Read Baibul, Mizo Galatia 1 Bible Online

Galatia 1 - Baibul, Mizo bible

Galatia 1

¹Paula, tirhkoh (mihringte tirh chhuah ni loin, mihring zarah ni hek loin, Isua Krista leh mitthi zing ata a kai thotu, Pa Pathian zarah a ni zawk) leh,

²ka hnena unau awm zawng zawngte chuan Galatia rama kohhranhote hnenah,

³Pa Pathian leh kan Lalpa Isua Krista hnen ata khawngaihna leh remna in hnenah awm rawh se:

⁴ani chuan kan Pathian leh kan Pa remtihzawngin tun lai khawvel sual tak lakah hian min chhan chhuah theihna'n kan sualte aiah amah a inpe ta;

⁵Pathian hnenah chuan ropuina chatuanin awm rawh se. Amen.

⁶Krista khawngaihna zara a kotu che u kha chuti thuta Chanchin Tha hrang lama in pakaisan hi mak ka ti a ni;

⁷chu chu Chanchin Tha a ni ve si lo; nangmahni tibuaiin, Krista Chanchin Tha tihdanglam duh tute emaw an awm mai a ni a.

⁸Nimahsela, keimahniin emaw, van atanga lo chhuk vantirhkoh pawhin emaw, Chanchin Tha kan hrilh che u lo kha chu Chanchin Tha dang reng lo hrilh che u se la, anchhe dawngin awm rawh se.

⁹Hmana kan sawi ang khan tunah ka sawi leh dawn a ni, "Chanchin Tha in pawma lo kha chu, Chanchin Tha dang tupawhin hrilh che u se la, anchhe dawngin awm rawh se,

¹⁰Mihring tihlawm nge ka tum, Pathian tihlawm? Mi zinga tlaktlum tum ka ni em ni? Ni i la, Krista bawih ka ni lo ang.

¹¹Chutichuan, unaute u, ka Chanchin Tha hrilh kha mihring lam thu a ni lo tih ka hriattir a che u.

¹²Mihring hnen ata hmu ka ni hek lo, mi mi zirtir ka ni hek lo, Isua Krista inlarna avanga hmu ka ni zawk si a.

¹³Judate sakhaw biak danah chuan hman laia ka awm dan chu in hre tawh si a, khatia Pathian Kohhranho nasa taka tiduhdahin ka tihbuai thin kha;

¹⁴tin, mi thlahtute thurochhiah chunga thahnem ka ngaih nasat bik avangin Judate sakhaw biak dan kawngah chuan ka chite zinga ka rualpui tam takte ka lehpel ta a.

¹⁵Tin, ka nu pum chhung atanga mi tihrangtu leh a khawngaihna avanga mi kotu Pathian chuan,

¹⁶Jentailte zinga a Chanchin Tha ka hrilh theihna'n a Fapa chu ka hnena a inlartir lai khan, tumah rawn loin,

¹⁷tirhkoh ka nih hmaa tirhkoh lo ni tawhte hnenah Jerusalem khuaa han kal hek loin, Arabia ramah ka kal bo ta nghal zawk a; tin, Damaska khuaah ka kir leh ta a.

¹⁸Tin, kum thum a vei hnuin Kipha kan turin Jerusalem khuaah kan han kal a, a hnenah ni sawm leh ni nga ka cham a,

¹⁹Tirhkoh dangte erawh chu Lalpa unau Jakoba chauh lo chu tumah ka hmu lo a.

²⁰(Ngai teh mah u! In hnena thu ka ziakte hi Pathian mithmuhah pawh ka daw lo e).

²¹Chu mi hnuah chuan Suria leh Kilikia ramahte ka lo kal a.

²²Nimahsela,Judai ram kohhranho Kristaa awmte hmelhriat ka la ni lo ta fo a.

²³Hmana min tiduhdahtu khan hmana rinna thu a tihkhawloh thin kha tunah a hril ta zawk a ni," tih mi sawi chauh an hria a.Tin, keimah avangin Pathian an chawimawi ta a.

²⁴Tin, keimah avangin Pathian an chawimawi ta a.