Read Baibul, Mizo Josua 17 Bible Online

Josua 17 - Baibul, Mizo bible

Josua 17

¹Tin, Manasea thlahte chanpual chu he'ng hi a ni; ani chu Josefa fa tir kha a ni a. Gileada pa, Manasea fa tir Makira erawh chu indo mi a ni avangin Gilead leh Basan ram chu anei a.

²Tin, chanpual chu Manasea thlahte dang zawng zawng tan an chhungkaw zir zelin a ni; Abiezera thlahte tan te, Heleka thlahte tan te, Asriela thlahte tan te, Sekema thlahte tan te, Hephera thlahte tan te, Semidia thlahte tan te: chungte chu an chhungkaw zir zela Josefa fapa Manasea thlah mipate chu an ni.

³Manasea fa Makira, chu mi fa Gileda, chu mi fa Hephera, chu mi fa Jelophehada erawh chuan fapa nei loin fanu hlir a nei a ni: chung a fanu hmingte chu Malai te, Novai te, Hoglai te, Milkai te, Tirzai te a ni.

⁴Tin, puithiam Eleazara hmaah leh Nuna fapa Josua hmaah leh mi lianhote hmaah an va kal a, "Kan unaute zingah hian chanpual min pe ve turin LALPA'n Mosia kha thu a pe a ni," tiin a sawi a: chutichuan LALPA thupek angin an pa unaute zingah chuan chanpual a pe ve ta a.

⁵Tin, Jordan rala mi Gilead leh Basan ram tiam loin, Manasea chanpualah hmun sawm a tlu a;

⁶Manasea fanute chuan a fapate zingah chanpual an neih ve avang a ni: tin, Gilead ram chu Manasea fapa dange chuan an chang a.

⁷Tin, Manasea ramri chu Sekem chhak lama awm Aser atanga Mikmethath thlengin a ni; tin, ramri chu ding lampangah En-tapua mite awmna thlengin a kal a.

⁸Tapua ram chu Manasea ta a ni a: Manasea ramri depa Tapua erawh chu Ephraima thlahte ta a ni.

⁹Tin, ramri chu Kana luiteah, luite chhim lampangah chuan a chhuk thla a: chung khawpite chu Manasea khawpuite zinga mi, Ephraima ta a ni: tin, Mansea ramri chu luite hmar lampangah a ni a, tin, tuifinriatah a chhuak a:

¹⁰chhim lampang chu Ephraima ta a ni a, hmar lampang chu Manasea ta a ni a, tuifinriat chu a ramri a ni; hmar lamah chuan Aser thlengin a va ni a, chhak lamah chuan Isakar thlengin a han ni a.

¹¹Isakar leh Aser ramah chuan Manasean Beth-sean leh a chhehvel khua te, Ibleam leh a chhehvel khua te, Dor-a awmte leh a chhehvel khua te, Endor-a awmte leh a chhehvel khua te, Taanak-a awmte leh a chhehvel khua te, Mefido-a awmte leh a chhehvel khua te, zo khawsang pathumte chu a nei a.

¹²Nimahsela Manasea thlahte chuan chung khawpuia awmte chu an hnawtchhuak thei lo va: Kanaan mite chu chung ramah chuan an awm lui tlat mai a.

¹³Tin, heti hi a ni a, Israela thlahte chu an lo chak tak tial tial chinah chuan, Kanaan hote chu hnathawka rawih atan an awmtir a, an hnawtchhuak fai vek ta lo.

¹⁴Tin, Josefa thlahten Josua hnenah, "Engtizia nge maw ni rochun tur chanpual hmun khat chan khat chauh min pek bik ni le, kan tam tehlul nen, LALPA lahin tun thlengin mal min sawm nasat hle mai si nen?" tiin an sawi a.

¹⁵Tin, Josua'n an hnenah, "In tam ahnu, Periz hote leh Rephaim-ho ram ngawte khi in awmna'n han thiat ta che u; Ephraim tlang ram hi in tan a chep luattuk si chuan," a ti a.

¹⁶Tin, Josefa thlahte chuan, "tlang ram hi kan tan a tawk lo a ni: phai rama Kanaan cheng zawng zawng, Beth-sean leh a khawpuia awmte leh Jezreel ruama awmte hian thir tawlailir an nei theuh bik a," an ti a.

¹⁷Tin, Josua'n Josefa chhunge, Ephraima leh Manasea thlahte hnenah chuan, "In tam hle a, chak pawh in chak bawk a: chutichuan chan khat chauh zawng in nei lo ang chu:tlang ram khi in tan ni ang hmiang; ram ngaw mah ni se la, in thiat ang a, a ram chin zawng chu in ta ani dawn nia: Kanaan-hote chuan thir tawlailirte neiin, chak hle mah se la in la hnawtchuak dawn a ni," tiin a sawi a.

¹⁸tlang ram khi in tan ni ang hmiang; ram ngaw mah ni se la, in thiat ang a, a ram chin zawng chu in ta ani dawn nia: Kanaan-hote chuan thir tawlailirte neiin, chak hle mah se la in la hnawtchuak dawn a ni," tiin a sawi a.