Read Baibul, Mizo Galatia 4 Bible Online

Galatia 4 - Baibul, Mizo bible

Galatia 4

¹Nimahsela, heti hian ka ti a ni: Roluahtu tur chu engkim chungah hotu ni mah se la, naupang a la nih chhung zawng bawih nen engah mah a danglam chuang lo e;

²a pa ruat hun chu a lo thlen hma loh chuan vengtu leh enkawltute hnuaiah a awm zawk a ni.

³Chutiangin keini pawh naupang kan nih lai khan, khawvel zirtirna dik lo hnuaiah bawihah kan awm;

⁴nimahsela a hun bi a lo kim khan fa nihna kan hmuh theihna'n Dan hnuaia awmte chu tlan turin Pathianin a Fapa,

⁵hmeichhe hrin, Dan hnuaia lo piangin a tir chhuak ta a.

⁶Tin, fa in nih avangin Pathianin a Fapa Thlarau chu, "Abba!(Ka pa!)" tia auin kan thinlungah a rawn tir a.

⁷Chutichuan, bawih i ni tawh lo a, fa i ni zawk e: tin, fa i nih chuan Pathian zara roluahtu tur i ni.

⁸Nimahsela, khang Pathian inhriat loh lai khan, an pianzia reng pawha Pathian ni hlei lote bawih in ni a.

⁹Tuna Pathian in lo hriat hnu hi zawngin-ni lo, Pathian mi hriat in lo nih hnu hian tih tur a ni zawk e, - khawvel zirtirna dik lo engmah ni hlei lo, a bawiha awm leh in chakate lamah chuan engtiziaa hawi kir lehnge in nih?

¹⁰Ni te, thla te, hun te, kum te in serh thin.

¹¹In tan tha ka seng thlawn dah law maw tih ka hlauhsak a che u.

¹²Unaute u, ka ngen a che u, keimah angin awm rawh u, kei pawh nangmahni angin ka awm si a. Ka pawi engmah in khawih lo.

¹³Chanchin Tha in hnena ka hril hmasak tum kha ka tisa chak lohna avang a ni tih in hre si a.

¹⁴Tin, ka tisaa in tan thlemna awm chu in hmusit lo a, in ten hek lo; Pathian vantirhkoh angin, Krista Isua ang maiin mi lawm tak zawk kha.

¹⁵Vannei in intihna kha khawiah nge ni ta le? Tih theih phei chu ni se la nangnin in mitte kher chhuakin mi pe tawh ang tih ka hriatsak che u a sin.

¹⁶Chutichuan, thu dik tak ka hrilh che u avangin in hmelma ka lo ni ta em ni?

¹⁷Tha lamah ni hauh si loin thahnemngai takin an zawng chhuak thin che u a; a ni, anmahni in zawn theihna'n pawn lama khar hnan che u an duh a ni.

¹⁸Thu tha lamah erawh chuan eng lai pawhin thahnemngai taka zawna awm fo hi a tha a ni, in hnena ka awm lai chauh ni loin.

¹⁹Ka naute u, Krista chu nangmahniah siam puitlina a awm hma loh chuan nau veiin ka vei leh che u hi.

²⁰A ni, tun lai hian in hnena awma ka aw tihdanglam ka chak theihzia mai chu; in chungthu-ah ka mangang si a.

²¹Dan hnuaia awm duhte u, mi hrilh rawh u,Dan thu chu in ngaithla thin lo'm ni?

²²Heti hian ziak a ni si a: "Abrahama'n fapa pahnih a nei a, pakhat chu bawihnu lakah, pakhat chu bawih lonu lakah.

²³Nimahsela, bawihnu laka mi chu tisa dan angin a piang a, bawih lonu laka mi erawh chu thutiam avangin a piang a ni," tih hi.

²⁴Chung thu chu tehkhinna a ni; chung hmeichhiate chu thuthlung pahnih an ni; pakhat chu Sinai Tlanga mi, bawih ni tura fa hringtu chu; chu chu Hagari a ni.

²⁵Tin, Hagari hi Arabia rama Sinai Tlang chu a ni a, Jerusalem tun laia awm nen hian ang khat an ni, a fate nen bawihah an awm si a.

²⁶Chung lam Jerusalem erawh chu bawih a ni lo a, chu ngei chu keini nu a ni.

²⁷Nang, ching, fa hring ngai lo, hlim rawh, nang, nau vei ngai lo, au chhuak rawh; pasal nei mi ai chuan, khawhar nu chuan fate a nei tam zawk si," tih ziak a nih kha.

²⁸Tichuan, unaute u, keini hi, Isaaka ang khan, thutiam fate kan ni.

²⁹Nimahsela, chu mi lai chuan tisa dana lo piang chuan Thlarau dana lo piang chu a tiduhdah ang khan, tunah pawh chutiang bawk a ni.

³⁰Nimahsela, Pathian Lehkha Thuin engtin nge a sawi? "Bawihnu chu, a fapa nen hnawt chhuak rawh; bawihnu fapa chuan bawih lonu fapa chu ro a luahpui dawn si lo," a ti a.Chutichuan, unaute u, bawihnu laka fate kan ni lo a, bawih lonu laka fate kan ni zawk.

³¹Chutichuan, unaute u, bawihnu laka fate kan ni lo a, bawih lonu laka fate kan ni zawk.