Read Baibul, Mizo Galatia 2 Bible Online

Galatia 2 - Baibul, Mizo bible

Galatia 2

¹Tin, kum sawm leh kum li a vei hnuin Tita pawh chu hruai vein Barnaba rualin Jerusalem khuaah ka han kal leh a.

²Tin, hriattirna avangin ka han kal a, Jentailte zinga Chanchin Tha ka tlangaupui thin hi anmahni ka han hrilh a; nimahsela mi lian deuhte chu ahrangin ka hrilh a, chutilochuan athlawnin ka tlan hlauh dah ang e, a nih loh leh, tlan thlawn ka lo ni dah ang e.

³Nimahsela, Tita ka hnena awm pawh chu Grik mi ni mah se la, serh tan luihsakin a awm ta lo a;

⁴chu chu unau der, aruka an hruai luhte avang a ni; chungte chu bawiha min siam theihna'n Krista Isuaah chuan zalenna kan neih hi enthla turin a rukin an lut a.

⁵Nimahsela, Chanchin Tha thutak chu in hnena a awm reng theihna'n darkar khat te pawh intulutin an thu kan zawm lo a.

⁶Tin, mi lian deuha an ruatate lakah chuan (eng ang mi pawh ni se la, ka tan engmah a lem chuang lo; Pathianin tumah a thlei bik lo va;) mi lian deuha an ruatate chuan engmah mi belhchhah chuang si lo a;

⁷chutih ahnekin serhtante Chanchin Tha Petera hnena kawltira a awm angin, serhtan lohte Chanchin Tha ka hnena kawltirin a awm tih an hria a.

⁸(Serhtante tirhkoh ni turin Petera tana thawhsaktu ngei chuan Jentailte tirhkoh ni turin ka tan pawh mi thawhsak si a);

⁹khawngaihna mi peka chu an hriat pawhin Jakoba te, Kipha te, Johana te, bana an ruatate chuan keini Jentailte hnena kal tur leh anni zawng serhtante hnena kal turin kei leh Barnaba chu inpawlna kut ding lamte min pe ta zawk mah a.

¹⁰Retheite kan hriat reng chauh an duh, chu tak chu tih ka tum tlat reng thina a ni.

¹¹Tin, Kipha chu Antiokei khuaa a lo kal laiin demawm taka a awm avangin a hmaichhan ngeiah ka dodal a.

¹²Mi tute emaw Jakoba hnen ata an lo kal hma chuan ani chuan Jentailte hnenah chaw a ei thin a: nimahsela an lo thlen veleh serhtan mite chu a hlauh avangin tel leh ta loin a intihrang ta si a.

¹³Juda dangte pawh an vervek ve ta hlawm a, chutichuan Barnaba meuh pawh an vervekna hruai boin a awm ta hial a.

¹⁴Nimahsela, Chanchin Tha thutak angin an awm fel lo tih ka hriatin, Kipha hnenah an zaa hmaah, "Nang Juda mi i ni a, Juda anga awm loin Jentail angin i awm si a. Engtizia nge Jentailte chu Judate anga awm luihtir kher i tum?" ka ti a.

¹⁵Keini zawng Jentail mi sualte ni loin Juda mi renga piang kan ni a -

¹⁶nimahsela Dan thiltihte avangin mi thiam changing a awm lo a, Isua Krista rin avang chauhin thiam changing a awm zawk tih kan hre si a - keini pawhin Dan thiltih avang ni loin, Krista rinna avanga thiam changa kan awm theihna'n Krista Isua chu kan ring a ni; dan thiltihte avangin mihring reng reng thiam changing an awm dawn si lo.

¹⁷Kristaah thiam changa awm kan tum chung khan keini ngei pawh mi sual kan lo nih hlauh si chuan Krista chu sual rawngbawltu a lo ni em ni? Hnai lo e.

¹⁸Ka thil thiatte kha ka sak leh si chuan bawhchhetu ka nih ka inhriattir mai a ni ang.

¹⁹Pathian lam kawnga ka lo nun theihna'n kei zawng Dan avangin Dan lam kawngah ka thi tawh si a.

²⁰Krista hnenah khenbehin ka awm ta; nimahsela ka nung a ni; keimah erawh chu ka ni tawh lo. Krista chu keimahah a nung zawk a ni; tin, tunah tisaa ka nung hi rinnaa nung ka ni - Pathian Fapa, mi hmangaiha ka aia inpetu rinnaah chuan.Pathian khawngaihna chu ka bawh bo lo e, Dan avanga felna a awm si chuan Krista chu athlawnin a thi a ni ang.

²¹Pathian khawngaihna chu ka bawh bo lo e, Dan avanga felna a awm si chuan Krista chu athlawnin a thi a ni ang.