Read Baibul, Mizo Tita 1 Bible Online

Tita 1 - Baibul, Mizo bible

Tita 1

¹Paula, Pathian bawih, chatuana nunna beiseia Pathian thlante rinna kawngah leh Pathian ngaihsak lam thutak hriatna kawnga Isua Krista tirhkoh bawk chuan:

²Chu chatuana nunna chu Pathian, dawt sawi thei loa chuan khawvel awm hmain a tiam a;

³nimahsela ama hun takahte chuan a thu chu thuchahah chuan a tilang ta, chu thuchah chu Pathian kan Chhandamtu thupek ang zela kawltir ka ni.

⁴Tita, kan rin thuhmun vanga ka fa taktak hnenah: Pa, Pathian leh Krista Isua min Chhandamtu hnen ata khawngaihna leh remna awm rawh se.

⁵He mi avang hian Kret thliarkarah khan ka hnutchhiah che a ni, thil tihfel bakte chu i tihfel zelna tur leh, thu ka pek che ang khan khaw tinah upate i ruatna turin;

⁶tupawh sawiselbo, nupui pakhat nei, fate Pathian thu ring, nawmsak bawl lutuk kawnga sawisel hlawh lo, dan ang loa awm lo nei ang nih tawh phawt chuan.

⁷Kohhran hotu chu Pathian sum enkawltu a nih avangin sawiselbo ni tur a ni; mi tihmawh, thin ram, uain ruih hmang, mi velh hmang, hlepna bawlhhlawha duham mi ni tur a ni lo a;

⁸mi lawm dan thiam, tha lam duh, rilru dik tak, mi fel, mi thianghlim, insum thei mi ni zawk tur a ni a;

⁹zirtirna dik tak kawngah chuan mi a fuih theihna tur leh, hnialtute chu thiam loh a chantir theihna turin zirtirna ang zel thu rinawm chu pawm tlat mi ni bawk tur a ni.

¹⁰Dan ang loa awm, thu sawi mai maite leh tihdertute mi tam tak an awm si a, serhtanho zinga mi an ni deuh ber;

¹¹chungho ka chu huhsak tur a ni, hlepna bawlhhlawh duh vanga thu zirtir loh tur zirtirin, mite a chhung chhungin an chawk khawlo si thin a.

¹²Anmahni zinga mi, anmahni zawlnei zawlnei pakhat ngeiin, "Kret thliarkara mite chu dawthei te, sakawlh sual te, thatchhe chaw hehte an ni fo mai," tiin a sawi kha.

¹³Chu thu hriattir chu a dik a ni.

¹⁴Chuvang chuan Judaho thawnthute leh thutak hawisan thinte thupekte chu ngaihsak loin, rinnaah chuan an dik theihna turin na takin zilhhau rawh.

¹⁵Mi thianghlimte tan chuan engkim a thianghlim thin; nimahsela mi bawlhhlawh leh ring lote tan chuan engmah thianghlim reng a awm thin lo, an rilru leh an chhia leh tha hriatna reng pawh a bawlhhlawh tawh a.Pathian hria an inti a, tenawm te, thu awih lo te, thil tha tinreng tih kawnga Pathian duh lohzawngte an ni, (an thiltihin an phatsan si).

¹⁶Pathian hria an inti a, tenawm te, thu awih lo te, thil tha tinreng tih kawnga Pathian duh lohzawngte an ni, (an thiltihin an phatsan si).