Read Baibul, Mizo Hebrai 4 Bible Online

Hebrai 4 - Baibul, Mizo bible

Hebrai 4

¹Chuvangin, i hlau vang u, chutilochuan a chawlhnaa luhna thutiama la awm reng siin, in zingah tupawh tling lo angin inlo awm mial dah ang e.

²An hnena hrilh a nih ang bawk khan Chanchin Tha kan hnenah hrilh a ni ngei si a; nimahsela an thu ngaihthlak chuan anmahni a tisawt si lo, ngaithlatu taktakte nen rinna zawmin an awm loh avangin.

³Keini ring tawhte hi chu chawlhnaah chuan kan lut mek a nih hi. "Ka thinura ka chhechham ang khan Ka chawlhnaah chuan an lut lo ang," a tih ang khan; leilung pian tirh ata hnate chu thawh zawh a ni tawh na a.

⁴Khawii hmunah emaw ni sarih ni thu hetiangin a sawi a sin, "Tin, ni sarih ni-ah chuan Pathian chuan a hnathawh zawng zawng a chawlhsan ta a," tiin.

⁵Tin, he hmunah hian, "Ka chawlhnaah chuan an lut lo ang," a ti leh a.

⁶Chutichuan, thenkhat chu mi chawlhnaah chuan an la luh tur thu a la awm avang leh, hmana Chanchin Tha hrilh dawngtute chu awih loh vanga an luh tak loh avangin,

⁷rei tak hnu khan Davidaah chuan, "Vawiin hian," tiin ni eng emaw a ruat nawn leh a ni, "Vawiin hian a aw in hriat chuan In thinlung tikhauh suh u," tia a hmaa ka sawi ang khan.

⁸Josua chuan anniho chu a chawlhtir tawh si zawngin, chu mi hnuah chuan ni dang thu chu a sawi lo ang.

⁹Chutichuan, Pathian mite tan chuan Chawlhnia chawlhna a la awm ta fo a.

¹⁰Tupawh Pathian chawlhnaa luta chawl ve tawh chuan Pathian tih ang khan a hnathawhte chu a chawlhsan ve thin.

¹¹Chutichuan, tumah chu mi awih loh entirna anga awma an tluk lohna'n chu chawlhnaa lut tur chuan thahnem i ngai ang u.

¹²Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruhtuah leh thling phel hrang khawp hialin a chhun thei a,thinlunga ngaihtuah leh tumte hi a hre nghal thei a ni.

¹³Thil siam ama mithmuha lang lo reng reng a awm lo; kan chanchin kan thlenna tura mithmuhah chuan engkim saruak leh inhawng sain a awm zawk a ni.

¹⁴Tichuan, vanahte kal tlang tawh Puithiam Lalber ropui tak, Isua, Pathian Fapa chu kan neih avangin kan thurin hi i pawm tlat ang u.

¹⁵Puithiam Lalber,kan chak lohnate min hriatpui thei lo nei kan ni si lo; keimahni anga kawng tinrenga thlemna tawk tawh, sual erawh chu sual lo, nei kan ni zawk e.Chutichuan, zahngaihna kan hmuh theihna tur leh, puih kan ngaih huna tanpuina khawngaihna kan hmuh theihna turin, khawngaihna lalthutphah chu huai takin i hnaih ang u.

¹⁶Chutichuan, zahngaihna kan hmuh theihna tur leh, puih kan ngaih huna tanpuina khawngaihna kan hmuh theihna turin, khawngaihna lalthutphah chu huai takin i hnaih ang u.