Read Baibul, Mizo Jakoba 4 Bible Online

Jakoba 4 - Baibul, Mizo bible

Jakoba 4

¹In zinga indona leh inhnialnate hi khawi atanga lo chhuak nge ni? In taksa pengahte indona siam thintu, in duhzawng atangte chuan lo chhuak a ni lo em ni?

²In chak a, in nei si lo va: tual in that a, in awt a, in nei thei si lo va: in inhnial a, in indo a; in dil loh avangin in nei lo a;

³in dil a, in dil dik loh avangin in hmu lo, in nawmsakna'n hman in tum si a.

⁴Nangni uirenute u, khawvel thian nihna hi Pathian hmelma nihna a ni tih in hre lo em ni? Chutichuan tupawh khawvel thian nih duh apiang chuan Pathian hmelmaah a insiam thin a ni.

⁵A nih loh leh, "Thlarau keimahnia a chentir chuan thik khawp hialin min duh a ni," tih hi, Pathian Lehkha Thuin engmah loin sawiin in ring em ni?

⁶Nimahsela, khawngaihna tam lehzual a pe thin; chuvangin Pathian Lehkha Thuin, "Pathianin mi chapote a dodal a, inngaitlawm te erawh chu khawngihna a pe thin," a ti a ni.

⁷Chutichuan, Pathian thu thuin awm rawh u; amaherawhchu Diabola dodal rawh u, tichuan a tlan bosan ang che u.

⁸Pathian hnaih rawh u, tichuan anin a hnaih ang che u. Mi sualte u, in kutte silfai rawh u; rilru bulbal nei lote u, in thinlung tithianghlim rawh u.

⁹Hrehawm u la, lungngai u la, tap rawh u; in nuih lungngaihah chang se la, in hlim nguiah chang rawh se.

¹⁰Lalpa mithmuhin inngaitlawm rawh u, tichuan a chawimawi ang che u.

¹¹Unaute u, insawichhe tawn suh u. Tupawhin a unau a sawichhiatin emaw, a uanu a sawiselin emaw, Dan a sawichhiain Dan a sawisel a ni; nimahsela, Dan i sawisel chuan Dan zawmtu i ni lo a, roreltu i ni zawk e.

¹²Dan petu leh roreltu pakhat chauh a awm, chhandam theia tiboral theia chu; nang thenawmte sawiseltu chu tu nge maw i nih le?

¹³Tunah ngai teh u khai, nangni, "Vawiinah emaw, naktukah emaw, chu mi khawpuiah chuan ka kal ang a, chutah chuan kum khat kan va thang ang a, kan sum dawng ang a, hlawkna kan hmu ang," titute u.

¹⁴Naktukah chuan eng nge lo awm dawn in hre si lo. In nunna chu eng nge ni? Chhum rei lo te lo lang a, ral leh ta mai thin ang hi in ni si a.

¹⁵Chutichuan, "Lalpa'n rem a tih chuan kan dam ang a, chu mi kha mi kan ti ang," in ti tur hi a ni.

¹⁶Nimahsela, in uannate hi in chhuang zawk si a, chutiang chhuanna zawng zawng chu sual a ni.Chutichuan, tupawh thil tha tih tur hriaa ti si lo chu a tan sual a ni.

¹⁷Chutichuan, tupawh thil tha tih tur hriaa ti si lo chu a tan sual a ni.