Read Baibul, Mizo 2 Korinth 6 Bible Online

2 Korinth 6 - Baibul, Mizo bible

2 Korinth 6

¹Tin, Pathian khawngaihna chu sawtpui loa in hmuh lohna turin, amah thawhpuiin ka ngen chiam a che u.

²Hun lawmawmah ka ngaithla che a, Chhandamna ni-ah ka tanpui che," a ti si a. Ngai teh u, tun hi hun lawmawm chu a ni a; ngai teh u, tun hi chhandamna ni chu a ni.

³Kan rawngbawl hna hi an dem lohna turin eng kawngah mah tluk phahna tur reng reng kan siam lo a;

⁴Pathian rawngbawltute angin engkimah mi mit tlungin kan awm zawk thin, nasa taka chhelnaah te, hrehawmnaah te, neksawrnaah te, hnawhchepnaah te,

⁵vuaknaah te, lung in tannah te, buainah te, thawhrimnaah te, mutmawhnaah te, chaw ngheinaah te,

⁶thianghlimnaah te, hriatnaah te, dawhtheihnaah te, ngilngeihnaah te, Thlarau Thianghlimah te, hmangaihna tak takah te,

⁷thutak thuah te, Pathian thiltihtheihnaah te; ding lam leh vei lama felna hriamhreitein,

⁸ropuina leh chawimawi lohnain, hming sawichhiat leh hming sawithatin; tihdertu angin, mi dik tak ni siin;

⁹mi hriat tham loh angin, hmingthang tak siin; thi lek lek angin, ngai teh u, kan nung si; thunun angin, tihhlum si lohin;

¹⁰lungngai angin, nimahsela lawm fo siin; rethei angin, nimahsela mi tam tak tihausa siin; engmah nei lo angin, nimahsela engkim ngah siin.

¹¹Aw, Korinth-a mite u,kan thinlung pawh phawrh vekin in hnenah thu kan sawi a,

¹²kan inhawng a, nangni erawh chu in inhawng ve si lo.

¹³Tichuan, in chunga kan tih ang bawk khan nangni pawh kan lakah inhawng ve turin fate ngenin kan ngen a che u.

¹⁴Ring lo mite nen rual lo taka nghawngkawl bat dunin awm suh u; suahsualna leh felnain eng nge intawmna an neih? A nih loh leh thim leh engin eng nge inpawlna an neih?

¹⁵Beliara leh Krista pawhin eng nge inngeihna an neih? A nih loh leh ring lo leh ringtu chuan eng nge chan dun an neih?

¹⁶Milemte leh Pathian biak in pawhin eng nge inremna an neih? Keini zawng Pathian nung biak in kan ni si; Pathianin, "Anmahniah ka awm ang a, anmahniah ka leng bawk ang; tin, an Pathian ka ni ang a, anni pawh ka mite an ni ang," a tih ang khan.

¹⁷Chuvangin, "An zing ata lo chhuak u la, a hrangin awm rawh u, thil bawlhhlawh reng reng pawh dek suh u," Lalpa'n a ti.Chutichuan, "Ka lawm ang che u a, in tan Pa ka ni ang a, nangni pawh ka tan fanu fapa in ni ang," Lalpa Engkimtitheia chuan a ti.

¹⁸Chutichuan, "Ka lawm ang che u a, in tan Pa ka ni ang a, nangni pawh ka tan fanu fapa in ni ang," Lalpa Engkimtitheia chuan a ti.