Read Baibul, Mizo Josua 5 Bible Online

Josua 5 - Baibul, Mizo bible

Josua 5

¹Tin, heti hi a ni a, Jordan lui piah thlang lama awm Amor-ho lal zawng zawngte leh tuifinriat kama awm Kanaan ram lal zawng zawngte chuan an kai hma loh chuan LALPA'n Jordan tuite chu Israela thlahte hmaah chuan a tikang chat tih an lo hriatin, Israela thlahte avang chuan an thinlungte chu a lo tui zo a, zam lo reng reng an awm hek lo.

²Chutih lai chuan LALPA'n Josua hnenah, "Meilung chemte siam langin, Israela thlahte hi an serh tan a tum hnihna tansak leh rawh," a ti a.

³Tin, Josua'n meilung chemte chu a siam a, Israel thlahte chu vun hmawr tlangah serh a tansak a.

⁴Josua'n an serh a tan chan chu hei hi a ni: Aigupta ram ata chhuak ho zawng zawng, mipa ral kap mi zawng zawngte kha Aigupta ram ata an chhuah hnu khan kawng lakah thlalerah an thi zo ta a ni.

⁵Aigupta ram ata chhuakho zawng zawngte kha chu serhtan sa vek an ni a: amaherawhchu Aigupta ram ata an chhuaha thlalera kawng laa piang zawng zawngte kha chu serhtan an ni ve lo.

⁶LALPA aw an ngaihthlak duh loh avanga mipuiho zawng zawng, Aigupta ram ata lo chhuak, ral kap mite chen a, tihborala an awm vek thlengin Israel thlahte chu thlalerah kum sawmli zet an vak an vak a: LALPA'n chechhama a lo tiam tawh ang ngeiin, an thlahtute hnena a lo tiam tawh hnutetui leh khawizua luang ram chu an hmuh ve a phal ta lo a ni.

⁷Tichuan an thlahte anmahni aia a dinate chu Josua'n an serh a tansak a: kawnglakah khan an serh tan a nih loh avangin, serhtan loh an lo ni reng si a.

⁸Tin, heti hi a ni a, mipuiho zawng zawng serh an tan zawh chuan an dam hma loh zawng an riahhmun, mahni awmna theuhvah chuan an awm a.

⁹Tin, LALPA'n Josua hnenah, "Vawiinah hian Aigupta ho hmusitna che u hi nangmahni ata chu ka lum bo ta e," a ti a. Chutichuan chu mi hmun chu tunthlengin Gilgal an lo ti ta a ni.

¹⁰Tin, Israela thlahte chuan Gilgal-ah awmhmun an khuar a; tin, Jeriko phaiah te chuan chu mi thla ni sawm leh ni li ni tlaiah chuan Kalhlen Kutin an kut a.

¹¹Tin, Kalhlen Kut zawh tuk ni la la chuan chu mi rama buh chhang dawidim telh loh leh chhangper kan an ei a.

¹²Tin, chu mi rama buh an ei tuk atang chuan manna kha a tla ta lo a; Israela thlahte chuan manna chu an dawng leh ta ngai bawk hek lo; chu mi kum chuan Kanaan rama buh leh bal chu an ei ta zawk a ni.

¹³Tin, heti hi a ni a, Josua chu Jeriko khaw bula a awm lai chuan a dak a, a han en a, tin, ngai teh, a hma zawn lawkah chuan mi pakhat a khandaih phawi sa kengin a lo ding reng a: tin, Josua'n a han pan a, a hnenah chuan, "Kan lama tang nge i nih, kan hmelmate lama tang?" a ti a.

¹⁴Tin, a ni chuan, "Ni lo e, LALPA sipaihote hotua lo kal ka ni zawk e," a ti a. Tichuan Josua chu leiah a bawkkhup a, chibai abuk a, a hnenah, "Ka LALPA'n a chhiahhlawh hnenah hian eng nge sawi tur aneih le?" a ti a.Tin, LALPA sipaihote hotu chuan Josua hnenah, "I kephah ata i pheikhawk kha phelh rawh; i dinna hmun kha a thianghlim a ni e," a ti a. Tichuan Josua chuan a phelh ta a.

¹⁵Tin, LALPA sipaihote hotu chuan Josua hnenah, "I kephah ata i pheikhawk kha phelh rawh; i dinna hmun kha a thianghlim a ni e," a ti a. Tichuan Josua chuan a phelh ta a.