Read Baibul, Mizo Phipppi 1 Bible Online

Phipppi 1 - Baibul, Mizo bible

Phipppi 1

¹Paula leh Timothea, Krista Isua bawihte chuan Krista Isuaa mi thianghlim Philippi khuaa awm zawng zawngte hnenah, kohhran hotute leh rawngbawltute hnenah nen:

²Pathian kan Pa leh Lalpa Isua Krista hnen ata khawngaihna leh remna in hnenah awm rawh se.

³Ni hmasa ber atang khan tun thlengin Chanchin Tha puan darhnaa in tel ve thin avangin

⁴ka hriat chhuah apiang che uin ka Pathian hnenah lawm thu ka hril thin,

⁵nangmahni zawng zawng ka tawngtaisakna che u apiangah hlim taka dil foin.

⁶Nangmahnia thil tha ti tantu khan Isua Krista ni thlengin a tifamkim zel dawn, chu ngei chu ka ring tlat si a.

⁷Nangmahni zawng zawng lamah chutiang rilru put chu kei atan chuan a awm reng a ni, ka thinlungah ka vawn che u avangin; ka kawlbunnaahte Chanchin Tha thiamna thu ka sawinaah leh ka tihnghehnaahte pawh, in zain khawngaihna chu mi tawmpuitute in ni si a.

⁸Krista Isua lainatna chuan in zavaiin ka ngaihzia mai che u chu Pathian mi hriatpuitu a ni a sin le.

⁹Tin, in hmangaihnain hriat famkimna leh bengvarna tinreng a ngah lehzual nan ka tawngtai thin;

¹⁰chutichuan Pathian ropuina leh fakna tura Isua Krista zara felna rah awm chuan lo khatin,

¹¹Krista ni atan chuan ataktak leh sawiselbo in nih theihna turin thil tha bikte chu tha in ti thei ang.

¹²Tin, unaute u, ka chunga thil lo thlengte kha Chanchin Tha tihdarhna tur a lo ni ta hlauh zawk tih in hriat ka duh a ni;

¹³chutichuan ka kawlbunnate hi Praitorian sipai pawl zawng zawng zingah leh mi dang zawng zawng hnenah chuan Krista avang a ni tih a lang chhuak ta:

¹⁴Lalpaa unau tam zawkte pawh chuan ka kawlbunte avanga lo ring tlatin, hlau loin Pathian thu hrilh kawngah an huai nasa lehzual a ni.

¹⁵Thenkhat chuan itsikna leh elrelna avangin Krista thu chu an hril thin a, a then erawh chuan rilru tha tak puin an hril thung a;

¹⁶chungte chuan Chanchin Tha tan turin Pathianin hna min pe a ni tih hriain hmangaihna avanga hril an ni.

¹⁷Mi thenkhat zawngin an ti tak tak lo, elrelna avang chauhin kawl ka bun chungchangah hian buaina mi belhchhahsak tura ti an ni.

¹⁸Engnge a pawina? Aderin emaw, atakin emaw Krista Thu hrilh a ni ta reng reng a, chu chuan mi tilawm tho ve. A ni, ka lawm zel ang.

¹⁹Chu chu in mi tawngtaisakna avang leh Isua Krista Thlarau mi pek avangin ka chhandamna a lo ni dawn tih ka hre si a,

²⁰engah mah tihmualphoin ka awm dawn lo a,huai taka ka awm pangngai ang foin, tunah pawh nunna avangin emaw, thihna avangin emaw, ka taksaah Krista chawimawiin a awm zawk dawn tih ka beiseina leh ka chakna ang zel hian.

²¹Kei ka tan zawng nun hi Krista a ni si a, thih pawh hlawkna a ni.

²²Nimahsela, tisaa nun hi ka chan ni se la - chu chu ka hnathawh rah ni ang se la, chutichuan a eng nge ka thlan zawk dawn zawng ka hre lo.

²³A lai laklawhah hian a ngaihna hre loin ka awm mai a ni, kal chhuaha Krista hnena awm chakna ka neih avangin, chu chu a tha zawk em em si a.

²⁴Nimahsela, nangmahni avangin tisaa awm reng hi a tul zawk a ni.

²⁵Tin, chu chu ka rin tlat avangin ka awm reng dawn tih ka hria, a ni, rinnaah chuan in lo than lenna turin in zaa hnenah ka awm reng dawn tih ka hria.

²⁶chutichuan inhnena ka awm leh dawn avangin in mi chhuanna chu Krista Isuaa a nasat lehzual theihna turin.

²⁷Engpawh ni se la, in awm dan chu Krista Chanchin Tha nen inmawi phawt rawh se,

²⁸chutichuan nangmahni rawn kan che u mah i la, in hnenah awm lo mah i la, thlarau hmunkhata ding nghetin, rilru hmunkhata Chanchin Tha rinna thu tana bei tlangin, dotute eng kawngah mah hlau loin in awm tih, in chanchin ka hre thei ang,chu chu anmahni tan boral tur an nih hriattirna fiah tak a ni, nangni tan erawh chu chhandam tur in nih hriattirna fiah tak a ni zawk e, chu pawh chu Pathian laka mi a ni.

²⁹Krista avanga amah in rin chauh ni loin, amah avanga in tuar pawh phal a ni si a;indona keimaha in hmuh thin, tunah pawh keimahah a awm tih in hriat, chu mi ngei chu in neih ve tak hi.

³⁰indona keimaha in hmuh thin, tunah pawh keimahah a awm tih in hriat, chu mi ngei chu in neih ve tak hi.