Read Baibul, Mizo Jakoba 2 Bible Online

Jakoba 2 - Baibul, Mizo bible

Jakoba 2

¹Ka unaute u, kan Lalpa Isua Krista, Ropuina Lalpa chu ring chungin, mi thlei bik nei suh u.

²In inkhawmna inah mi rangkachak zungbun bun, puan mawi tak sin lo lut se la, tin, mi rethei puan chhe tak sin lo lut bawk se la;

³tin, puan mawi tak sin chu in ngaihsak a, a hnenah chuan, "Nang he hmun thaah hian thu rawh," in tih a, tin, mi rethei hnenah chuan, "Nang chu sawtah sawn ding la, a nih loh leh ka ke nghahchhan hrulah hian thu rawh," in tih chuan,

⁴in rilruah thlei bik neiin ngaihtuahna sual pua sawiseltute in lo ni dawn lo'm ni?

⁵Ka unau duh takte u, ngai teh u, Pathianin he khawvel thila retheite hi rinnaa hausa tur leh, amah hmangaihtute hnena a tiam ram chu luahtu turahte a ruat lo em ni?

⁶Nangni zawngin mi rethei chu in timualpho ta zawk a ni. Mi hausate chu a tiduhdahtu che u leh rorelna ina hnuk lut thintu che u chu an ni lo'm ni?

⁷Hming zahawm tak in put hi sawichhetute chu an ni lo'm ni?

⁸Nimahsela Pathian Lehkha Thu, "Nangmah i inhmangaih angin i vengte i hmangaih tur a ni," tih lal dan hi in zawm chuan in ti tha e;

⁹amaherawhchu, mi thlei bik in neih chuan in tisual a ni, Danin bawhchhetu-ah a chantir si che u a.

¹⁰Tupawhin Dan zawm kim mah se la, kawng khata a tihsual si chuan a zaah chuan thiam loh changin a awm tawh a ni.

¹¹Uire suh," titu chuan, "Tual that suh," a ti bawk si a. Chutichuan uire lo mah la, tual i thah si chuan Dan bawhchhetu i ni reng reng tawh a ni.

¹²Chuvangin,zalenna dana rorelsak turate angin thu sawi u la, thil ti bawk rawh u.

¹³Mi chunga khawngaihna nei lo chu khawngaihna tel loin rorelsakin a awm ang; khawngaihna hi rorelna aiin a chungnung zawk a ni.

¹⁴Ka unau te u, miin, "Rinna ka nei," ti mah se la, thiltih a neih si loh chuan eng nge sawt ang? Chutiang rinna chuan amah a chhandam thei ang em ni?

¹⁵Unaupa emaw, unaunu emaw, saruaka awmin an ni tin chaw tlachham se la,

¹⁶tin, in zinga tuin emaw an hnenah, "Thlamuang takin kal u la, lum tak leh puar takin awm rawh u," ti u la, taksa tana thil chakkhai chu in pek si loh chuan eng nge sawt ang?

¹⁷Chutiang bawkin rinna chu thiltih nei loin amah chauhin a awm chuan thi a ni.

¹⁸A ni, mi tuin emaw, "Nangin rinna i nei a, keiin thiltih ka nei a ni; i rinna chu i thiltih tel loin mi entir rawh, tin, keiin ka thiltihin ka rinna ka entir ang che.

¹⁹Pathian chu pakhat a ni tih i ring a ni maw? I ti tha e; ramhuaite pawhin an ring a, an khur thin a sin," a ti ang.

²⁰Aw mi lawilopa, thiltih tel loa rinna mai chu engmah a ni lo tih i hre duh em le?

²¹Min thlahtu Abrahama chuan a fapa Isaaka maicham chunga a hlan lai khan thiltih avangin thiam a chang a ni lo'm ni?

²²Rinna chuan a thiltih nen a thawk dun a, tin, thiltih avangin a rinna chu a famkim ta tih i hria e.

²³Pathian Lehkha Thu, "Abrahama chuan Pathian a ring a, chu rinna chu a felnaah ruat a ni," tih thu kha a lo hlawhthling a, tichuan Pathian Thianah vuahin a awm ta a.

²⁴Rinna avang ngawt ni loin, thiltih avang zawkin miin thiam a chang thin tih in hre ta.

²⁵Chutiang bawkin Rahabi nawhchizuar pawh khan tirhkohte kha a lo lawm a, kawng danga a hawntir lai khan thiltih avangin thiam a chang a ni lo'm ni?Thlarau tel loin taksa chu thi a ni, chutiang bawkin thiltihte tel loin rinna pawh chu thi a ni.

²⁶Thlarau tel loin taksa chu thi a ni, chutiang bawkin thiltihte tel loin rinna pawh chu thi a ni.