Read Baibul, Mizo Ephesi 1 Bible Online

Ephesi 1 - Baibul, Mizo bible

Ephesi 1

¹Paula, Pathian duhzawnga Krista Isua tirhkoh chuan, Mi thianghlim Ephesi khuaa awm Krista Isuaa mi rinawmte hnenah chuan:

²Pathian kan Pa leh Lalpa Isua Krista hnen ata khawngaihna leh remna in hnenah awm rawh se.

³Kan Lalpa Isua Krista Pathian leh Pa chu fakin awm rawh se. Ani chuan van hmunahte khian Kristaah chuan thlarau lam malsawmsakna tinrengin mal min sawm a;

⁴hmangaihnaa thianghlim leh sawiselboin ama hmaah kan awm theihna turin leilung pianhmain Kristaa min thlan ang kha;

⁵a khawngaihna ropuizia fak turin ama lungduha lawmzawng angin Isua Krista zarah ama tan faa siam tura min lo ruat lawk tawh avangin.

⁶Chu khawngaihna chu Duhtakaah chuan athlawnin min pe a;

⁷a thisen avangin amahah chuan kan tlanna kan nei a ni - a khawngaihna ngahzia ang zela kan bawhchhiatnate ngaihdamna chu.

⁸Chu khawngaihna chuan aman fing tak leh remhre takin min vur a ni,

⁹A duhzawng thuruk kan hnena min hriattirin;

¹⁰hun bi kim khawsak hunah a lawmzawng (engkim - vana thil awmte, lei chunga thil awmte pawh - Kristaa fawk khawm tur chu) amahin tih a tum ang kha; Amah ngeiah chuan a ni.

¹¹Ama duhzawnga remruat ang zela thil engkim titu tum anga ruat lawk ni tawhin, amahah bawk chuan a ro tura siam kan ni,

¹²keini Krista lo beisei hmasa tawhte hi a ropui fakna kan lo nihna turin.

¹³Amahah chuan nangni pawh thutak thu (in chhandamna Chanchin Tha chu) in ngaihthlak a, rin pawh in rin hnuin, amahah chuan Thlarau Thianghlim tiam chuan chhinchhiahin in awm kha.

¹⁴Chu chu Pathian ropuizia fakna'n ama ta ngei tlan chhuahna turin kan roluahna tura zakhamna a ni.

¹⁵Chuvangin, kei pawhin Lalpa Isuaa rinna in zinga awm, mi thianghlimte zawng zawng chunga in lantir bawk thin chu ka lo hriatin,

¹⁶kan Lalpa Isua Krista Pathian, ropuina Pa chuan amah hriatna kawngah finna leh hriat chiantirna thlarau a pek theihna tur che uin

¹⁷ka tawngtainaahte chuan in hming lamin in chunga lawmthu hrilh ka bang lo;

¹⁸chutichuan in thinlung mitte tihvara lo awmin, ama kohna beiseina te, mi thianghlimhovah chuan a ro luah tur ropui ngahzia te,

¹⁹mitthi zing ata a kaihthawh lai leh, lalna te, thuneihna te, thiltihtheihna te, rorelna zawng zawng te,

²⁰he mi khawvelah chauh ni loa khawvel lo la thleng tur pawha hming sak tinrengte chung daihah van hmunahte a ding lama a thuttir laia

²¹Kristaa a thawh, a thahrui chakna thawhzia ang zel khan keini ringtute lama a thiltihtheihna len nasatzia te hi, eng ang nge a nih in hre thei ang.

²²Tin, thil engkim a ke hnuaiah a dah a, amah chu engkim zawng zawng chungah lu atan kohhranho hnenah chuan a pe a,kohhranho chu a taksa a ni, engkim engkima tikhattu famkimna chu.

²³kohhranho chu a taksa a ni, engkim engkima tikhattu famkimna chu.