Read Baibul, Mizo Kolossa 1 Bible Online

Kolossa 1 - Baibul, Mizo bible

Kolossa 1

¹Paula, Pathian duhzawnga Krista Isua tirhkoh leh Timothea kan unau chuan,

²Kolossa khuaa Kristaa mi thianghlimte leh unau rinawmte hnenah chuan" Pathian kan Pa hnen ata khawngaihna leh remna in hnenah awm rawh se.

³Vanah in tan beiseina an dahsak che u avangin,

⁴Krista Isua in rinzia leh mi thianghlim zawng zawngte chunga hmangaihna inneihzia kan lo hriat achin in tana tawngtai foin, Pathian kan Lal Isua Krista Pa hnenah chuan lawmthu kan hril thin a.

⁵Chu mi beiseina chanchin chu, hmanah Chanchin Tha thutak thu-ah khanin hre tawh.

⁶Chu mi Chanchin Tha chu khawvel zawng zawngah rahin a pung zel ang bawk hian in hnena a thlen kha. Chutiang bawkin Epaphra, kan bawihpui duh tak laka in zir angin tihtak zeta Pathian khawngaihna chu in ngaihthlaka inhriat ni achinah khan, nangmahniah pawh rahin a pung zel thin a ni.

⁷Epaphra hi kan ai awhin Krista rawngbawltu rinawm tak a ni a,

⁸ani hian thlarauva in hmangaihna chu min hrilh bawk a.

⁹chu mi avang chuan thlarau lam finna leh hriat theihna zawng zawng kawngah ama duhzawng hriat famkimnaah chuan in lo khah theihna'n, kan hriat ni achin chu keini pawhin tawngtai leh dilsak che u kan bang lo;

¹⁰chutichuan hnathawh tinrenga lo rahin, Pathian hriat famkimna kawnga lo sawt deuh deuhin,

¹¹hlim taka chhelna leh dawhtheihna tinreng nei tura a ropuina chakzia ang zela chakna tinrenga lo chakin,

¹²Pa, enga mi thianghlimhote ro chu tawm ve tlaka min rawn siamtu hnenah chuan lawmthu hrilin, kawng tinrenga amah tilungawi turin Lalpa zui tlakin in awm thei ang.

¹³Ani chuan thim thuneihna laka min chhan chhuakin, a Fapa hmangaih taka ramah chuan min kaitir ta a;

¹⁴amahah chuan kan tlanna kan hmu a ni - kan sualte ngaihdamna chu.

¹⁵Ani chu hmuh theih loh Pathian anpui, thil siam zawng zawnga piang hmasa ber chu a ni a;

¹⁶amahah chuan engkim siam a ni a, vana awmte, leia awmte nen, hmuh theihte, hmuh theih lohte nen, lalthutphahte pawh, rorelnate pawh, lalnate pawh, thuneihnate pawh; engkim ama siam a ni, ama ta tur bawka siam a ni;

¹⁷tin, ani hi chu engkim awm hmain a awm reng a ni, amahah chuan engkim a ding ho bawk a ni.

¹⁸Ani chu taksa (chu chu kohhranho) lu a ni a; engkimah chungnung ber a lo nih theihna'n, a bulpui, mitthi zing ata piang hmasa bera chu a ni.

¹⁹Famkimna tinreng chu amaha awm reng leh a kraws thisen chuan remna lo siamin, amahah chuan engkim amah nen a inremtir hi Pa lungnihzawng tak a ni si a;

²⁰amah ngeiah chuan leia thil awmte pawh, vana thil awmte pawh amah nen a inremtir hi.

²¹Tin nangni hmana in thiltih sualnaah khan ama lakah thenin in lo awm a, in rilruah chuan a hmelma in lo nih bawk kha,

²²nimahsela tunah zawng, a hmaah chuan thianghlim tak leh, hmelhem lo leh, sawiselbova a dintirna tur che uin, a thihnain a tisa taksaah chuan amah nen a inremtir tawh che u a ni;

²³nghahchhan neia nghet taka awma, Chanchin Tha in hriata beiseina atanga sawn bo thin lo a, rinnaah hian in awm reng phawt chuan: chu Chanchin Tha chu van hnuaia thil siam zawng zawngte zinga tlangaupui a nih kha; kei Paula hi chu mi rawngbawltua siam ka ni.

²⁴Tuna ka tuarsakna che uah hian ka lawm a, Krista hrehawm tuar bak chu a taksa avangin ka tisaah hian ka chhunzawm zel a ni; a taksa chu kohhranho hi an ni.

²⁵Pathian thu hril kim tura enkawlna hna Pathianin in tan mi pek ang zelin chungho rawngbawltua siam ka ni.

²⁶Mi zawng zawng laka a lo thup kumkhua thin, ama mite hnena a puan tak thuruk kha, tunah erawh chuan a mi thianghlimte hnenah lantirin a awm ta.

²⁷Chung mite hnenah chuan hnam tin tana a thuruk ropui leh hlu tak chu Pathianin hriattir a duh reng a ni; chu thuruk chu, Krista nangmahnia awm ropuina beisei chhan chu a ni;

²⁸mi tin Kristaah chuan thafamkima kan dintir theihna turin, mi tin zilhin, mi tin finna tinrenga zirtirin a chanchin kan hrilh thin hi;chu mi ti tur chuan Krista chakna nasa tak keimaha thawk thin chu hmangin ka bei a, rim takin ka thawk a ni.

²⁹chu mi ti tur chuan Krista chakna nasa tak keimaha thawk thin chu hmangin ka bei a, rim takin ka thawk a ni.