Read Baibul, Mizo Hebrai 10 Bible Online

Hebrai 10 - Baibul, Mizo bible

Hebrai 10

¹Dan thu chuan thil tha, lo awm turte anpui tak nei loin, a thla chauh a neih avangin, kum tina inthawina pangngai a hlan fote chuanin a lo hnaite chu engtikah mah an tifamkim thei dawn si lo.

²Chuti ni suh se la, a betute chu vawi khata tihthianghlim nghala lawmin, sual inhriatnate an neih loh avangin hlan an bang tawh daih dawn lo'm ni?

³Nimahsela, chung inthawinaah chuan kum tinin sualte hriat lehna a lo awm fo zawk thin.

⁴Bawngpate leh kelte thisen chuan sualte tibo thei rual a ni si lo.

⁵Chutichuan, khawvela a luh laiin "Inthawina leh thil hlan i duh lo a, Ka tan taksa mi buatsaihsak zawk a:

⁶Halrala pumpeknaahte leh, Sual tana inthawinaahte chuan Lawmna reng i nei lo.

⁷Chu veleh chuan keiin, 'Aw Pathian, ngai teh, (Lehkhabu zialah chuan ka thu ziak a ni a) I duhzawng ti turin ka lo kal e,' ka ti a," a ti a.

⁸A chhakah hian, "Inthawina te, thil hlan te, halrala pumpekna te, sual tana inthawina te i duh lo a, chungah chuan lawmna i nei hek lo," a ti a, (chungte chu Dan thu anga hlan a ni a,)

⁹chu veleh chuan, "Ngai teh, i duhzawng ti turin ka lo kal e," a lo ti ta a. A pahnihna hi a tundin theihna turin a hmasa chu a la bo ta a ni.

¹⁰Chu mi duhzawng chuan Isua Krista taksa vawi khata hlan nghal vang khan tihthianghlimin kan awm ta.

¹¹Tin, Puithiam tinrengin kawla ni chhuak chhiara rawngbawlin, sualte engtik maha tibo thei lo inthawina pangngai hlan foin an ding thin;

¹²ani erawh hi chu chatuan atan sualte tana inthawina pakhat chauh a hlan hnuin, Pathian ding lamah a han thu ta zawk a;

¹³chuta chin chu a hmelmate a kephah nghahchhana siam an nih hma loh zawng a nghak reng a.

¹⁴Thil hlan pakhat chauhin tihthianghlim tawhte chu chatuan atan a tifamkim tawh si a.

¹⁵Tin, Thlarau Thianghlim pawh chuan min hriattir bawk a: "Chung ni hnuah chuan

¹⁶An hnena thu ka thlun tur chu he'ng hi a ni, Lalpa'n a ti; An thinlungh ka thupekte ka dah ang a, An rilruah ka ziak bawk ang," tia a sawi hnu khan,

¹⁷An sualte leh an bwhchhiatnate Ka hre reng tawh lo ang," a ti si a.

¹⁸Tichuan chutiangte ngaihdamna apiangah chuan sual tan thil hlan a awm tawh lo a ni.

¹⁹Chutichuan, unaute u, kawng min ruatsak,

²⁰kawng thar leh nungah chuan, puanzar chu (chu chu a taksa tihna a ni) kal tlangin, Isua thisen avang chuan Hmun Thianghlimah khan luh kan huam avang leh,

²¹Pathian chhungte chunga Puithiam ropui tak kan neih avngin

²²kan thinlunga chhia leh tha hriatna tha lo chu theh faisaka awma kan taksa pawh tui fima buala awmin, rinna famkim neia thinlung tak zet puin i hnaih ang u.

²³Kan beisei thurin hi a nghin lohna turin i pawm tlat ang u, thutiamtu chu a rinawm si a;

²⁴tin, hmangaih leh thil tha tiha inchawk tho turin inngaihtuah tawn ang u;

²⁵thenkhat tih dan anga kan inkhawmte bansan loin, infuih tawn zawk ang u; ni chu lo hnai telh telha in hriatin infuih tawn nasa lehzual sauh rawh u.

²⁶Thutak hriatna famkim chu kan chan hnua thil kan tihsual luih si chuan sualte tana inthawina a awm tawh hauh lo ang a,

²⁷rorelna hlauhawm tak lo thleng tur leh dotute kang ral tur thinurna mei kan hmabak a ni mai.

²⁸Mosia Dan thu pawisa lo mi chu hretu pahnih pathum emaw thuin, lainatna tel loin an thi thin.

²⁹Pathian Fapa rap beta, thuthlung thisen amah tihthianghlimna chu thil narana ruat a, khawngaihna Thlarau tivuitu chu, chu mi ai chuan eng tia hremna nasa zawk nge tuar tlaka ruat tur nia inngaih?

³⁰Phuba reng reng keima lak tur a ni, keima'n ka thungrul ang," tih leh, "Lalpa chuan a mite a ngaihtuah ang," ti lehtu chu kan hre si a.

³¹Pathian nung kuta tluk chu thil rapthlak tak a ni.

³²Nimahsela, hmana tihena in awm hnua tuarna buai nasa tak in tuar lai nite kha hre leh rawh u;

³³kawng khatah chuan hmuhsit leh hrehawmte pawh tuarin ennawma siamin in awm a, kawng khatah chuan chutianga hmana awmte chu tuarpuitute in lo ni a.

³⁴Kawl bunte chu in lainat a, sum tha zawk, awmhlen bawk tur chu mahniin in nei tih hriain in sum laksakte pawh lawm takin in lo tuar ta bawk si a.

³⁵Chutichuan, in rinna lawmman chu paih bo suh u, lawmman ropui tak a nei dawn si a.

³⁶Pathian duhzawng in tih hnuin thiltiam chu in hmuh theihna'n chhelna in ngai a sin.

³⁷Rei lo te achinah Lo kal tura chu a lo kal dawn si a, Rei a ril tawh lo ang.

³⁸Nimahsela ka mi fel chu a nung ang: A hnungtawlh erawh chuan, Ka rilruin amahah chuan lawmna reng a nei lo ang.Nimahsela, keini zawng boral tura hnungtawlh pawla mi kan ni lo a; nunna humhim tura rinna nei pawla mi kan ni zawk.

³⁹Nimahsela, keini zawng boral tura hnungtawlh pawla mi kan ni lo a; nunna humhim tura rinna nei pawla mi kan ni zawk.