Read Baibul, Mizo Galatia 6 Bible Online

Galatia 6 - Baibul, Mizo bible

Galatia 6

¹Unaute u, mi, sual engpawh a tih lai phawkin awm se la, nangni thlarau mite u, "Thlemna ka tawk ve dah ang e," tia inveng tha chungin chutiang mi chu thuhnuairawlh takin tungding leh rawh u.

²In ritphurhte chu inchhawk tawn rawh u, chutichuan Krista dan thu chu in zawm a ni ang.

³Mi, engmah ni si loin, mi lian deuha a inruat chuan a inbum chawp mai a ni si.

⁴Mi tinin mahni thiltih fiah theuh zawk rawh se, chu mi hunah chuan mi dang chung ni loin, mahni chung chauhvah chhuan tur a nei ang.

⁵Mi tinin mahni phur an phur theuh dawn si a.

⁶Tin, thu zirtir dawngtu chuan thil tha zawng zawng zirtirtu hnenah pe ve rawh se.

⁷Bumin awm suh u; Pathian chu hmuhsit zia a ni lo e; miin a theh apiang, chu mi vek chu a seng bawk dawn si a;

⁸Mahni tisa lama thehtu chuan tisaa mi chhiatna a seng ang a; Thlarau lama thehtu erawh chuan Thlarauva mi chatuana nunna a seng dawn a ni.

⁹Tichuan thil tha tih i ning suh ang u; kan inthlahdah loh zawngin a hun takah chuan kan seng dawn si a.

¹⁰Chutichuan remchang hun kan neihzia ang zelin mi zawng zawng chungah thil tha i ti ang u, rinna chhungte zinga mi chungah i ti deuh ber ang u.

¹¹Keima kut ngeiin in hnenah lehkha hraw pui puia ka ziak hi en rawh u.

¹²Tisaa hmel intihmawi duh apiangten serhtana awm turin an tir lui thin che u a ni; engmah dang vang a ni lo a, Krista kraws avanga tihduhdah an tuar lohna'n chauh a ni.

¹³Serhtante meuh pawh chuan Dan thu an zawm chuang si lo a, in taksaah chhuan tur an neih theihna'n serh tantir che u an duh mai a ni.

¹⁴Kei erawh chuan kan Lalpa Isua Krista kraws lo chu ka chhuan loh turzia mai chu, chu mi zarah chuan khawvel hi ka tan khenbehin a awm ta, kei pawh khawvel tan khenbehin ka awm a ni.

¹⁵Siam thar lehna lo chu serh tan hi engmah a ni lo a, serh tan loh pawh engmah a ni hek lo.

¹⁶Tin, chu mi dan anga awm apiangte chungah chuan remna leh khawngaihna awm rawh se, Pathian Israelte chungah pawh.

¹⁷Tun achinah hian tumahin mi tibuai tawh suh se; ka taksaah hian Isua chhinchhiahnate ka pu si a.Unaute u, Lalpa Isua Krista khawngaihna in thlarau hnenah awm rawh se. Amen.

¹⁸Unaute u, Lalpa Isua Krista khawngaihna in thlarau hnenah awm rawh se. Amen.