Read Baibul, Mizo 1 Timothea 6 Bible Online

1 Timothea 6 - Baibul, Mizo bible

1 Timothea 6

¹Pathian hming leh a zirtirna thu sawichhiata a awm lohna'n, bawih nghawngkawl bat apiangte chuan anmahni pute engkimah chawimawi tlakah ngai rawh se.

²Tin, ringtu pu neite chuan unau an nih avangin ngainep suh se, amaherawhchu sawtna hmutute chu ringtu leh duh takte an nih avangin an rawng bawlsak lehzual rawh se.Chung thu chu zirtir la, fuih rawh.

³Mi tupawhin zirtirna dang a zirtir a, thutak (Kan Lalpa Isua Krista thu chu) leh Pathian ngihsak lam zirtirna a awih loh chuan

⁴ani chu a chapo a, engmah a hre lo a, hriat ahnekin inhnial leh thu kalh kawngah chuan a a ta zawk a ni. Chung atang chuan awhna te, insualna te, sawichhiatna te, tha lo lama rinna te,

⁵hnialhratna te a chhuak thin a; chutiang hnialhrat mite chu rilru chhe nei leh thutak nei lo mi, Pathian ngaihsak hi hlawkna emaw titu an ni.

⁶Pathian ngaihsakna hi lungawina tel zawngin hlawkna nasa tak a ni reng a ni.

⁷Khawvelah hian engmah kan luhpui si lo a, engmah kan chhuahpui thei bawk hek lo.

⁸Nimahsela, ei tur leh silh tur neiin chungh chuan kan lungawi ang.

⁹Amaherawhchu, hausak tumte chu thlemnaah te, thangah te, atthlak leh tikhawlo thei duhna tam takah te an tlu lut thin, chung duhnate chuan chhiatna leh boralnaah chuan mite a tipil thin.

¹⁰Tangka sum ngainat hi sual tinreng bul a ni si a; chu chu thenkhatten an awt a, rinna chu an kal bosan a, anmahni leh anmahni lungngaihna tam takin an inchhun tlang ta chuk a.

¹¹Nimahsela, nang, Pathian mi, chung thilte chu tlansan la, felna te, Pathian ngaihsakna te, rinna te, hmangihna te, dawhtheihna te, thuhnuairawlhna te um zel rawh.

¹²Rinna intihsiakna tha chu bei la, chatuan nunna chu vuan rawh; chu mi chang turin koh i ni a; hretu tam takte mithmuhah tanna tha chu i tan tawh kha.

¹³Pathian, thil engkim tinungtu leh Krista Isua, Pontia Pilata hmaa tanna tha tantu mithmuhah chuan thu ka pe a che;

¹⁴kan Lal Isua Krista rawn inlar leh hma loh chuan thupek kha thianghlim tak leh sawiselbova pawm turin.

¹⁵Chu inlarna chu a hun takah chuan fak tlak Thuneitu tak chauh, lalberte Lalber, lalte Lal chuan a entir ang;

¹⁶amah chauh chuan thih theih lohna a nei a, hnaih theih rual loh engah chuan a awm a, amah chu tumahin an hmu ngai lo a, hmuh pawh an hmu thei hek lo; ama hnenah chuan chatuana chawimawina leh thiltihtheihna awm rawh se. Amen.

¹⁷He mi khawvela hausate hi chapo lo tur leh sum rinawm loah hian an beiseina nghat lo a, thil zawng zawng lawmna tura tam taka min petu Pathian chungah chuan nghat zawk turin zilh rawh;

¹⁸thil tha ti turin, thil tha tih ngah turin, thil phala thawhlawm peih turin,

¹⁹nunna, nunna taktak chu an vawn theihna'n, hun lo thleng tur atan chuan lungphum tha tak an tana khawl khawm turin fuih rawh.

²⁰Aw Timothe, i hnena kawltira awm chu vawng tha rawh. Pathian zah lo lam thu sawi mai mai leh, dik lo taka "Finna" an vuah hnialna hi hawisan rawh.Chu chu thenkhatten nei emaw intiin rinna kawng chu an kal kawisan ta a. Khawngaihna i hnenah awm rawh se.

²¹Chu chu thenkhatten nei emaw intiin rinna kawng chu an kal kawisan ta a. Khawngaihna i hnenah awm rawh se.