Read Baibul, Mizo Hebrai 12 Bible Online

Hebrai 12 - Baibul, Mizo bible

Hebrai 12

¹Chutichuan, chhumpui nasa tak ang thlirtuten min hual vel avng hian, min tihnawk apiang leh sual keimahnia bet tlat chu i dah ve ang u, tin, Isua, kan rinna siamtu leh tifamkimtu lam chu enin, kan hmaa intlansiakna tur awmah chuan chhel takin i tlan zel ang u.

²Ani chuan a hmaa hlimna awm avang chuan mualphona chu ngainepin kraws chu a tuar a, Pathian lalthutphah ding lamah khian a han thu ta a.

³In thlarau lamah in inthlahdah a, in lo hah lohna'n, anmahni chung tha lo turin mi sualte chutianga hnialkalhna tuartu chu ngaihtuah teh u khai.

⁴Sual doin thisen chhuak khawpin in la tang lo va:

⁵fuihna thu, fate zilh anga zilna che u kha, in lo theihnghilh ta e. "Ka fa, Lalpa thununna chu ngainep suh la, A zilhhauva i awmin inthlahdah hek suh;

⁶Lalpa chuan a hmangaih chu a thunun thin a, Fa a lawm apiang chu a vaw thin a sin ni," tih hi.

⁷In tuar hi nangmahni thununna'n a ni; fate chunga tih angin Pathianin in chungah a ti a nih hi; pa thunun loh fa tu nge awm ngai le?

⁸Fa zawng zawng hlawh thin thununna chu hlawh loa in awm erawh chuan fa tak ni loin, sawn in ni a ni ang a sin.

⁹Chu lo pawh chu min thunun turin kan tisa pate kan neih kha, chungte chu kan zah si a; chu mi aia nasa zawkin, an nunna turin thlaraute Pa thu thuin kan awm dawn lo'm ni?

¹⁰Anni chuan ni rei lo te, tha an tih ang zelin min thunun ngei tak a, ani erawh chuan a thianghlimna chu kan chan ve theihna'n, kan thatna turin min thunun zawk a ni.

¹¹Tin, thununna reng reng hi tuar lai chuan lawmawmin a lang lo a, lungchhiatthlakin a lang zawk thin, tuar hnuah erawh chuan chu mia sawizawia awmte tan chuan rah thlamuanawm tak felna chu a chhuahsak thin.

¹²Chutichuan, kut uai thlate chu char rawh u, khup zawite nen;

¹³tin, kebai chu tihpelhsawlh loh a, tihdamin a awm zawkna'n, in kete tan kawng ngilte siam rawh u.

¹⁴Mi zawng zawng nena inremna leh thianghlimna um rawh u, chu mi thianghlimna loin tuma'n Lalpa an hmu lo ang:

¹⁵Fimkhur rawh u, Pathian khawngaihna ata in bo dah ang e, khakna zung eng emaw lo chawra tibuai che uin,chu chuan mi tam tak chu tihbawlhhlawhin an awm ang a,

¹⁶inngaih hmang emaw, Esauva anga Pathian zah lo mi emaw an lo awm dah ang e. Ani chuan a fa tir nihna chu chaw vawi khat eiah a hralh a.

¹⁷Chu mi hnuah chuan malsawmna chu rochun a duh pawhin, mittui tla chungin thahnemngai takin zawng mah se la, rilru lamletna remchang a hmuh loh avangin paihin a awm ta tih in hre si a.

¹⁸Nangni zawng tlang khawih theih, meia kang te, chhum dum te, thim te, thlipui te,

¹⁹tawtawrawt rikna te, thusawi thawm awmna te kha thleng in ni si lo a; (chu thawm hretute chuan thu dang reng an hnena sawi tawh lo turin an ngen a,

²⁰Sa lam pawhin tlang chu khawih se la, lunga den hlumin a awm tur a ni," tih thupek kha an tuar thei ta si lo a;

²¹an thil hmuh pawh chu a hlauhawm em em a, chutichuan Mosia'n, "Ka hlauin ka khur nasa em em a," a tih hial kha)

²²Zion tlang te, Pathian nung khua, van Jerusalem te, chhiar sen lohho vantirhkoh inkhawmpui te,

²³fa tir vana hming chuang kohhranho hnen te, Pathian, mi zawng zawng ngaihtuahtu hnen te, mi fel tihthatfamkimho thlarau hnen te,

²⁴Isua, thuthlung thar palai hnen te, thisen theh, Abela thisen aia thu tha zawk sawitu hnen te thleng in ni zawk.

²⁵Thusawitu chu in lo duh lo dah ang e, fimkhur rawh u. Leia anmahni zilh lawktu kha an duh loh maha hremna an pumpelh si loh chuan, keini, van atanga min zilh lawktu hawisantute hian kan pumpelh lo lehzual ang.

²⁶Chu mi lai chuan a aw khan lei hi a tinghing a; nimahsela tunah hian, "Vawi khat chu lei chang ni loin, van pawh ka la tinghing leh ng," tiin a tiam ta zawk a.

²⁷Tin, "Vawi khat chu ka la tinghing leh ang," tih hian, thil nghing lote chu a awm reng theihna turin, thil lo nghingte chu thil siamte ang maiin sawn boin a awm dawn tih a hriattir a ni.

²⁸Chutichuan, ram tihnghin rual loh kan chan avang hian khawngaihna i nei ang u, chu mi zarah chuan zah leh tih dek chungin Pathian lawmzawng rawng kan bawl thei dawn zuk nia;Kan Pathian hi mi kanralhmang mei a ni si a.

²⁹Kan Pathian hi mi kanralhmang mei a ni si a.