Read Baibul, Mizo Jakoba 1 Bible Online

Jakoba 1 - Baibul, Mizo bible

Jakoba 1

¹Jakoba, Pathian leh Lalpa Isua Krista bawihin, Hnam Sawm leh Hnam Hnih darhte chu chibai a buk e.

²Ka unaute u, in rinna fiahna chuan chhelna a siam tih hriain,

³thlemna tinreng in tawh hunin lawman hlirah ngai rawh u.

⁴Tin, engmah tlachham loa in famkim a, in puma in him theihna'n chhelna chuan thawk famkim rawh se.

⁵In zingah tupawhin finna a tlakchham chuan mi zawng zawng hnena hau lo leh ui loa pe thintu Pathian chu dil rawh se, chutichuan a hnenah pek a ni ang.

⁶Nimahsela, ringhlel hauh loin rinna neiin dil rawh se, ringhleltu chu tuifinriat fawn thli chhem len leh vawrh ang a ni si a.

⁷Chutiang mi, rilru bulbal nei lo,

⁸a thil tih zawng zawng nghet lo mi chuan Lalpa hnenah engmah hmuh inring suh se.

⁹Unau daikilkara mi chu chawimawia a awm avangin lawm rawh se;

¹⁰hausa erawh chu tihtlawma a awm avangin lawm rawh se; hlobet par angin a la ral mai dawn si a.

¹¹Ni a lo chhuah a, thli lum tak a lo tlehin hlobet a tivuai a; tin, a par chu a rem a, a awm dan mawizia chu a boral thin; chutiang bawkin mi hausa chu a kalnaah chuan a lo vuai dawn si a.

¹²Thlemna tuar hram hramtu chu a eng a thawl e; fiaha a awm hnuin nunna lallukhum, Lalpa'n amah hmangaihtute hnena a tiam chu a hmu dawn si a.

¹³Tuma'n thlemna an tawh laiin, "Pathian thlem ka ni," ti suh se; Pathian chu sual thlem rual a ni lo, amah pawhin tumah a thlem ngai lo.

¹⁴Mi tin mahni chaknaa hruai bo leh hipa an awm chuan thlemna an tawk a ni zawk e.

¹⁵Tin, chakna chuan no a pai a, sual a hring thin a; tin, sual chuan a lo puitlinin thihna a hring thin.

¹⁶Ka unau duh takte u, bumin awm suh u.

¹⁷Thilpek tha leh thilpek famkim zawng zawng chu chung lam atangin engte Pa hnen ata, a lo chhuk thin a ni, amahah chuan danglamna leh herna hlim reng reng a awm thei lo.

¹⁸A thil siamte hmahruaitu ang kan lo nih theihna'n ama duhzawngin thutak lakah chuan min hring a ni.

¹⁹Unau duh takte u, chung chu in hria e; nimahsela mi tinin ngaihthlak chuh sela, thusawi chuh lo se la, thin tinel rawh se:

²⁰mihring thinurnain Pathian felna chu a siam si lo.

²¹Chuvangin, bawlhhlawh zawng zawng leh sual khat liam chu dah bo u la, thu tuh, in thlarau chhandam thei chu thuhnuairawlh takin pawm rawh u.

²²Nimahsela, thu ngaithlatute mai ni loin zawmtute lo ni zawk rawh u, chutilochu mahni inbum in lo ni dah ang e.

²³Tupawh thu ngaithlatu nia zawmtu ni si lo chu mi, darthlalanga a pianpui hmai ngun taka inen ang chu a ni,

²⁴a kal bo a, mi eng ang nge a nih a intheihnghilh nghal si thin.

²⁵Amaherawhchu, tupawh dan famkim, zalenna dan hi bih a, chutianga awm reng a, ngaithla a, theihnghilh leh mai thintu ni lo a, zawma hna thawk fo thintu ni zawk chu, chu mi chu a thil tihah malsawmin a awm ang.

²⁶Tupawh sakhaw ngaihsak nia inringa a lei veng tha si lo a, mahni thinlung inbum zawk chu, chu mi sakhaw biak dan chu engmah a ni lo e.Kan Pathian leh Pa mithmuha sakhaw biak dan thianghlim leh sual tel lo chu hei hi a ni, fahrah leh hmeithaite an hrehawm laia kan leh khawvel bawlhhlawh kai loa insiam thin hi.

²⁷Kan Pathian leh Pa mithmuha sakhaw biak dan thianghlim leh sual tel lo chu hei hi a ni, fahrah leh hmeithaite an hrehawm laia kan leh khawvel bawlhhlawh kai loa insiam thin hi.