Read Baibul, Mizo 1 Timothea 5 Bible Online

1 Timothea 5 - Baibul, Mizo bible

1 Timothea 5

¹Putar deuhte hau suh la, pa angin thlem zawk rawh; rawlthar deuhte chu unau angin;

²pitar deuhte chu nu angin; nula deuhte chu thianghlim takin farnu angin.

³Hmeithai, hmeithai tak takte chu chawimawi rawh.

⁴Nimahsela, hmeithai tupawhin fate emaw, tute emaw nei se la, chungte chuan anmahni in chhung lamah Pathian ngaihsaka awm leh anmahni hringtute chungah that ve thung zir zet rawh se; chu chu Pathian lawmzawng a ni si a.

⁵Hmeithai taktak mahni chauha awm chuan Pathian chungah beiseina a nei tlat a, a chhun a zanin dil leh tawngtaiin a awm fo thin a.

⁶Amaherawhchu,hmeithai mahni nawmna ngawta inpe chu a dam lai pawhin a thi a ni.

⁷Sawiselbova an awm theihna'n chung thu pawh chu pe rawh.

⁸Tupawh mahni chhungkhat lainate ngaihsak lo a, mahni chenpui chhungte ngei pawh ngaihsak lo chuan rinna an phatsan a ni, ring lo mi aiin an sual zawk.

⁹Hmeithai chu kum sawmruk achin hnuai lama mi ni lo a, mi pakhat nupui ni tawha thil tha tih kawnga mi faka a awm chuan hmeithaia ziak theih a ni -

¹⁰fate lo chawmtlei tawha mikhualte lo thleng tawha mi thianghlimte ke lo sil tawha mi mangangte lo chhawmdawl tawha thil tha tinreng taima taka a lo tih tawh phawt chuan.

¹¹Hmeithai la nula deuhte erawh chu ziak duh su; An chakna avanga Krista lamah an lo ngheh lohin pasal neih an duh leh mai thin.

¹²An thu tiam an bawhchhia a, an thiam lo a ni.

¹³Tin, chu lo pawh chu in tinah an leng lawr a, thatchhiat pawh an ching thin a; thatchhiat chang pawh ni loin, thu sawi loh tur sawiin kamtam leh mite thiltih relsak an ching bawk thin a ni.

¹⁴Chutichuan, hmeithai la nula deuhte chuan pasal nei se la, fate nei se la, in chhung khawsak rel se la, sawiselna tur remchang reng hmelma chu hmuhtir suh sela ka duh a ni.

¹⁵Tunah pawh mi thenkhat chuan Setana lam panin an pensan ta si a.

¹⁶Ringtu hmeichhiain hmeithai awmpui nei se la, anni chu amah chuan chhawmdawl mai rawh se, kohhranho chu tihbuaiin awm suh se, hmeithai, belh tur nei lote chu an chhawmdawl theihna'n.

¹⁷Kohhran upa rorel thate chu a leh hniha chawimawi tlaka ngaih ni rawh se, thu hril leh zirtirnaa thawk rimte chu chawimawi tlaka ngaih lehzual ni rawh se.

¹⁸Pathian Lehkha Thu chuan, "Sebawngpain buh a chil laiin a hmui phuar suh ang che," a ti a. "Hnathawktu chu a hlawh hmu tlak a ni," a ti bawk a.

¹⁹Kohhran upa an hekna chu hretu pahnih emaw pathum emaw kaa mi lo chu pawm suh.

²⁰Thil tisualtute chu mi zawng zawng hmaah zilhhau rawh, mi dangte pawhin an hlauh ve theihna'n.

²¹Heng thu hi thleithlak bik nei loin, thlei bik neia engmah ti loin, Pathian leh Krista Isua leh vantirhkoh thlante mithmuhin zawm turin thahnemngai takin ka hriattir a che.

²²Tuma chungah kut nghat thut suh la, mi dang sualnaahte chuan tel hek suh; intithianghlim reng rawh.

²³Tui chauh in mi ni tawh suh la, i pum avang leh i dam loh fo avangin uain tlem te hmang thin ang che.

²⁴Mi thenkhat sual chu a langsar a, an tuar nghal bawk thin, thenkhat erawh chu a lang lawk lem lo a.Chutiang bawkin thil tha tih lang nghal a awm a, lang nghal rih lo mah se thup hlen theih a ni lo.

²⁵Chutiang bawkin thil tha tih lang nghal a awm a, lang nghal rih lo mah se thup hlen theih a ni lo.