Read Baibul, Mizo 2 Timothea 4 Bible Online

2 Timothea 4 - Baibul, Mizo bible

2 Timothea 4

¹Pathian mithmuh leh mi nung leh mitthi ngaihtuahtu tur Krista Isua mithmuhah chuan a inlarna leh a ram chhalin, thahnemngai takin ka hriattir a che:

²Thu chu hril rawh; a hunah te, a hun loah te pawh bei zel rawh; dawh thei taka zirtir chungin an thiam loh hriattir la, zilh la, fuih rawh.

³Zirtirna dik an ngaih peih loh hun a la thleng dawn si; an bengte a zat avangin anmahni duhzawng angin zirtirtute an hnenah an khawm zawk ang a,

⁴an bengte chu thutak lamah an chhungawng ang a, thawnthu lam panin an peng tawh ang.

⁵Nang erawh chu engkimah fimkhur la, hrehawm tuar la, Chanchin Tha hriltu lam hna thawk la, i rawngbawlna kha hlen rawh.

⁶Kei zawng tunah pawh hlanin ka awm mek a ni si a,ka chhuah hun a thleng tawh e.

⁷Intihsiakna tha chu ka bei zo tawh a, ka tlansiakna kawng ka hlen tawh a, rinna chu ka vawng reng tawh a ni;

⁸tunah chuan felna lallukhum chu ka tan dahin a awm tawh a, chu chu Lalpa ngaihtuahtu fel tak chuan chu mi ni-ah chuan mi pe ang; ka hnenah chauh ni loin, a inlarna ngai apiangte hnenah pawh.

⁹Rang takin ka hnenah lo kal hram rawh;

¹⁰Dema chuan tun lai khawvel hi a ngainat avangin mi kalsan a, Thessalonika khuaah a kal ta si a; Kreskea chu Galatia ramah a kal ta a, Tita chu Dalmatia ramah a kal ta bawk a.

¹¹Luka chauh ka hnenah a awm ta a. Marka kha sawm la, han hruai ve rawh, ani chu rawngbawl lamah ka tan a tangkai si a.

¹²Tukika zawng Ephesi khuaah ka tir ta.

¹³I lo kal hunah Troas khuaah Karpa hnena kawrfual ka hnutchhiah kha, lehkhabute nen khan rawn keng la, savun lehkha mawlh kha rawn keng ang che.

¹⁴Aleksandra, dar chhun thiam kha, ka chungah a sual em em thin a ni, Lalpa chuan a thiltih ang zelin a thungrul ang;

¹⁵a lakah khan nang pawh fimkhur rawh, kan thu a dodal nasa em si a.

¹⁶Ka thiamna thu ka sawi hmasak tum chuan tumah rengin mi tanpui lo a, mi thlahthlam ta vek zawk a ni; a mawh chu phurin awm hlawm suh se.

¹⁷Chanchin Tha keimah avanga hrilh kimin a awm theihna'n leh Jentailte zawng zawng chuan an hriat theihna'n, Lalpa chuan mi tan a, mi tichak ta zawk a ni; tin, sakeibaknei kaa mi kha chhan chhuahin ka lo awm ta a ni.

¹⁸Lalpa chuan sualna zawng zawng lakah mi chhan chhuak ang a, a van ramah chuan him takin mi thlen ang; amah chu chatuana ropuiin awm rawh se. Amen.

¹⁹Priski leh Akuila, Onesiphora chhungte nen khan, chibai mi buksak ang che,

²⁰Erasta chu Korinth khuaah chuan a awm ta reng a, Trophima erawh chu Mileti khuaah dam loin ka kalsan ta a.

²¹Thlasik hmain lo kal hram hram ang che.

²²Eubula te, Pudea te, Lina te, Klaudii te unau zawng zawngte nen chibai an buk a che.Lalpa chu i thlarau hnenah awm rawh se. Khawngaihna in hnenah awm rawh se.

²³Lalpa chu i thlarau hnenah awm rawh se. Khawngaihna in hnenah awm rawh se.