Read Baibul, Mizo 2 Korinth 7 Bible Online

2 Korinth 7 - Baibul, Mizo bible

2 Korinth 7

¹\ Chutichuan, duh takte u, chung thutiam chu kan neih avangin, tisa leh thlarau bawlhhlawhna zawng zawngah i intifai ang u, Pathian tih dek chunga thianghlimna tifamkimin.

²In thinlungah hmun mi kian rawh u; tu chungah mah kan tisual lo a, tumah kan tikhawlo lo a, tumah kan dinchan khalh lo e.

³Chu chu thiam loh chantir tur che uin ka ti a ni lo e; thih leh thi tlang a, dam leh dam tlang turin kan thinlungah hian kan vawng che u tih hman lawkah khan ka sawi kha.

⁴Nangni lamah chuan ka tawng ngamzia hi a nasa a, ka chhuanzia che u hi a nasa a ni; thlamuannain ka khat a, kan hrehawmna zawng zawngah chuan hlimin ka khat liam a.

⁵Makedonia ram kan thlen pawh khan kan tisain muanna reng reng a nei chuang lo a, lehlam lehlamah chuan tihhrehawmin kan awm ta zawk a; pawn lamah insualnate a awm a, chhung lamah hlauhnate a awm a.

⁶Nimahsela inngaitlawmte thlamuantu Pathian chuan, Tita lo kalna chuan min thlamuan ta a;

⁷a lo kalna chauh chuan a ni lo a, in lunglenzia te, in tahzia te, ka chunga in thahnemngaihzia te min hrilhin, nangmahnia a thlamuanna pawh chuan min thlamuan ta a ni; chutichuan ka lawm lehzual ta a.

⁸Ka lehkha thawn khan tilungngai che u mah i la ka inchhir ta lo; a tirah erawh kha chuan ka inchhir a ni, kha lehkha thawn khan a tilungngai che u tih ka hriat avangin; nimahsela rei lo te chauh a nih kha.

⁹Tunah chuan ka lawm a ni, tihlungngaiha in awm avang a ni lo a, simna tura in lungngaih avang a ni zawk e. Keimahni avanga engmah in chan lohna turin Pathian duhzawng anga tihlungngaihin in awm si a.

¹⁰Pathian duhzawnga lungngaihna chuan chhandamna tura simna a thlen a, chu chu inchhirawm lo tak a ni. Khawvel lungngaihna erawh chuan thihna a thlen zawk a ni.

¹¹Ngai teh mah u, Pathian duhzawnga tihlungngaiha in awmna chuan thil lak urhsunna te, pawi khawih ve lo in ni tih lantir duhna te, sual huatna leh sual hlauhna te, min ngaihna leh thahnemngaihna te, sual titu thunun zel tura inpeihna te a neihtir tak che u hi.

¹²Chutichuan, in hnenah ziak mah i la, a sual titu avang khan ka ziak ta lo a, a sual tuartu avang khan ka ziak hek lo, kan chunga in thahnemngaihzia Pathian mithmuha inhnena hriattira a awm theihna turin ka ziak zawk a ni.

¹³Chuvangin, thlamuanin kan awm ta reng a; keimahni thlamuanna chauh loah pawh, Tita lawmna avangin kan lawm nasa lehzual a, nangni zawng zawngin a rilru in tihharhsak tak avangin.

¹⁴A hnenah eng kawngah pawh nangmahni chhuang che u mah i la, ka mualpho si lo a; mualpho ahnekin engkim in hnena thu taktaka kan sawi thin ang khan, Tita hmaa kan chhuan chu thu taktak a lo ni ta ngei a.

¹⁵Tin, in zaa a thu in awihzia te, hlau leh khur chunga amah in lawmzia te chu hre rengin, a thinlung chu nangmahni lamah a cheng nasa lehzual ta a ni.Kawng tinrengah in chunga ka muan avangin ka lawm a ni.

¹⁶Kawng tinrengah in chunga ka muan avangin ka lawm a ni.