awm, ka ti, taksaa awm loa Lalpa hnena awm kan duh zawk.

⁹Chuvangin, awm i la, awm suh i la, ama lawmzawng mi nih kan tum tlat thin a ni.

¹⁰Mi tinin taksaa thil tihte, a chhia a thain, kan tih ang zela kan hmuh theuh theihna turin, Krista rorelna thutphah hmaah chuan tihlanin kan awm vek tur a ni si a.

¹¹Chutichuan, Lalpa tih nachang hriain mihringte chu kan thlem thin a, Pathian hnenah erawh chuan lantirin kan awm a; nangmahni chhia leh tha hriatnaah pawh lantira kan awm ka beisei.

¹²In hnenah kan insawi mawi leh a ni lo a, thinlung lam ni lo a, alang lam mai chhuangtute chu eng emaw chhanna tur in neih theihna turin keimahni lamah chhuan chhan siam che uin kan sawi zawk a ni e.

¹³Kan at leh, Pathian tan a ni a; kan fin leh, nangni tan a ni si a.

¹⁴Krista hmangaihna chuan min tir lui a ni; heti hian kan ngaihtuah: Mi zawng zawng thih aiin mi pakhat a thi a, chuvangin mi zawng zawng chu an thi a ni;

¹⁵tin, a nungte chu anmahni tan an nun tawh loh a, an thih aia thia tholeha tan chuan an nun tawh zawkna turin a ni, mi zawng zawng thih aiin a thih ni.

¹⁶Chu mi avang chuan tun achinah hian keini zawngin tisa lamah chuan tumah kan hre tawh lo ang; tisa lamah Krista chu lo hre tawh mah i la, tunah zawng kan hre leh tawh lo e.

¹⁷Chu mi avang chuan tupawh Kristaa a awm chuan thil siam thar a lo ni a; thil hluite chu a ral ta a; ngai teh u, a lo thar ta.

¹⁸Nimahsela, engkim Pathian hnen ata chhuak a ni a; ani chuan Krista avangin amah nen inremin min siam a, inremna rawngbawl hna min pe a;

¹⁹khatia, Pathianin Kristaah chuan khawvel hi amah nen inremin a siama an bawhchhiatnate chu bawhchhiatnaa ruatsak loin, inremna thu min kawltir kha.

²⁰Chutichuan, Krista aia palai kan ni a, Pathianin keimahni min hmangin a ngen chiam che u tih theih a ni; "Pathian nen lo inrem rawh u," tiin Krista aiah kan ngen che u a ni.Amahah chuan Pathian felna kan lo nih theihna turin, sual reng reng hre lo chu Pathianin keimahni avangin sualah a siam a.

²¹Amahah chuan Pathian felna kan lo nih theihna turin, sual reng reng hre lo chu Pathianin keimahni avangin sualah a siam a.